ଭଦ୍ରକ, ୧୯/୧୧ : ଗାଈଗୋରୁଙ୍କ ପାଇଁ ବିଲରେ ଲାଗିଥିଲା ଝଟ୍କା ମେସିନ୍। ବିଦ୍ୟୁତ୍ ତାର ଲାଗି ଚାଷୀଙ୍କ ମୃତ୍ୟୁ ହୋଇଥିବା ଅଭିଯୋଗ। ଭଦ୍ରକ ଜିଲ୍ଲା ଧୁସୂରୀ ଥାନା ଅଧିନ କୁରୁଆ ଗ୍ରାମରେ ଏଭଳି ଘଟଣା ଘଟିଛି। ମୃତକ ଜଣଙ୍କ ହେଉଛନ୍ତି ବୁଦ୍ଧିରାମ ବେହେରା। ଏହି ଘଟଣାରେ ପୋଲିସ ଜଣଙ୍କୁ ଅଟକ ରଖିଛି।
ସୂଚନାନୁଯାୟୀ, ଧୁସୂରୀ ଥାନା ଅଧିନ କୁରୁଆ ଗ୍ରାମର ବୁଦ୍ଧିରାମ ବେହେରା ସୋମବାର ସକାଳେ ବିଲ ଦେଖିବାକୁ ଯାଇଥିଲେ। ତାଙ୍କ ପାଖ ବିଲରେ ଜଣେ ବ୍ୟକ୍ତି ଝଟ୍କା ମେସିନ ଲଗାଇଥିଲେ। ଭୁଲ୍ବଶତଃ ବୁଦ୍ଧିରାମ ଏହି ବିଦ୍ୟୁତ ତାର ସଂସ୍ପର୍ଶରେ ଆସିଥିଲେ। ଦୀର୍ଘ ସମୟ ଧରି ସେ ଘରକୁ ନଫେରିବାରୁ ଗାଁ ଲୋକେ ଖୋଜାଖୋଜି କରିଥିଲେ। ରାତିରେ ବୁଦ୍ଧିରାମ ବିଲରେ ପଡିଥିବା ଦେଖିବାକୁ ପାଇଥିଲେ। ତାଙ୍କୁ ସଙ୍ଗେସଙ୍ଗେ ଭଦ୍ରକ ମେଡିକାଲ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏନେଇ ବୁଦ୍ଧିରାମଙ୍କ ପୁଅ ଧୁସୂରୀ ଥାନାରେ ଅଭିଯୋଗ କରିଥିଲେ। ବିଲରେ ଝଟ୍କା ମେସିନ ଲଗାଇବା ଅଭିଯୋଗରେ ପୋଲିସ ଜଣଙ୍କୁ ଅଟକ ରଖିଛି।
