ପାଲଲହଡ଼ା, ୨୯/୦୫ : ନକଲି ଜନସେବା କେନ୍ଦ୍ର ଖୋଲି ଗରିବ ନିଃସହାୟ ଲୋକଙ୍କ ଠାରୁ ଲକ୍ଷାଧିକ ଟଙ୍କାର ଲୁଟ୍। ବାରମ୍ବାର ଅଭିଯୋଗ ସତ୍ତ୍ଵେ ନକଲି ଜନସେବା କେନ୍ଦ୍ର ଖୋଲିଥିବା ମାଲିକଙ୍କ ଉପରେ ହେଉନି କାର୍ଯ୍ୟାନୁଷ୍ଠାନ। ବିଭିନ୍ନ ପଞ୍ଚାୟତରେ ନକଲି ଆଇଡି ଖୋଲି ଆଧାର କାର୍ଡ ଜରିଆରେ ଟଙ୍କା ନେଣଦେଣ ସହିତ ଶିଶୁମାନଙ୍କ ନୂଆ ଆଧାରକାର୍ଡ କରିବା, ଜନ୍ମ ତାରିଖ ଓ ବ୍ୟାଙ୍କ ଆକାଉଣ୍ଟରେ ମୋବାଇଲ ନଂ ସଂଯୋଗ ଆଦି କରିବା ପାଇଁ ଟିପ ଚିହ୍ନ ନେଇ ଗରିବ ଆଦିବାସୀଙ୍କ ଠାରୁ ଲୁଟୁଛନ୍ତି ଟଙ୍କା। ଅନୁଗୁଳ ଜିଲ୍ଲା ପାଲଲହଡ଼ା ଥାନା ପେଚାମୁଣ୍ଡି ପଞ୍ଚାୟତ ଶିମିଳିପାଳ ଗ୍ରାମରୁ ଆସିଛି ଏଭଳି ସାଙ୍ଘାତିକ ଅଭିଯୋଗ।
ସୂଚନାନୁଯାୟୀ, ପାଲଲହଡ଼ା ଥାନା ପେଚାମୁଣ୍ଡି ପଞ୍ଚାୟତ ଶିମିଳିପାଳ ଗ୍ରାମର କୁନି ମହାନ୍ତି ମାର୍ଚ୍ଚ ୭ ତାରିଖ ଦିନ ପେଚାମୁଣ୍ଡି ଗ୍ରାମରେ ଅଶ୍ୱିନୀ ପଲେଇ ଖୋଲିଥିବା ଗ୍ରାହକ ସେବା କେନ୍ଦ୍ରରେ ପିଏନବି ଜମା ଖାତାରେ ମୋବାଇଲ ନଂ ସଂଯୋଗ କରିବାକୁ ଯାଇଥିଲେ। ମହିଳାଙ୍କ ଟିପ ଚିହ୍ନ ନେଇ ସଂଯୋଗ ହୋଇଯିବା କହି ତାଙ୍କୁ ଘରକୁ ପଠାଇ ଦେଇଥିଲେ। ଚଳିତ ମାସ ୮ ତାରିଖରେ ବ୍ୟାଙ୍କରେ ନିଜ ଆକାଉଣ୍ଟ ଚେକ୍ କରିବାରୁ ୟୁପିଆଇ ମାଧ୍ୟମରେ ପର୍ଯ୍ୟାୟ କ୍ରମେ ଭିନ୍ନ ଭିନ୍ନ ଆକାଉଣ୍ଟକୁ ୯୮ ହଜାର ୯ ଶହ ଟଙ୍କା ପଠାଯାଇଥିବା ଜାଣିବାକୁ ପାଇଥିଲେ। ଏନେଇ ସେ ପାଲଲହଡ଼ା ଥାନାରେ ସମ୍ପୃକ୍ତ ଜନସେବା କେନ୍ଦ୍ର ମାଲିକ ଅଶ୍ୱିନୀ ପଲେଇଙ୍କ ବିରୋଧରେ ଅଭିଯୋଗ କରିଥିଲେ। ଏନେଇ ପୁଲିସ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନହେବାରୁ ମହିଳା ଜଣଙ୍କ ପୁନର୍ବାର ୨୫ ତାରିଖରେ ଲିଖିତ ଅଭିଯୋଗ କରିଥିଲେ।
ଅନ୍ୟପଟେ ବ୍ୟାଙ୍କରେ କୁନି ମହାନ୍ତି ଏଫଆଇଆର କପି ମାଗିଥିଲେ। ପାଲଲହଡ଼ା ଥାନା ପକ୍ଷରୁ ଏଫଆଇଆର କପି ଦେବା ବଦଳରେ ୮ ତାରିଖରେ ହୋଇଥିବା ଏତଲାର ଜିଡି କପି ନମ୍ଵର ଦେଇଥିଲେ। ହେଲେ ବ୍ୟାଙ୍କ ଜିଡି କପି ନମ୍ଵର ଗ୍ରାହଣ କରିନଥିଲା। ଏଫଆଇଆର କପି ନହେଲେ ଆମେ କିଛି ପଦକ୍ଷେପ ନେଇପାରିବୁନି ବୋଲି କହି ଫେରାଇ ଦେଇଥିଲେ। ପନିପରିବା ଚାଷ କରି ସଞ୍ଚିତ ଅର୍ଥ ଜନସେବା କେନ୍ଦ୍ର ଲୁଟି ନେଇଥିବା ବେଳେ ବ୍ୟାଙ୍କ କର୍ତ୍ତୃପକ୍ଷ କାର୍ଯ୍ୟାନୁଷ୍ଠାନ ନନେବାରୁ କୁନି ଏବେ ଭାଙ୍ଗି ପଡିଛନ୍ତି। ବେଆଇନ ଭାବେ ଛତୁ ଫୁଟିଲା ଭଳି ଖୋଲିଥିବା ଜନସେବା କେନ୍ଦ୍ର ବିରୋଧରେ କଣ କାର୍ଯ୍ୟାନୁଷ୍ଠାନ ହେଉଛି ତାହା ଦେଖିବାକୁ ବାକି ରହିଲା।
