କେନ୍ଦୁଝର ସଦର,୫/୬(ଆପ୍ର) ; କେନ୍ଦୁଝର ଜିଲ୍ଲା ସଦର ବନାଞ୍ଚଳ ଅନ୍ତର୍ଗତ କେନ୍ଦୁଆ ବଡପଶି ମିତ୍ରଭାନୁ ବନରେ ନିଆଁ ଲାଗି ବହୁ ଗଛ ପୋଡିଯାଇଛି। ସ୍ଥାନୀୟ ଗ୍ରାମବାସୀ, ବନବିଭାଗ ଓ ଅଗ୍ନିଶମ ବାହିନୀ ମିଳିତ ଭାବେ ନିଆଁକୁ ଆୟତ୍ତ କରିଛନ୍ତି। ପ୍ରାୟ ଆଠ ଏକରୁ ଅଧିକ ସ୍ଥାନ ପୋଡ଼ିଯାଇଛି।
ମଧ୍ୟାହ୍ନରେ ମିତ୍ରଭାନୁ ବନରେ କେହି ଜଣେ ନିଆଁ ଲଗାଇ ଦେଇଥିଲା। ବନ ଭିତରେ ଗତ ଶରତ ଋତୁରେ ପ୍ରବଳ ମାତ୍ରାରେ କାଶୀ ଫୁଲ ଫୁଟିଥିଲା। ସେହି ସବୁ କାଶୀ ଶୁଖି ଯାଇ ରହିଥିଲା। ସେଥିରେ ନିଆଁ ଲାଗିଲା ମାତ୍ରେ ତୀବ୍ର ଭାବେ ନିଆଁ ଜଳିଥିଲା। ଖରାର ପ୍ରଖର ଯେତେ ବଢ଼ୁଥାଏ ନିଆଁ ପ୍ରଖର ମଧ୍ୟ ତୀବ୍ରତର ହୋଇ ଆଠରୁ ଦଶ ଫୁଟ ଉଚ୍ଚତାରେ ନିଆଁ ଜଳିଥିଲା।
ନିଆଁକୁ ଆୟତ୍ତ କରିବା ପାଇଁ ବନ ବିଭାଗ ନାକେଦମ୍ ହେବା ସଂଗେ ସ୍ଥାନୀୟ ଗ୍ରାମବାସୀ ସଦର ଅଗ୍ନିଶମ ବିଭାଗର ମିଳିତ ସହଯୋଗରେ ଆଠ ଘଣ୍ଟା ଧରି ଅକ୍ଲାନ୍ତ ପରିଶ୍ରମ ପରେ ନିଆଁ ଆୟତ୍ତ ହୋଇଥିଲା। ପ୍ରାୟ ପାଞ୍ଚ ହଜାରରୁ ଅଧିକ ସଂଖ୍ୟାରେ ଗଛକୁ ନିଆଁ ବାଜିଛି । ଗଛ ଗୁଡ଼ିକ ପ୍ରାୟ ପାଞ୍ଚ ବର୍ଷରୁ ଅଧିକ ହୋଇଥିବାରୁ ଘାସ ନିଆଁ ଦ୍ଵାରା ଗଛ ଗୁଡ଼ିକ ବେଶୀ ମାତ୍ରାରେ ପ୍ରଭାବିତ ହୋଇନଥିବ ବୋଲି ବନ ବିଭାଗ ପକ୍ଷରୁ କୁହାଯାଇଛି।
