- ମିଆଁମାରରୁ ଉଦ୍ଧାର ହେଲେ ୬୦ ଭାରତୀୟ
- ଚାକିରି ପ୍ରଲୋଭନ ଆଳରେ ଯାଇଥିଲେ ଥାଇଲାଣ୍ଡ-ମିଆଁମାର
- ସାଇବର ଦାସତ୍ବ ଗ୍ରହଣ କରିବାକୁ ବାଧ୍ୟ ହେଉଥିଲେ
- ୫ ଜଣ ଫ୍ରଡ୍ ଏଜେଣ୍ଟକୁ କରାଯାଇଛି ଗିରଫ
ନୂଆଦିଲ୍ଲୀ,୧୧/୦୪: ସାଇବର ଅଧିକାରୀମାନେ ମିଆଁମାରରୁ ୬୦ ଜଣ ଭାରତୀୟ ନାଗରିକଙ୍କୁ ଉଦ୍ଧାର କରିଛନ୍ତି, ଯେଉଁଠାରେ ସେମାନଙ୍କୁ ବନ୍ଦୀ କରି ରଖାଯାଇଥିଲା ଏବଂ ଲାଭଜନକ ଚାକିରି ପ୍ରସ୍ତାବ ଦେବା ବାହାନାରେ ସାଇବର ଅପରାଧରେ ସାମିଲ ହେବାକୁ ଏବଂ ତାସତ୍ବ ପାଇଁ ବାଧ୍ୟ କରାଯାଇଥିଲା। ଅଧିକାରୀମାନେ ସୂଚନା ଦେଇଛନ୍ତି ଯେ ମହାରାଷ୍ଟ୍ର ପୋଲିସର ସାଇବର ଶାଖା ଏହି ମାମଲାରେ ସମ୍ପୃକ୍ତ ଜଣେ ବିଦେଶୀ ନାଗରିକଙ୍କ ସମେତ ପାଞ୍ଚ ଜଣ ଏଜେଣ୍ଟଙ୍କୁ ମଧ୍ୟ ଗିରଫ କରାଯାଇଛି। ତଦନ୍ତରୁ ଜଣାପଡିଛି ଯେ ପୀଡ଼ିତମାନଙ୍କୁ ଥାଇଲ୍ୟାଣ୍ଡରୁ ମିଆଁମାର ନିଆଯାଇଥିଲା ଏବଂ ତା'ପରେ ଡିଜିଟାଲ ଗିରଫଦାରୀ ଏବଂ ଅନ୍ୟାନ୍ୟ ନିବେଶ ଠକେଇ କରିବାକୁ ବାଧ୍ୟ କରାଯାଇଥିଲା।
ମାନବ ତସ୍କରମାନେ ସୋସିଆଲ ମିଡିଆ ପ୍ଲାଟଫର୍ମ ମାଧ୍ୟମରେ ପୀଡ଼ିତମାନଙ୍କୁ ଟାର୍ଗେଟ କରୁଥିଲେ ଏବଂ ଥାଇଲ୍ୟାଣ୍ଡ ଏବଂ ଅନ୍ୟାନ୍ୟ ପୂର୍ବ ଏସୀୟ ଦେଶରେ ଉଚ୍ଚ ଦରମାପ୍ରାପ୍ତ ଚାକିରିର ପ୍ରତିଶ୍ରୁତି ଦେଇ ସେମାନଙ୍କୁ ପ୍ରଲୋଭିତ କରୁଥିଲେ। ତା'ପରେ ଏଜେଣ୍ଟମାନେ ସମ୍ପୂର୍ଣ୍ଣ ପ୍ରକ୍ରିୟାକୁ ସହଜ କରୁଥିଲେ - ପାସପୋର୍ଟ ବ୍ୟବସ୍ଥା କରିବା, ବିମାନ ଟିକେଟ୍ ବୁକ୍ କରିବା ଏବଂ ପୀଡିତମାନଙ୍କୁ ପର୍ଯ୍ୟଟନ ଭିସାରେ ଥାଇଲ୍ୟାଣ୍ଡ ପଠାଇବା ଯାଏଁ ସବୁ କାମ କରୁଥିଲେ।
ଥାଇଲ୍ୟାଣ୍ଡରେ ପହଞ୍ଚିବା ପରେ, ପୀଡ଼ିତମାନଙ୍କୁ ମିଆଁମାର ସୀମାକୁ ନିଆଯାଇଥିଲା, ସେଠାରେ ସେମାନଙ୍କୁ ଏକ ଛୋଟ ଡଙ୍ଗାରେ ଗୋଟିଏ ନଦୀ ପାର କରିବାକୁ ବାଧ୍ୟ କରାଯାଇଥିଲା। ମିଆଁମାର ଭିତରକୁ ପ୍ରବେଶ କରିବା ପରେ, ସେମାନଙ୍କୁ ସଶସ୍ତ୍ର ବିଦ୍ରୋହୀ ଗୋଷ୍ଠୀ ଦ୍ୱାରା ନିୟନ୍ତ୍ରିତ କଠିନ ସୁରକ୍ଷା ବିଶିଷ୍ଟ କମ୍ପାଉଣ୍ଡକୁ ନିଆଯାଇଥିଲା। ସେଠାରେ, ସେମାନଙ୍କୁ "ଡିଜିଟାଲ୍ ଗିରଫ" ଠକେଇ ଏବଂ ନକଲି ନିବେଶ ଯୋଜନା ସମେତ ବଡ଼ ଧରଣର ସାଇବର ଠକେଇ କାର୍ଯ୍ୟ କରିବାକୁ ବାଧ୍ୟ କରାଯାଉଥିଲା।
ଅଧିକାରୀମାନେ କହିଛନ୍ତି ଯେ ମାନବ ଚାଲାଣ ଏବଂ ସାଇବର ଅପରାଧ ର୍ୟାକେଟରେ ନିଯୁକ୍ତି ଏଜେଣ୍ଟ ଭାବରେ କାର୍ଯ୍ୟ କରୁଥିବା ଅଭିଯୋଗରେ ଗିରଫ ହୋଇଥିବା ପାଞ୍ଚ ଜଣଙ୍କ ମଧ୍ୟରୁ ମନୀଷ ଗ୍ରେ, ଓରଫ ମ୍ୟାଡି ନାମକ ଜଣେ ବୃତ୍ତିଗତ ଅଭିନେତା ରହିଛନ୍ତି ଯିଏକି ୱେବ୍ ସିରିଜ୍ ଏବଂ ଟେଲିଭିଜନ ଶୋ'ରେ ଅନେକ ନଜର ଆସିଛନ୍ତି। ଗିରଫ ହୋଇଥିବା ଅନ୍ୟ ବ୍ୟକ୍ତିଙ୍କ ମଧ୍ୟରେ ତୈସାନ ଓରଫ ଆଦିତ୍ୟ ରବି ଚନ୍ଦ୍ରନ, ରୂପନାରାୟଣ ରାମଧର ଗୁପ୍ତା, ଜେନ୍ସି ରାନୀ ଡି ଏବଂ ଚୀନ୍-କାଜାଖସ୍ତାନୀ ନାଗରିକ ତାଲାନିତି ନୁଲାକ୍ସି ରହିଛନ୍ତି।
ତଦନ୍ତ ଅନୁଯାୟୀ, ଗ୍ରେ ଏବଂ ତାଙ୍କ ସହଯୋଗୀମାନେ ଅଜଣା ଲୋକଙ୍କୁ ପ୍ରଲୋଭିତ କରିଥିଲେ ଏବଂ ବିଦେଶରେ ଚାକିରି ସୁଯୋଗ ଦେବାର ଆଳ ଦେଖାଇ ମିଆଁମାରକୁ ନେଇଯାଇଥିଲେ। କର୍ତ୍ତୃପକ୍ଷ ଏହା ମଧ୍ୟ ପ୍ରକାଶ କରିଛନ୍ତି ଯେ ତାଲାନିତି ନୁଲାକ୍ସି ଭାରତରେ ଏକ ସାଇବର ଅପରାଧ ୟୁନିଟ୍ ପ୍ରତିଷ୍ଠା କରିବାକୁ ଯୋଜନା କରୁଥିଲେ ବୋଲି ଅଭିଯୋଗ ହୋଇଛି।
