ନୂଆଦିଲ୍ଲୀ,୦୧/୦୪: କର୍ମଚାରୀ ଭବିଷ୍ୟନିଧି ପାଣ୍ଠି ସଙ୍ଗଠନ (ଇପିଏଫ୍ଓ)ଭବିଷ୍ୟନିଧି ଆକାଉଣ୍ଟରୁ ଅଟୋ ସେଟଲ୍ମେଣ୍ଟ ଅଫ୍ ଆଡ୍ଭାନ୍ସ କ୍ଲେମ(ଏଏସ୍ଏସି) ସୀମାକୁ ୧ ଲକ୍ଷ ଟଙ୍କାରୁ ୫ ଲକ୍ଷ ଟଙ୍କାକୁ ବୃଦ୍ଧି ସଂକ୍ରାନ୍ତ ପ୍ରସ୍ତାବକୁ ମଞ୍ଜୁରୀ ଦେଇଛି ।
ଏଏନ୍ଆଇ ରିପୋର୍ଟ ମୁତାବକ, ଶ୍ରମ ଏବଂ ରୋଜଗାର ମନ୍ତ୍ରଣାଳୟ ସଚିବ ସୁମିତ୍ରା ଡାବରା ୨୮ ମାର୍ଚ୍ଚରେ ଶ୍ରୀନଗରରେ ଅନୁଷ୍ଠିତ ଇପିଏଫ୍ଓର କର୍ମଚାରୀ ସମିତି (ଇସି)ର ୧୧୩ ତମ ବୈଠକରେ ଏହି ପ୍ରସ୍ତାବ ପାସ୍ କରିଛନ୍ତି । ପ୍ରସ୍ତାବକୁ ଇପିଏଫ୍ଓର ସର୍ବୋଚ୍ଚ ନୀତି ନିର୍ଦ୍ଧାରକ ସଂସ୍ଥା ସେଣ୍ଟ୍ରାଲ ବୋର୍ଡ ଟ୍ରଷ୍ଟି (ସିବିଟି) ମଞ୍ଜୁରୀ ମିଳିବା ପରେ କର୍ମଚାରୀ ବିନା ମାନୁଆଲ ଯାଞ୍ଚରେ ପିଏଫ୍ ଆକାଉଣ୍ଟରୁ ୫ଲକ୍ଷ ଟଙ୍କା ଯାଏ ଉଠାଣ କରିପାରିବେ ।
ବର୍ତ୍ତମାନ ଇପିଏଫ୍ଓ ଉପଭୋକ୍ତା ୧ ଲକ୍ଷ ଟଙ୍କା ଯାଏ ପିଏଫ୍ ଅଟୋକ୍ଲେମ କରିପାରୁଛନ୍ତି । ଏହା ଠାରୁ ଅଧିକ ମୂଲ୍ୟର ରାଶି ଉଠାଣ କ୍ଷେତ୍ରରେ ଇପିଏଫ୍ଓ ଅଧିକାରୀଙ୍କ ଦ୍ୱାରା ମାନୁଆଲ ଯାଞ୍ଚର ଆବଶ୍ୟକତା ହୋଇଥାଏ । ନୂଆ ପ୍ରସ୍ତାବ ପରେ ଅଟୋ କ୍ଲେମ୍ ଲିମିଟ ୫ ଗୁଣା ବଢ଼ି ୫ ଲକ୍ଷ ଟଙ୍କା ହେବ ।
ଏହା ପୂର୍ବରୁ ୨୬ ମାର୍ଚ୍ଚରେ ସୁମିତ୍ରା ଡାବରା କହିଥିଲେ, ଇପିଏଫ୍ଓ ସଦସ୍ୟ ଶୀଘ୍ର ୟୁପିଆଇ ଏବଂ ଏଟିଏମ୍ରେ ପିଏଫ୍ ଅର୍ଥ ଉଠାଣ କରିପାରିବେ । ଏହାର ସୀମା ୧ ଲକ୍ଷ ଟଙ୍କା ଯାଏ ରହିବ । ଚଳିତ ବର୍ଷ ମେ’ ଶେଷ କିମ୍ବା ଜୁନ ଆରମ୍ଭରେ ଏହି ସେବା ଆରମ୍ଭ ହେବାର ଢ଼େର ସମ୍ଭାବନା ରହିଛି ।
