ନୂଆଦିଲ୍ଲୀ,୦୪/୦୫: ଜମ୍ମୁ-କାଶ୍ମୀରର ପହଲଗାମ୍ରେ ହୋଇଥିବା ଆତଙ୍କୀ ଆକ୍ରମଣ ମାମଲାରେ ବୟାନବାଜି ଜାରି ରହିଛି । ଇତିମଧ୍ୟରେ ପୂର୍ବତନ ମୁଖ୍ୟମନ୍ତ୍ରୀ ତଥା ନ୍ୟାସନାଲ କନ୍ଫରେନ୍ସ ଅଧ୍ୟକ୍ଷ ଫାରୁକ୍ ଅବଦୁଲ୍ଲା ଶନିବାର ପହଲଗାମ୍ ଗସ୍ତ କରି ପର୍ଯ୍ୟଟକଙ୍କୁ ଭେଟିଛନ୍ତି । ଏହାପରେ ସେ କହିଛନ୍ତି, ଯେଉଁ ଆତଙ୍କୀମାନେ ଏଭଳି ବର୍ବର କାଣ୍ଡ କରି ଭୟର ପ୍ରସାର କରିବାକୁ ଚାହୁଁଥିଲେ ସେମାନେ ହାରିଯାଇଛନ୍ତି । ଆମେ ଭୟ କରିବୁ ନାହୁଁ ବୋଲି ଆଜି ପ୍ରମାଣିତ ହୋଇଯାଇଛି ।
ସେହିପରି କାଶ୍ମୀର ସବୁବେଳେ ଭାରତର ଅଂଶ ଥିଲା ଓ ଆଗକୁ ମଧ୍ୟ ରହିବ । ଲୋକେ ଆତଙ୍କର ଅନ୍ତ ହେବାକୁ ଚାହୁଁଛନ୍ତି । ଆମେ ଦୀର୍ଘ ୩୫ ବର୍ଷ ହେଲା ଆତଙ୍କବାଦର ସାମ୍ନା କରିଆସୁଛୁ । ଏଭଳିକ୍ଷେତ୍ରରେ ଆମେ ଉନ୍ନତି, ଆଗକୁ ବଢି଼ବାକୁ ଚାହୁଁଛୁ । ଦିନେ ନା ଦିନେ ଆମେ ସୁପରପାୱାର ହେବୁ ବୋଲି ସେ ପ୍ରକାଶ କରିଛନ୍ତି । ଏହି ନରସଂହାରକୁ ନିନ୍ଦା କରିବା ସହିତ ଆକ୍ରମଣକାରୀଙ୍କୁ ସ୍ଥାନୀୟ ଲୋକଙ୍କ ସମର୍ଥନ ନେଇ ସେ ଅଭିଯୋଗ ଆଣିଛନ୍ତି । ଅବଦୁଲ୍ଲାଙ୍କ ଅନୁସାରେ, ପହଲଗାମ୍ ଆତଙ୍କୀ ଆକ୍ରମଣ ସ୍ଥାନୀୟ ଲୋକଙ୍କ ସମର୍ଥନ ବିନା ହୋଇପାରିନଥାନ୍ତା । କାରଣ ଆତଙ୍କବାଦୀ ସେଠାକୁ କେମିତି ଆସିଲେ ତାହା ଆଜି ମଧ୍ୟ ଏକ ପ୍ରଶ୍ନ । କୌଣସି ସ୍ଥାନୀୟ ବ୍ୟକ୍ତି ନିଶ୍ଚିତ ଭାବେ ସେମାନଙ୍କୁ ସମର୍ଥନ କରିଛନ୍ତି ।
ସେହିପରି ଆକ୍ରମଣରେ ପ୍ରାଣ ହରାଇଥିବା ଘୋଡ଼ା ବାଲା ଆଦିଲ ହୁସେନଙ୍କ ଘରକୁ ଯାଇ ଅବଦୁଲ୍ଲା ତାଙ୍କ ପରିବାରକୁ ସାକ୍ଷାତ ମଧ୍ୟ କରିଛନ୍ତି । ଏହି ସମୟରେ ସେ ଆଦିଲଙ୍କ କାର୍ଯ୍ୟକୁ ମାନବିକତା ଓ କାଶ୍ମୀରିୟତ୍ ବୋଲି ଦର୍ଶାଇଥିଲେ । ତେବେ ଅବଦୁଲ୍ଲାଙ୍କର ଏଭଳି ବୟାନକୁ ପୂର୍ବତନ ମୁଖ୍ୟମନ୍ତ୍ରୀ ମେହବୁବା ମୁଫ୍ତି କଡ଼ା ସମାଲୋଚନା କରିଛନ୍ତି । ସେ ଏକ୍ସରେ ଲେଖିଛନ୍ତି, ଫାରୁକ୍ ଅବଦୁଲ୍ଲାଙ୍କର ଏଭଳି ବୟାନ ଦେଶର ଅନ୍ୟ ଅଞ୍ଚଳରେ ରହୁଥିବା କାଶ୍ମୀରି ଲୋକଙ୍କ ଲାଗି ବିପଦ ସାଜିପାରେ । ଏହାଦ୍ୱାରା କିଛି ଟିଭି ଚ୍ୟାନେଲକୁ କାଶ୍ମୀରି ଓ ମୁସଲିମମାନଙ୍କୁ ବଦନାମ କରିବାର ସୁଯୋଗ ମିଳିଯିବ । ସେ ଜଣେ ବରିଷ୍ଠ ନେତା ଓ କାଶ୍ମୀରି ହୋଇଥିବାରୁ ଏଭଳି ବୟାନ ଦେବାରୁ ବିରତ ରହିବା ଆବଶ୍ୟକ । ଯାହାକି ଲୋକଙ୍କ ମଧ୍ୟରେ ବିଭାଜନ ସୃଷ୍ଟି କରିବ । ଏହାପରେ ଫାରୁକ୍ ଅବଦୁଲ୍ଲା କହିଛନ୍ତି, ସେ ମେହବୁବାଙ୍କ ସବୁ କଥାର ଜବାବ ଦେବେନାହିଁ । ମେହବୁବା ଆତଙ୍କବାଦୀଙ୍କ ଘରକୁ ଯାଉଥିଲେ । ତେଣୁ ସେ ଏଥିନେଇ ଜବାବ ରଖିବା ଆବଶ୍ୟକ ।
