ନୂଆଦିଲ୍ଲୀ,୧୧/୦୩ : ସୋସିଆଲ ମିଡିଆ 'ଏକ୍ସ' ଉପରେ ସାଇବର ଆଟାକ୍ । ଦିନକରେ ୩ ଥର ଅଚଳ ହୋଇଗଲା ମାଇକ୍ରୋ ବ୍ଲଗିଂ ପ୍ଲାଟଫର୍ମ । ପୂର୍ବରୁ ଟ୍ବିଟର ଭାବେ ପରିଚିତ ଥିବା 'ଏକ୍ସ' ସୋସିଆଲ ସାଇଟ୍ ସାରା ବିଶ୍ବରେ ଗୋଟିଏ ଦିନରେ ୩ ଥର କାମ କରିନବା ସୂଚନା ମିଳିଛି । ଫଳରେ ୟୁଜର୍ସ ସମସ୍ୟା ଭୋଗିଥିଲେ । ଅଚାନକ ଏପରି ସମସ୍ୟା ନେଇ ବଡ ଗୋଷ୍ଠୀ କମ୍ବା ଦେଶ ସାମିଲ ଥିବା ସନ୍ଦେହ କରାଯାଉଥିବା କହିଛନ୍ତି ଏଲନ୍ ମସ୍କ ।
ବିଶ୍ବର ନମ୍ବର ୱାନ ଧନୀ ଏଲନ୍ ମସ୍କଙ୍କ ସୋସିଆଲ ମିଡିଆ କମ୍ପାନୀ 'ଏକ୍ସ' (ପୂର୍ବରୁ ଟ୍ବିଟର) ଉପରେ ବଡ ଧରଣର ସାଇବର ଆକ୍ରମଣ ହୋଇଛି । ଏଥିରେ ଅନେକ ଦଳ ଓ ଦେଶ ସଂପୃକ୍ତି ଥିବା ମସ୍କ ସନ୍ଦେହ କରୁଛନ୍ତି । ସେ କହିଛନ୍ତି କି, 'ଏକ୍ସ' ଉପରେ ପ୍ରତିଦିନ ସାଇବର ଆଟାକ୍ ହେଉଛି । କେଉଁଠାରୁ ଆକ୍ରମଣ ହେଉଛି ତାହା ଜାଣିବାକୁ ଉଦ୍ୟମ ଚାଲିଛି ।
'ଏକ୍ସ' ଉପରେ ଏପରି ସମୟରେ ସାଇବର ଆକ୍ରମଣ ହୋଇଛି, ଯେତେବେଳେ ଏଲନ୍ ମସ୍କ ଓ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମିଳିତ ଭାବେ ବିଭିନ୍ନ ଦେଶ ଉପରେ ଶୁଳ୍କ ଲଗାଇବାକୁ ନିଷ୍ପତ୍ତି ନେଉଛନ୍ତି । ତେଣୁ ତାଙ୍କ ବିରୋଧରେ ଶତ୍ରୁ ସୃଷ୍ଟି ହେବା ସନ୍ଦେହ କରାଯାଉଛି । 'ଏକ୍ସ' ଉପରେ ସାଇବର ଆଟାକ୍ ନେଇ କୌଣସି ଦେଶ କିମ୍ବା ଗୋଷ୍ଠୀ ଦାବି କରି ନାହାନ୍ତି । ଏଲନ ମସ୍କ ୟୁକ୍ରେନକୁ ଦାୟୀ କରିଛନ୍ତି । ଏପରି ବାରମ୍ବାର ହେଉଥିବା କହିଛନ୍ତି ।
ଅଧିକ ପଢନ୍ତୁ...କାମ କରୁନାହିଁ ସାମାଜିକ ଗଣମାଧ୍ୟମ ଏକ୍ସ; ସମଗ୍ର ବିଶ୍ୱରେ ୟୁଜର୍ସ ମାନେ ଭୋଗୁଛନ୍ତି ସମସ୍ୟା
କହି ରଖୁଛୁ କି, ଗତକାଲି (ସୋମବାର) 'ଏକ୍ସ' ର ଗ୍ଲୋବାଲ ଆଉଟେଜ୍ ହୋଇଥିଲା । ଦିନତମାମ ବାରମ୍ବାର ଡାଉନ ହୋଇଥିଲା । ସାମାଜିକ ଗଣମାଧ୍ୟମ ମାଇକ୍ରୋ ବ୍ଲଗିଂ ପ୍ଲାଟଫର୍ମ 'ଏକ୍ସ' କାମ ନ କରିବାରୁ ୟୁଜର୍ସ ସମସ୍ୟା ଭୋଗିଥିଲେ । ଖାଲି ଭାରତ ନୁହେଁ ସମଗ୍ର ବିଶ୍ବର ୟୁଜର୍ସ ହଇରାଣ ହୋଇଥିବା ଦେଖିବାକୁ ମିଳିଥିଲା । ୪ ଲକ୍ଷରୁ ଅଧିକ ୟୁଜର୍ସ ଏନେଇ ଅଭିଯୋଗ କରିଥିଲେ । ପ୍ରାୟ ୫୬ ପ୍ରତିଶତ ଲୋକ ଅସୁବିଧାର ସମ୍ମୁଖୀନ ହୋଇଥିଲେ ବୋଲି ଡାଉନ ଡିଟେକ୍ଟରର ରିପୋର୍ଟରେ ପ୍ରକାଶ ପାଇଥିଲା । ପ୍ରଥମେ ଅପରାହ୍ନ ୩ଟା ୩୦ମିନିଟରେ ଅଚଳ ହୋଇଥିଲା 'ଏକ୍ସ' । ଏହାପରେ ରାତି ୯ଟା ଓ ପରେ ରାତି ୧୧ ଟାରେ ଲମ୍ବା ସମୟ ଯାଏ ବିଭ୍ରାଟ ଦେଖିବାକୁ ମିଳିଥିଲା ।
