ଭୁବନେଶ୍ୱର,୧୪/୧୨: ହଂସପାଳ ଛକରେ ନିର୍ମାଣାଧୀନ ଫ୍ଲାଏଓଭର କାର୍ଯ୍ୟ ୨୦୨୫ ଜାନୁଆରୀ ସୁଦ୍ଧା ଶେଷ ହେବ । ଏଭଳି ଲକ୍ଷ୍ୟ ରଖିଛି ଜାତୀୟ ରାଜପଥ ପ୍ରାଧିକରଣ (ଏନ୍ଏଚ୍ଏଆଇ) ।
କଟକ-ଭୁବନେଶ୍ୱରକୁ ସଂଯୋଗ କରିଥିବା ୧୬ ନମ୍ବର ଜାତୀୟ ରାଜପଥର ହଂସପାଳଠାରେ ଫ୍ଲାଏଓଭର ନିର୍ମାଣ କାର୍ଯ୍ୟ ବିଳମ୍ବ ନେଇ ରାଜ୍ୟସଭାରେ ପ୍ରଶ୍ନ କରିଥିଲେ ବିଜେଡି ସାଂସଦ ସସ୍ମିତ ପାତ୍ର । ଏହାର ଉତ୍ତରରେ କେନ୍ଦ୍ର ସଡ଼କ ଓ ପରିବହନ ମନ୍ତ୍ରୀ ନୀତିନ ଗଡ଼କରୀ ସୂଚନା ଦେଇଛନ୍ତି, କୋଭିଡ ମହାମାରୀ ଓ ପରବର୍ତ୍ତୀ ସମୟରେ କିଛି ଘର ସ୍ଥାନାନ୍ତର ଏବଂ ଠିକା ସଂସ୍ଥା ଯୋଗୁ ଏହି ପ୍ରକଳ୍ପ କାମ ବିଳମ୍ବ ହୋଇଥିଲା । କାମ ଠିକ୍ ଭାବେ ନ କରିବାରୁ ଗତ ଜୁନ୍ରେ ପୂର୍ବ ଠିକା ସଂସ୍ଥାକୁ ବିଦା କରି ଆଉ ଥରେ ଟେଣ୍ଡର ଆହ୍ୱାନ କରି ନୂଆ ସଂସ୍ଥାକୁ ନିୟୋଜିତ କରାଯାଇଛି । ବକେୟା କାମ ୨୦୨୫ ଜାନୁଆରୀ ସୁଦ୍ଧା ସରିବ ବୋଲି ଆଶା ରହିଛି ।
ହଂସପାଳ ଫ୍ଲାଏଓଭର ୬ ଲେନ୍ ବିଶିଷ୍ଟ ହେଉଥିବା ବେଳେ ଏଥିରୁ ଗୋଟିଏ ଫାଳ ଖୋଲିଛି । କଟକ ପଟୁ ଆସୁଥିବା ଯାନବାହନ ହଂସପାଳରୁ ଫ୍ଲାଏଓଭର ଚଢ଼ି ସିଧା କୁଆଖାଇ ବ୍ରିଜ୍ ଉପରେ ପହଞ୍ଚୁଛନ୍ତି । ମାତ୍ର ଭୁବନେଶ୍ୱର ପଟୁ ଯାଉଥିବା ଯାନବାହନ ପାଇଁ ହଂସପାଳରେ ଫ୍ଲାଏଓଭର କାମ ସରିନାହିଁ । ଏଥିଯୋଗୁ ପ୍ରତିଦିନ ଟ୍ରାଫିକ ସମସ୍ୟା ସହ ଅଞ୍ଚଳରେ ସାଂଘାତିକ ଧୂଳି ଉଡ଼ୁଛି । ସ୍ଥାନୀୟ ଅଞ୍ଚଳବାସୀ ଓ ରାସ୍ତାରେ ଯାଉଥିବା ଲୋକେ ଟ୍ରାଫିକ ଯନ୍ତ୍ରଣା ସହ ଧୂଳିଧୂଆଁରେ ପ୍ରତିଦିନ ନାକେଦମ ହେଉଛନ୍ତି । ଏହି ଫ୍ଲାଏଓଭର କାମ ୨୦୨୦ରୁ ଆରମ୍ଭ ହୋଇଥିଲା ।
