ଫିରିଙ୍ଗିଆ,୧୫/୧୧ : ରାଜ୍ୟ ପୋଲିସ ମୁଖିଆଙ୍କ ନିର୍ଦେଶକ୍ରମେ ଏବଂ କନ୍ଧମାଳ ଜିଲ୍ଲା ଏସପି ହରିଶ ବିଶିଙ୍କ ପ୍ରତ୍ୟେକ୍ଷ ତତ୍ତ୍ବାବଧାନରେ ଜିଲ୍ଲାର ବିଭିନ୍ନ ଥାନା ପକ୍ଷରୁ ଜାରି ରହିଛି ଅପରେଶନ ନୀଳ ଜହର ବା ଗଞ୍ଜେଇ ଗଛ କଟା ଅଭିଯାନ I ଜିଲ୍ଲାରେ ସବୁବେଳେ ଏହି ଗଞ୍ଜେଇ କାରବାରକୁ ନେଇ ଚର୍ଚ୍ଚାରେ ରହି ଆସୁଥିବା ଗୋଛାପଡ଼ା ଓ ଫିରିଙ୍ଗିଆ ଥାନା ତରଫରୁ ଲଗାତର ଭାବେ ଏହି ଅପରେଶନ ନୀଳ ଜହର ଅଭିଯାନ ଜାରି ରଖାଯାଇଥିବାବେଳେ ଶୁକ୍ରବାର ଫିରିଙ୍ଗିଆ ଥାନା ପକ୍ଷରୁ ଏହି ଅଭିଯାନ ତୃତୀୟ ଦିନରେ ପହଁଚିଛି I 

ତୃତୀୟ ଦିନରେ ଥାନା ଅଧିକାରୀ ଗୋପୀନାଥ ପ୍ରଧାନଙ୍କ ନିର୍ଦେଶକ୍ରମେ ଥାନାରେ କାର୍ଯ୍ୟରତ ଏସଆଇ ଅଜୟ ସାହୁଙ୍କ ନେତୃତ୍ୱରେ ଥାନା ଅଧୀନରେ ଥିବା କାଶିନୀପଦର ପଞ୍ଚାୟତର ଭାଲୁର ଗାଁ, ଗୁଡ଼ଗାଁ ଓ ତଳପଡା ଗାଁ ପାଖରେ ଥିବା ଜଙ୍ଗଲ ଜମିମାନଙ୍କରେ ବେଆଇନ ଭାବେ ଚାଷ ହୋଇଥିବା ପ୍ରାୟ ୭୧ଲକ୍ଷ ତାଙ୍କର ଗଞ୍ଜେଇ ଗଛ ଗୁଡିକୁ କାଟି ନଷ୍ଟ କରିଦିଆଯାଇଛି I ତେବେ ଶୁକ୍ରବାର ଏହି ଅଭିଯାନରେ ଏସଆଇ ଅଜୟ ସାହୁଙ୍କ ସହ ଥାନାରେ କାର୍ଯ୍ୟରତ ସମସ୍ତ ହୋମଗାର୍ଡଙ୍କ ସହ ପ୍ରାୟ ୩୦ଜଣ ଶ୍ରମିକ ନିୟୋଜିତ ହୋଇଥିଲେ I ଏହାସହ ସୁରକ୍ଷା ଦୃଷ୍ଟିକୁ ଆଖି ଆଗରେ ରଖି ଦୁଇ ପ୍ଲାଟୁନ ପୋଲିସ ଫୋର୍ସ ମଧ୍ୟ ମୁତୟନ କରାଯାଇଥିଲା I ଅନ୍ୟପଟେ ଏହି ଗଞ୍ଜେଇ କଟାକୁ ନେଇ ଥାନାରେ ୨୩୯/୨୪ରେ ଏକ ମାମଲା ମଧ୍ୟ ରୁଜୁ କରାଯାଇଥିବା ସୂଚନା ଦେଇଛନ୍ତି ଥାନା ଅଧିକାରୀ ଗୋପୀନାଥ ପ୍ରଧାନ I