ମୁମ୍ବାଇ ୨୩/୦୬: ମୁମ୍ବାଇର ଗୋରେଗାଓଁ (ପୂର୍ବ) ସ୍ଥିତ ଫିଲ୍ମ ସିଟିରେ ଅଘଟଣ। ନିଆଁ ଲାଗି ଜଳିଗଲା ଏକ ଧାରାବାହିକର ସୁଟିଂ ସେଟ୍। ଘଟଣା ସ୍ଥଳରେ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଛି । କୌଣସି ମୃତାହତର ସୂଚନା ନାହିଁ।
ରିପୋର୍ଟ ଅନୁଯାୟୀ, ଲୋକପ୍ରିୟ ଧାରାବାହିକ ଅନୁପମାର ସୁଟିଂ ସେଟରେ ଅଗ୍ନିକାଣ୍ଡ ଘଟିଛି। ଏହି ସେଟ୍ଟି ଦାଦାସାହେବ ଫାଲକେ ଚିତ୍ରନଗରୀରେ ମରାଠୀ ବିଗ୍ ବସ୍ ସେଟ୍ ପଛରେ ରହିଥିଲା । ଏହି ଅଗ୍ନିକାଣ୍ଡ ସକାଳ ପ୍ରାୟ ୬:୧୦ ସମୟରେ ଘଟିଛି। ମୁମ୍ବାଇ ମ୍ୟୁନିସିପାଲ କର୍ପୋରେସନ (BMC) ଏହି ସୂଚନା ଦେଇଛି।
ଆଜି ସକାଳୁ ସେଟରେ ଅନୁପମାର ସୁଟିଂ ଆରମ୍ଭ ହେବାର ଥିଲା। କିନ୍ତୁ ତା ପୂର୍ବରୁ ସେଟରେ ନିଆଁ ଲାଗିଯାଇଥିଲା। ଏହି ସମୟରେ ସେଠାରେ କିଛି କର୍ମଚାରୀ ଏବଂ କ୍ରୁ ସଦସ୍ୟ ଉପସ୍ଥିତ ଥିଲେ। ନିଆଁର ପ୍ରକୋପ ଏତେ ଅଧିକ ଥିଲା ଯେ ଚାହୁଁ ଚାହୁଁ ସବୁକିଛି ଜଳି ଛାରରଖାର ହୋଇଯାଇଥିଲା। ଘଟଣା ସ୍ଥଳରେ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ। ତେବେ ପ୍ରାଥମିକ ତଦନ୍ତରୁ ସର୍ଟସର୍କିଟ ଯୋଗୁଁ ଅଗ୍ନିକାଣ୍ଡ ଘଟିଥିବା କୁହାଯାଉଛି । କିନ୍ତୁ ଏପର୍ଯ୍ୟନ୍ତ କୌଣସି ମୃତାହତର ସୂଚନା ନାହିଁ ।
