ନୂଆଦିଲ୍ଲୀ ୧୨/୦୮: ଆର୍ଟିଫିସିଆଲ ଇଣ୍ଟେଲିଜେନ୍ସର ଉପଦେଶ ମାନିବା ଜଣେ ବ୍ୟକ୍ତିଙ୍କ ପାଇଁ ପ୍ରାଣଘାତକ ପ୍ରମାଣିତ ହୋଇଛି । ମୃତ୍ୟୁ ମୁହଁରୁ ସେ ଅଳ୍ପକେ ବର୍ତ୍ତିଛନ୍ତି । ସ୍ୱାସ୍ଥ୍ୟ କ୍ଷେତ୍ରରେ ମାର୍ଗଦର୍ଶନ ପାଇଁ ସେ ସର୍ବଦା ଏଆଇ ଉପରେ ଭରସା କରୁଥିଲେ । କିନ୍ତୁ ସେହି ଏଆଇର ଉପଦେଶ ତାଙ୍କୁ ଆଇସିୟୁ ବେଡ୍ରେ ପକାଇଦେଲା । ଲୁଣର ବିକଳ୍ପ କ’ଣ ବୋଲି ବ୍ୟକ୍ତି ଚାଟ୍ଜିପିଟିକୁ ପଚାରିଲେ । ଚାଟ୍ଜିପିଟିର ପରାମର୍ଶ ମଧ୍ୟରେ ସୋଡିୟମ୍ ବ୍ରୋମାଇଡ୍ ଥିଲା, ଯାହା ଏକ ବିଷାକ୍ତ ଯୌଗିକ । ସୋଡିୟମ୍ ବ୍ରୋମାଇଡ୍ ପରାମର୍ଶକୁ ବ୍ୟକ୍ତି ଗ୍ରହଣ କରିବା ପରେ ତାଙ୍କ ଜୀବନ ସଙ୍କଟାପନ୍ନ ହୋଇଗଲା ।
ୱାଶିଂଟନ୍ ବିଶ୍ୱବିଦ୍ୟାଳୟର ଡାକ୍ତରମାନେ ଏହି ମାମଲାକୁ ‘ଆନାଲ୍ସ ଅଫ୍ ଇଣ୍ଟରନାଲ୍ ମେଡିସିନ୍ସ: କ୍ଲିନିକାଲ କେସେସ୍’ରେ ସାମିଲ କରିଛନ୍ତି । ଏଥିରେ ସେମାନେ ସ୍ପଷ୍ଟ କରିଛନ୍ତି, ବ୍ୟକ୍ତି ଜଣକ ୩ ମାସ ଧରି ସୋଡିୟମ୍ ବ୍ରୋମାଇଡ୍ ସେବନ କରିଥିଲେ । କ୍ଲୋରାଇଡ୍ର ସୁରକ୍ଷିତ ବିକଳ୍ପ ସୋଡିୟମ୍ ବ୍ରୋମାଇଡ୍ ବୋଲି ତାଙ୍କୁ ଚାଟ୍ଜିପିଟି ସୂଚନା ଦେଇଥିଲା । ପୂର୍ବେ, ଅନିଦ୍ରା ଓ ଚିନ୍ତା ଭଳି ରୋଗର ଚିକିତ୍ସା ପାଇଁ ବ୍ରୋମାଇଡ୍ ଯୌଗିକକୁ ପ୍ରୟୋଗ କରାଯାଉଥିଲା । କିନ୍ତୁ ଅସଂଖ୍ୟ ପାଶ୍ୱର୍ପ୍ରତିକ୍ରିୟା ଯୋଗୁ ଏହାକୁ ବନ୍ଦ କରାଯାଇଥିଲା । ବର୍ତ୍ତମାନ ବ୍ରୋମାଇଡ୍ ମୁଖ୍ୟତଃ ପଶୁଚିକିତ୍ସା ଔଷଧ ଓ କିଛି ଔଦ୍ୟୋଗିକ ଉତ୍ପାଦରେ ଦେଖିବାକୁ ମିଳୁଛି ।
ଗତ ୩ ସପ୍ତାହ ହେଲା ବ୍ୟକ୍ତିଙ୍କର ହସ୍ପିଟାଲରେ ଚିକିତ୍ସା ଚାଲିଛି । ସୋଡିୟମ୍ ବ୍ରୋମାଇଡ୍ ସେବନ ପରେ ସେ ଅନେକ ଗମ୍ଭୀର ସ୍ୱାସ୍ଥ୍ୟ ସମସ୍ୟାର ସମ୍ମୁଖୀନ ହେଲେ । ତାଙ୍କଠାରେ ପାଗଳାମି ମଧ୍ୟ ଦେଖାଗଲା । ପଡ଼ୋଶୀ ତାଙ୍କୁ ବିଷ ଦେଇଥିବା ସେ ଆଶଙ୍କା କଲେ ଏବଂ ଧୀରେ ଧୀରେ ମାନସିକ ଭାରସାମ୍ୟ ହରାଇଲେ । ଏପରିକି ଶୋଷ ହେଲେ ବି ସେ ପାଣି ପିଇଲେ ନାହିଁ । ସ୍ଥିତି ଗମ୍ଭୀର ହେବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଗଲା । ଗୋଟିଏ ସପ୍ତାହ ଚିକିତ୍ସା ପରେ ସେ କଥା ହେବା ଅବସ୍ଥାକୁ ଫେରିଲେ ଏବଂ ନିଜ ସ୍ୱାସ୍ଥ୍ୟ ସମସ୍ୟାର କାରଣ ବର୍ଣ୍ଣନା କଲେ ।
ଯଦିଓ ଚାଟ୍ଜିପିଟି ସହ ବ୍ୟକ୍ତିଙ୍କର ଚାଟିଂ ଉପଲବ୍ଧ ନ ଥିଲା, ଡାକ୍ତର ସତ ଜାଣିବାକୁ ଚାଟ୍ଜିପିଟିକୁ ସମାନ ପ୍ରଶ୍ନ କଲେ । ତାହା ପୁନଃ ସୋଡିୟମ୍ ବ୍ରୋମାଇଡ୍ ପରାମର୍ଶ ଦେଲା । ଏହାର ସେବନ ମଣିଷ ପ୍ରତି କେତେ ବିପଦପୂର୍ଣ୍ଣ, ସେ ନେଇ କୌଣସି ଚେତାବନୀ ଏହା ଦେଲାନାହିଁ । ଏହି ଘଟଣା ପରେ ବିଶେଷଜ୍ଞମାନେ ସ୍ୱାସ୍ଥ୍ୟ ସମ୍ପର୍କିତ ଉପଦେଶ ପାଇଁ ଏଆଇର ଉପଯୋଗ ପ୍ରତି ଲୋକଙ୍କୁ ସଚେତନ କରାଇଛନ୍ତି । ଏଆଇ ଦେଉଥିବା ପରାମର୍ଶର ପାଶ୍ୱର୍ ପ୍ରତିକ୍ରିୟା ବିଷୟରେ ସର୍ବଦା ସୂଚନା ଦେଇନଥାଏ ବୋଲି ସେମାନେ ସ୍ପଷ୍ଟ କରିଛନ୍ତି । ଜଟିଳ ସ୍ୱାସ୍ଥ୍ୟ ସମସ୍ୟା ପାଇଁ ଚିକିତ୍ସା ବିଶେଷଜ୍ଞଙ୍କ ପରାମର୍ଶ ଅନିବାର୍ଯ୍ୟ ବୋଲି ମଧ୍ୟ କହିଛନ୍ତି ।
