ଲଣ୍ଡନ: ଉତ୍ତର ଆୟାରଲ୍ୟାଣ୍ଡର କାଉଣ୍ଟି ଫର୍ମାନାଘର ମାଗୁଆୟାରସବ୍ରିଜ ଗ୍ରାମରେ ବୁଧବାର ସକାଳେ ଏକ ଭୟଙ୍କର ଗୁଳିକାଣ୍ଡରେ ଦୁଇ ଶିଶୁ ଓ ଜଣେ ମହିଳାଙ୍କ ସମେତ ତିନି ଜଣଙ୍କର ମୃତ୍ୟୁ ହୋଇଛି, ଏବଂ ଜଣେ ପୁରୁଷ ଗୁରୁତର ଆହତ ହୋଇ ଚିକିତ୍ସାଧୀନ ଅଛନ୍ତି। ଏହି ଘଟଣା ଡ୍ରୁମୀର ରୋଡ଼ ଅଞ୍ଚଳରେ ଘଟିଥିବା ନେଇ ପୁଲିସ ସୂଚନା ଦେଇଛି।
ପୁଲିସ ସର୍ଭିସ ଅଫ ନର୍ଦର୍ନ ଆୟାରଲ୍ୟାଣ୍ଡ (ପିଏସଏନଆଇ) ଅନୁଯାୟୀ, ସକାଳ ୮:୨୧ରେ ଏକ ଜରୁରୀ କଲ ପାଇବା ପରେ ପୁଲିସ ଓ ଆମ୍ବୁଲାନ୍ସ ସେବା ଘଟଣାସ୍ଥଳରେ ପହଞ୍ଚିଥିଲେ। ଘଟଣାସ୍ଥଳରେ ଦୁଇ ଜଣଙ୍କୁ ମୃତ ଘୋଷଣା କରାଯାଇଥିଲା ଏବଂ ଦୁଇ ଜଣଙ୍କୁ ଗୁରୁତର ଆହତ ଅବସ୍ଥାରେ ହସ୍ପିଟାଲକୁ ନିଆଯାଇଥିଲା। ଜଣେ ଆହତଙ୍କୁ ବେଲଫାଷ୍ଟର ରୟାଲ ଭିକ୍ଟୋରିଆ ହସ୍ପିଟାଲକୁ ଏୟାର ଆମ୍ବୁଲାନ୍ସ ମାଧ୍ୟମରେ ଏବଂ ଅନ୍ୟ ଜଣଙ୍କୁ ସାଉଥ ୱେଷ୍ଟ ଆକ୍ୟୁଟ ହସ୍ପିଟାଲକୁ ନିଆଯାଇଥିଲା। ପରେ ହସ୍ପିଟାଲରେ ଆହତ ଜଣେ ଶିଶୁଙ୍କର ମୃତ୍ୟୁ ହୋଇଥିବା ଜଣାପଡ଼ିଛି।
ଏନେଇ ଫର୍ମାନଘର ଡିଷ୍ଟ୍ରିକ୍ଟ କମାଣ୍ଡର ସୁପରିଣ୍ଟେଣ୍ଡେଣ୍ଟ ରବର୍ଟ ମ୍ୟାକଗୋଆନ କହିଛନ୍ତି, “ଏହା ଏକ ହୃଦୟବିଦାରକ ଘଟଣା। ଏକ ଅପ୍ରତ୍ୟାଶୀତ ଘଟଣାକ୍ରମେ ଚାରି ଜଣ ବ୍ୟକ୍ତି ଗୁଳିବିଦ୍ଧ ହୋଇଥିଲେ ଏବଂ ସମସ୍ତେ ଗୋଟିଏ ପରିବାରର ଥିଲେ। ଆମେ ଏକ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଛୁ।” ପୁଲିସ ଜଣାଇଛି ଯେ ଏହି ଘଟଣାରେ ଅଧିକ କାହାର ସମ୍ପୃକ୍ତି ନାହିଁ ଏବଂ ଜନସାଧାରଣ ପାଇଁ କୌଣସି ବିପଦ ନାହିଁ।
ସ୍ଥାନୀୟ ବିଧାୟକ ଜେମା ଡୋଲାନ ଏହାକୁ ଏକ “ଘରୋଇ ଘଟଣା” ବୋଲି ବର୍ଣ୍ଣନା କରିଛନ୍ତି। ଡେମୋକ୍ରାଟିକ୍ ୟୁନିଅନିଷ୍ଟ ପାର୍ଟି (ଡିୟୁପି) ବିଧାୟକ ଡେବୋରା ଏରସ୍କିନ କହିଛନ୍ତି, “ଏହି ଘଟଣା ସମଗ୍ର ସମୁଦାୟକୁ ସ୍ତବ୍ଧ କରିଦେଇଛି। ମାଗୁଆୟାରସବ୍ରିଜ ଏକ ଶାନ୍ତ ଗ୍ରାମୀଣ ଅଞ୍ଚଳ, ଏବଂ ଏପରି ଘଟଣା ଏଠାରେ ଅପ୍ରତ୍ୟାଶିତ।” ସେ ଜନସାଧାରଣଙ୍କୁ ଘଟଣା ସମ୍ପର୍କରେ ଅଧିକ କଥା ନ କରିବାକୁ ଅନୁରୋଧ କରିଛନ୍ତି।
ମନ୍ତ୍ରୀ ମିଶେଲ ଓ’ନୀଲ ଏବଂ ପୂର୍ବତନ ମନ୍ତ୍ରୀ ଆର୍ଲୀନ ଫଷ୍ଟର ଏହି ଘଟଣାକୁ “ହୃଦୟବିଦାରକ” ଓ “ଭୟଙ୍କର” ବୋଲି ବର୍ଣ୍ଣନା କରି ଶୋକ ପ୍ରକାଶ କରିଛନ୍ତି। ସିନ ଫେନ ସାଂସଦ ପାଟ କୁଲେନ ମଧ୍ୟ ପୀଡ଼ିତ ପରିବାରଙ୍କ ପ୍ରତି ସମବେଦନା ଜଣାଇଛନ୍ତି।
ଘଟଣାସ୍ଥଳରେ ପୁଲିସ କର୍ଡନ କରାଯାଇଛି ଏବଂ ସ୍ଥାନୀୟ ଅଞ୍ଚଳରେ ଥିବା ରାସ୍ତାକୁ ବନ୍ଦ କରାଯାଇଛି। ଉତ୍ତର ଆୟାରଲ୍ୟାଣ୍ଡ ଆମ୍ବୁଲାନ୍ସ ସେବା ତିନୋଟି ଜରୁରୀ ଆମ୍ବୁଲାନ୍ସ, ଜଣେ ରାପିଡ୍ ରେସପନ୍ସ ପାରାମେଡିକ, ଦୁଇ ଆମ୍ବୁଲାନ୍ସ ଅଫିସର ଏବଂ ଜଣେ ଆମ୍ବୁଲାନ୍ସ ଡାକ୍ତରଙ୍କୁ ଘଟଣାସ୍ଥଳକୁ ପଠାଇଥିଲା।
ଏହି ଘଟଣା ସ୍ଥାନୀୟ ଅଞ୍ଚଳରେ ଗଭୀର ଶୋକ ଓ ଆତଙ୍କ ସୃଷ୍ଟି କରିଛି। ପୁଲିସ ତଦନ୍ତ ଜାରି ରଖିଛି ଏବଂ ଘଟଣାର ପୂର୍ଣ୍ଣ ତଥ୍ୟ ସାମ୍ନାକୁ ଆସିବା ପାଇଁ ଅପେକ୍ଷା କରାଯାଉଛି।
