ନୂଆଦିଲ୍ଲୀ,୩୦/୦୭: ଦୀର୍ଘ ଦୁଇ ଦଶନ୍ଧି ଧରି ପକ୍ଷାଘାତରେ ପୀଡ଼ିତ ଥିଲେ । ନା କିଛି ଜାଣୁଥିଲେ ନା ବୁଝୁଥିଲେ । ନିଜ କାମ ନିଜେ କରିବା ତ ବହୁ ଦୂରରେ । ୨୦ ବର୍ଷ ଧରି ପକ୍ଷାଘାତ ବା ପାରାଲିସିସ୍ରେ ପୀଡ଼ିତା ଜଣେ ମହିଳା କମ୍ପ୍ୟୁଟର ଚଲାଇଛନ୍ତି । ମହିଳାଙ୍କ ମସ୍ତିଷ୍କରେ ଲାଗିଛି ଏଲନ ମସ୍କଙ୍କ ନ୍ୟୁରାଲିଙ୍କ୍ ଚିପ୍ । ଅଡ୍ରେ କ୍ର୍ୟୁଜ୍ ନାମ୍ନୀ ଏହି ମହିଳା ବ୍ରେନ୍ ଚିପ୍ ସାହାଯ୍ୟରେ ନିଜ ବିଚାରକୁ ଉପଯୋଗ କରି କମ୍ପ୍ୟୁଟର ଚଲାଇଛନ୍ତି । ୨୦ ବର୍ଷ ପରେ ପ୍ରଥମ ଥର ନିଜ ନାମ ଲେଖିଛନ୍ତି ମହିଳା ଜଣକ । ଅଡ୍ରେ ନିଜ ଏକ୍ସ ଆକାଉଣ୍ଟ୍ରେ ଏକ ପୋଷ୍ଟ୍ ଶେୟାର କରିଛନ୍ତି ।
ଏଥିରେ ସେ ଚିପ୍ ସାହାଯ୍ୟରେ ମସ୍ତିଷ୍କର ନିର୍ଦ୍ଦେଶ ଜରିଆରେ ନିଜ ନାଁ ଲେଖିବାକୁ ପ୍ରଥମ ଥର ପ୍ରୟାସ କରୁଥିବା ଦେଖିବାକୁ ମିଳିଛି । ଏହି ପ୍ରକ୍ରିୟାରେ ପ୍ରୟୋଗ ହୋଇଥିବା ଟେକ୍ନୋଲୋଜି ବ୍ରେନ୍କମ୍ପ୍ୟୁଟର ଇଣ୍ଟରଫେସ୍ (ବିସିଆଇ) ନାମରେ ପରିଚିତ । ଆଉ ଏକ ପୋଷ୍ଟ୍ରେ ଅଡ୍ରେ ଡୁଡଲ୍ର କିଛି ଫଟୋ ଶେୟାର କରିଛନ୍ତି, ଯାହାକୁ ସେ ମସ୍ତିଷ୍କକୁ ନିର୍ଦ୍ଦେଶ ଦେଇ ପ୍ରସ୍ତୁତ କରିଛନ୍ତି । ପୋଷ୍ଟ୍ରେ ସେ କ୍ୟାପ୍ସନ ଦେଇଛନ୍ତି, ପଏଣ୍ଟର୍ରେ ଆଙ୍ଗୁଳି ରଖି କ୍ଲିକ୍ କରିବା ଓ କର୍ସର୍ ଚଲାଇବା କଥା ଚିନ୍ତା କରି ସେ କିଛି ଡୁଡଲ୍ ପ୍ରସ୍ତୁତ କରିଛନ୍ତି । ଟେଲିପାଥି ଜରିଆରେ ଏପରି କରିଥିବା ସେ ଲେଖିଛନ୍ତି ।
ନ୍ୟୁରାଲିଙ୍କ୍ ଏକ ବ୍ରେନ୍-କମ୍ପ୍ୟୁଟର ଇଣ୍ଟର୍ଫେସ କମ୍ପାନି । ୨୦୧୬ରେ ଏଲନ ମସ୍କ ଏହାକୁ ପ୍ରତିଷ୍ଠା କରିଥିଲେ । ମସ୍ତିଷ୍କରେ ଏକ ସୂକ୍ଷ୍ମ ଚିପ୍ ପ୍ରତିରୋପଣ ଜରିଆରେ ବ୍ୟକ୍ତିଙ୍କ ସ୍ନାୟବିକ ସଙ୍କେତକୁ କିଛି ବାହ୍ୟ ଉପକରଣ ପଠାଇବାରେ ଏହା ସାହାଯ୍ୟ କରେ । କମ୍ପାନିର ୱେବ୍ସାଇଟ୍ ଅନୁସାରେ, ଚିକିତ୍ସକୀୟ ପରୀକ୍ଷଣରେ ଲୋକେ ସେମାନଙ୍କ ବିଚାର ଜରିଆରେ କମ୍ପ୍ୟୁଟର ଓ ରୋବୋଟିକ୍ ହାତକୁ ନିୟନ୍ତ୍ରଣ କରିବା ପାଇଁ ନ୍ୟୁରାଲିଙ୍କ୍ ଡିଭାଇସ୍ ବ୍ୟବହାର କରୁଛନ୍ତି । ମାନବ ସାମର୍ଥ୍ୟର ନୂଆ ଦିଗକୁ ଉନ୍ମୁକ୍ତ କରିବାକୁ ଏବଂ ଯେଉଁମାନଙ୍କର ଚିକିତ୍ସା ସମ୍ଭବ ହେଉନାହିଁ, ସେମାନଙ୍କୁ ସ୍ୱତଃ କାମ କରିବାରେ ଏହି ଟେକ୍ନୋଲୋଜି ସାହାଯ୍ୟ କରିବ । ଏଲନ୍ ମସ୍କଙ୍କ ନ୍ୟୁଲୋଲିଙ୍କ ଚିପ୍ ଏକ ବଡ଼ ସଫଳତା ହାସଲ କରିଥିବା କୁହାଯାଇପାରିବ । ଅଡ୍ରେ କ୍ର୍ୟୁଜ୍ ପ୍ରଥମ ମହିଳା ଯାହାଙ୍କ ମସ୍ତିଷ୍କରେ ଏହି ଚିପ୍ ଲାଗିଛି ।
