ନୂଆଦିଲ୍ଲୀ,୨୪/୧୧: ଟେସ୍ଲା ତଥା ସ୍ପେସ୍ଏକ୍ସ ସିଇଓ ଏଲନ ମସ୍କ ଇତିହାସର ସବୁଠୁ ଧନୀ ମାନ୍ୟତା ହାସଲ କରିଛନ୍ତି । ତାଙ୍କ ସମ୍ପତ୍ତି ୩୪୮ ବିଲିୟନ ଡଲାର ବା ୩୪୮୦୦ କୋଟି ଡଲାରକୁ ବୃଦ୍ଧି ହୋଇଥିବା ବ୍ଲୁମ୍ବର୍ଗ ବିଲିୟନେୟାର ସୂଚୀରୁ ଜଣାପଡ଼ିଛି । ଆମେରିକା ରାଷ୍ଟ୍ରପତି ନିର୍ବାଚନରେ ଡୋନାଲ୍ଡ ଟ୍ରମ୍ପଙ୍କ ବିଜୟ ପରେ ଟେସ୍ଲା ସେୟାର ଉପରମୁହାଁ ହୋଇଚାଲିଛି । ଏଥିଯୋଗୁ ଏଲନ ମସ୍କଙ୍କ ସମ୍ପତ୍ତି ଦ୍ରୁତ ବେଗରେ ବଢୁଛି । ଫଳରେ ସେ ଇତିହାସ ରଚିଛନ୍ତି । ବ୍ଲୁମ୍ବର୍ଗ ବିଲିୟନେୟାର ସୂଚୀ ମୁତାବକ, ଶନିବାର ଏଲନ ମସ୍କଙ୍କ ସମ୍ପତ୍ତି ୩୪୮ ବିଲିୟନ ଡଲାରକୁ ବଢ଼ିଛି । ଗତ ବର୍ଷକରେ ୧୧୯ ବିଲିୟନ ଡଲାର ସମ୍ପତ୍ତି ଯୋଡ଼ିବାକୁ ସକ୍ଷମ ହୋଇଛନ୍ତି ମସ୍କ । ୱାଲ୍ଷ୍ଟ୍ରିଟ ଜର୍ଣ୍ଣାଲ ରିପୋର୍ଟ ଅନୁସାରେ, ଏଲନ୍ ମସ୍କଙ୍କ ଜେନେରେଟିଭ ଏଆଇ କମ୍ପାନି ଏକ୍ସଏଆଇର ଭାଲ୍ୟୁଏସନ ଏବେ ୫୦ ବିଲିୟନ ଡଲାରକୁ ବୃଦ୍ଧି ହୋଇଛି । ଫଳରେ ଏହା ଏଲନ୍ ମସ୍କଙ୍କ ସମ୍ପତ୍ତିରେ ୧୩ ବିଲିୟନ ଡଲାର ଯୋଡ଼ିଛି ।
ଆମେରିକା ନିର୍ବାଚନ ଦିନ ଟେସଲା ସେୟାର ୪୦% ବୃଦ୍ଧି ହୋଇଥିଲା । ଟ୍ରମ୍ପଙ୍କ କାର୍ଯ୍ୟକାଳରେ ଟେସ୍ଲାର ଅଭିବୃଦ୍ଧିକୁ ନେଇ ବେଶ୍ ଆଶାବାଦୀ ରହିଛନ୍ତି ବିଶେଷଜ୍ଞ । ବିଶେଷ କରି ସ୍ୱଂୟଚାଳିତ ଯାନ କ୍ଷେତ୍ରରେ କମ୍ପାନି ଅଧିକ କାମ କରିବାକୁ ସକ୍ଷମ ହେବ ବୋଲି ଅନୁମାନ କରାଯାଇଛି । ଟ୍ରମ୍ପଙ୍କ ନିର୍ବାଚନ ପ୍ରଚାରରେ ଏଲନ ମସ୍କ ୧୦୦ ନିୟୁତ ଡଲାର ଖର୍ଚ୍ଚ କରିଥିଲେ । ବିଜୟ ପରେ ଟ୍ରମ୍ପ ଏଲନ ମସ୍କ ଏବଂ ବିବେକ ରାମାସ୍ୱାମୀଙ୍କୁ ଏକ ନୂଆ ବିଭାଗ ଡିପାର୍ଟମେଣ୍ଟ ଫର୍ ଗଭର୍ଣ୍ଣମେଣ୍ଟ ଏଫିସିଏନ୍ସିର ଦାୟିତ୍ୱ ଦେଇଛନ୍ତି । ଟ୍ରମ୍ପଙ୍କ ଶାସନକାଳ ଆରମ୍ଭ ପରେ ବିଭିନ୍ନ ନିୟମକୁ ବ୍ୟବସ୍ଥିତ କରାଯିବା ଯୋଗୁ ଏହାର ଲାଭ ଟେସ୍ଲା ବିଶେଷ ଭାବେ ପାଇବ ବୋଲି ଆଶା କରାଯାଏ । ବର୍ତ୍ତମାନର ନିୟାମକ ଆହ୍ୱାନ ମଧ୍ୟରେ କମ୍ପାନି ସେଲ୍ଫ ଡ୍ରାଇଭିଂ ଟେକ୍ନୋଲୋଜି ଉପରେ ବିଶେଷ ଧ୍ୟାନ ଦେବାକୁ ସକ୍ଷମ ହୋଇନି । ଯାହା ଆଗାମୀ ଦିନରେ ତ୍ୱରାନ୍ୱିତ ହେବାର ଢ଼େର ସମ୍ଭାବନା ରହିଛି ।
ସେହିଭଳି ସ୍ପେସ୍ଏକ୍ସର ପରବର୍ତ୍ତୀ ପର୍ଯ୍ୟାୟ ପାଣ୍ଠି ସଂଗ୍ରହ କାର୍ଯ୍ୟକ୍ରମକୁ ନେଇ ଏବେ ଜୋରଦାର ଚର୍ଚ୍ଚା ଜାରି ରହିଛି । ଏହା ଦ୍ୱାରା କମ୍ପାନିର ଭାଲ୍ୟୁ ୨୫୦ ବିଲିୟନ ଡଲାରକୁ ବୃଦ୍ଧି ପାଇପାରେ । ଏହା ମସ୍କଙ୍କ ସମ୍ପତ୍ତିକୁ ଅତିରିକ୍ତ ୧୮ ବିଲିୟନ ଡଲାର ବଢ଼ାଇପାରେ । ସ୍ପେସ୍ଏକ୍ସରେ ଏଲନ ମସ୍କଙ୍କର ୪୨% ମାଲିକାନା ରହିଛି । ଏହି ଫାର୍ମର ଭାଲ୍ୟୁ ଜୁନ୍ରେ ୨୧୦ ବିଲିୟନ ଡଲାର ରହିଥିଲା । ଏହାବାଦ ସେ ଅନ୍ୟ କମ୍ପାନିରେ ମଧ୍ୟ ନିବେଶ କରିଛନ୍ତି । ଏହା ମଧ୍ୟରେ ନ୍ୟୁରାଲିଙ୍କ ଏବଂ ଏକ୍ସ ରହିଛି ।
