ବାତୁମି ୨୮/୦୭: ଭାରତୀୟ ଡବ୍ଲ୍ୟୁଜିଏମ୍ କୋନେରୁ ହମ୍ପି ଓ ଆଇଏମ୍ ଦିବ୍ୟା ଦେଶମୁଖଙ୍କ ମଧ୍ୟରେ ଚାଲିଥିବା ଫିଡେ ମହିଳା ଚେସ୍ ବିଶ୍ୱକପ୍ର ଫାଇନାଲ୍ ମୁକାବିଲା ସଂଘର୍ଷପୂର୍ଣ୍ଣ ହୋଇଛି । ରବିବାର ଦ୍ୱିତୀୟ କ୍ଲାସିକାଲ ଗେମ୍ ଡ୍ର’ ହେବା ଫଳରେ ସ୍ଥିତି ୧-୧ରେ ବରାବର ରହିଛି । ଆଜି ଟାଇବ୍ରେକରେ ଫଳାଫଳ ନିର୍ଣ୍ଣୟ ହେବ । ଟାଇବ୍ରେକ୍ରେ ୨ଟି ର୍ୟାପିଡ୍ ଗେମ୍ (୧୦ମିନିଟ୍ ଲେଖାଏଁ) ଖେଳାଯିବ । ଯଦି ମ୍ୟାଚ୍ ଟାଇ ରହେ, ତାହେଲେ ଆଉ ୨ଟି ର୍ୟାପିଡ୍ ଗେମ୍ (୫ମିନିଟ୍ ଲେଖାଏଁ) ଅନୁଷ୍ଠିତ ହେବ । ଏଥିରେ ଫଳାଫଳ ନବାହାରିଲେ ବ୍ଲିଜ୍ରେ ୨ଟି ଗେମ୍ (୩ ମିନିଟ୍ ଲେଖାଏଁ) ଖେଳାଯିବ । ଯଦି ମ୍ୟାଚ୍ ଅମୀମାଂସିତ ରହେ, ଫଳାଫଳ ବାହାରିବା ପର୍ଯ୍ୟନ୍ତ ବ୍ଲିଜ୍ ଗେମ୍ ଜାରି ରହିବ ।
ଦୁଇ ଭାରତୀୟ ହମ୍ପି ଓ ଦିବ୍ୟାଙ୍କ ମଧ୍ୟରେ ଟାଇଟଲ୍ ଲଢ଼େଇର ପ୍ରଥମ ଗେମ୍ ଡ୍ର’ ରହିଥିଲା । ଆଜି ଦ୍ୱିତୀୟ କ୍ଲାସିକାଲ ଗେମ୍ ଖେଳାଯାଇଥିଲା । ହମ୍ପି ଧଳା ଏବଂ ଦିବ୍ୟା କଳା ଗୋଟିରେ ଖେଳିଥିଲେ । ପ୍ରତି ଗୋଟି ଚାଳନା ଉପରେ ସମସ୍ତଙ୍କ ନଜର ରହିଥିଲା । ଏକଦା ଅଧିକ ସମୟ ଅପଚୟ କରି ହମ୍ପି ଅଡ଼ୁଆରେ ପଡ଼ିଥିଲେ । ଦିବ୍ୟା ନିକଟରେ ଯଥେଷ୍ଟ ସମୟ ରହିଥିବାରୁ ସେ ବାଜିମାତ୍ କରିବା ଆଶା କରାଯାଉଥିଲା । ମାତ୍ର ହମ୍ପି ଚତୁରତାର ସହ ଗୋଟି ଚାଳନା କରିଥିଲେ । ୩୧ତମ ଗୋଟି ଚାଳନା ସୁଦ୍ଧା ଏକାଧିକ ଥର ପୂର୍ବ ଗୋଟି ଚାଳନାରେ ପୁନଃରାବୃତ୍ତି ହୋଇଥିଲା । ଫଳରେ ୩୪ତମ ଗୋଟି ଚାଳନା ପରେ ଉଭୟ ଶେଷରେ ପଏଣ୍ଟ ଭାଗ କରିବାକୁ ନିଷ୍ପତ୍ତି ନେଇଥିଲେ ।
ଝୋନଗୀ ଜିତିଲେ ବ୍ରୋଞ୍ଜ
ତୃତୀୟ/ଚତୁର୍ଥ ସ୍ଥାନ ପାଇଁ ମ୍ୟାଚ୍ରେ ଚୀନର ଟାନ୍ ଝୋନଗୀ ୧.୫-୦.୫ରେ ନିଜ ଦେଶର ଲି ଟିଙ୍ଗଜିଙ୍କୁ ପରାସ୍ତ କରିଥିଲେ । ପ୍ରଥମ କ୍ଲାସିକାଲ ଗେମ୍ ଡ୍ର’ ରହିବା ପରେ ଆଜି ଦ୍ୱିତୀୟ ଗେମ୍ରେ ଝୋନଗୀ ବିଜୟ ହାସଲ କରିଥିଲେ । ଚେସ୍ ବିଶ୍ୱକପ୍ରେ ଏହା ତାଙ୍କର ଦ୍ୱିତୀୟ ବ୍ରୋଞ୍ଜ ପଦକ । ପ୍ରଥମ ସଂସ୍କରଣରେ ମଧ୍ୟ ସେ ବ୍ରୋଞ୍ଜ ଜିତିଥିଲେ ।
