ଧର୍ମଶାଳା, ୯/୬ : ଯାଜପୁର ଜିଲ୍ଲା ଜେନାପୁର ଥାନା ଅନ୍ତର୍ଗତ ୫୩ ନମ୍ବର ଜାତୀୟ ରାଜପଥ ନିକଟସ୍ଥ ବରଡ଼ା ଛକଠାରେ ଥିବା ମା' ମଙ୍ଗଳା ବସ୍ତ୍ରାଳୟରେ ଅଗ୍ନିକାଣ୍ଡ। ଜଳିଗଲା ଲକ୍ଷାଧିକ ଟଙ୍କାର ଜିନିଷପତ୍ର। ରବିବାର ରାତି ପ୍ରାୟ ସାଢେ ୧୦ଟା ବେଳେ ବସ୍ତ୍ରାଳୟରେ ନିଆଁ ଲାଗିଥିବା ସୂଚନା ମିଳିଛି। ଖବର ପାଇ ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି।
ସୂଚନାନୁଯାୟୀ, ଜେନାପୁର ଥାନା ଅନ୍ତର୍ଗତ ବରଡ଼ା ଛକଠାରେ ସୁବାଶ ମିଶ୍ରଙ୍କ ଏକ ବସ୍ତ୍ରାଳୟ ରହିଛି। ସେ ରବିବାର ରାତି ସାଢେ ୯ଟା ବେଳେ ବେପାର ସାରି ଦୋକାନ ବନ୍ଦ କରି ନିଜ ଘର ଗଡ଼ମଧୁପୁରକୁ ଫେରିଥିଲେ। ହେଲେ ରାତି ପ୍ରାୟ ସାଢେ ୧୦ଟା ବେଳେ ବସ୍ତ୍ରାଳୟରେ ନିଆଁ ଲାଗିଯାଇଥିବା ନେଇ ସ୍ଥାନୀୟ ଲୋକେ ତାଙ୍କୁ ଫୋନ୍ କରିଥିଲେ। ସୁବାଶ ଛଡେଇଧରା ଅଗ୍ନିଶମ ବାହିନୀକୁ ଖବର ଦେଇଥିଲେ। ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ହେଲେ ସେତେବେଳକୁ ଦୋକାନରେ ଥିବା ଅଧାରୁ ଅଧିକ ବସ୍ତ୍ର ପୋଡ଼ି ଛାରଖାର ହୋଇଯାଇଥିଲା। ତେବେ ସୁବାଶ ଦୋକାନ ବନ୍ଦ କରିବା ବେଳେ କିଛି ଅସୁବିଧା ନଥିଲା। ସର୍ଟ ସର୍କିଟ୍ ଯୋଗୁଁ ଅଗ୍ନିକାଣ୍ଡ ଘଟିଥିବା ସନ୍ଦେହ କରାଯାଉଛି।
ଆଗକୁ ରଜ ଥିବାରୁ ସୁବାଶ ୫ ଲକ୍ଷରୁ ଉର୍ଦ୍ଧ୍ଵ ଟଙ୍କାର ମାଲ୍ ଆଣି ଦୋକାନରେ ସାଇତି ଥିଲେ। ଗତ ରବିବାର ଦିନ ୪୫ ହଜାର ଟଙ୍କାର ବେପାର ବି କରିଥିଲେ। ମହାଜନଙ୍କୁ ସୁଝିବାକୁ ଦୋକାନରେ ୩୦ ହଜାର ଟଙ୍କା ରଖିଥିଲେ। ଏବେ ସବୁକିଛି ଜଳିପୋଡ଼ି ଛାରଖାର ହୋଇଯାଇଛି। ଏନେଇ ସେ ନିକଟସ୍ଥ ଜେନାପୁର ଥାନାରେ ଲିଖିତ ଅଭିଯୋଗ କରିଛନ୍ତି।
