ଝାନ୍ସି,୨୨/୦୮: ୟୁପି ଝାନ୍ସି ଜିଲ୍ଲା ଅନ୍ତର୍ଗତ ଟୋଡ଼ି ଫତେହପୁର ଥାନା ଅଧୀନ କିଶୋରପୁରା ଗ୍ରାମରେ ଏକ ଅଭାବନୀୟ ଘଟଣା ଘଟିଥିଲା । କୂଅ ମଧ୍ୟରୁ ମୁଣ୍ଡବିହୀନ ମୃତଦେହ ମିଳିବା ପରେ ଚାଞ୍ଚଲ୍ୟ ଖେଳିଯାଇଥିଲା । ଏବେ ଉକ୍ତ ଘଟଣାର ପର୍ଦ୍ଦାଫାସ ହୋଇଛି । ମୃତଦେହର ପରିଚୟ ମିଳିଛି । ମୃତକ ହେଉଛନ୍ତି ମଲ୍ୱାରା ଗ୍ରାମର ରଚନା ଯାଦବ (୩୫) ।
ପୁଲିସ ମୁତାବକ, ରଚନାଙ୍କୁ ତାଙ୍କ ପ୍ରେମିକ ତଥା ମହେବା ଗ୍ରାମର ପୂର୍ବତନ ସରପଞ୍ଚ ସଞ୍ଜୟ ପଟେଲ ହତ୍ୟା କରିଛନ୍ତି । ଏହି ହତ୍ୟା ଘଟଣାରେ ସଞ୍ଜୟଙ୍କ ପୁତୁରା ସନ୍ଦୀପ ପଟେଲ ଓ ବନ୍ଧୁ ପ୍ରଦୀପ ଓରଫ ଦୀପକ ଅହରିୱାର ସମ୍ପୃକ୍ତ ଅଛନ୍ତି । ପୁଲିସ ସଞ୍ଜୟ ଓ ସନ୍ଦୀପଙ୍କୁ ଗିରଫ କରିଛି । ପ୍ରଦୀପ ଏବେ ବି ଫେରାର ଅଛି ।
ବରିଷ୍ଠ ପୁଲିସ ଅଧୀକ୍ଷକ ବିବିଜିଟିଏସ୍ ମୂର୍ତ୍ତିଙ୍କ ଅନୁସାରେ, ରଚନା ଓ ସଞ୍ଜୟଙ୍କ ମଧ୍ୟରେ ପ୍ରେମସମ୍ପର୍କ ଥିଲା । ରଚନା ବିବାହ ପାଇଁ ବାରମ୍ବାର ଚାପ ପକାଇବାରୁ ତାଙ୍କୁ ହତ୍ୟା କରାଯାଇଛି । ଅଗଷ୍ଟ ୯ରେ ସନ୍ଦୀପ ଓ ପ୍ରଦୀପଙ୍କ ସହ ମିଶି ସଞ୍ଜୟ ଏହି କାଣ୍ଡ ଘଟାଇଥିଲେ । ସେମାନେ ପ୍ରଥମେ ରଚନାଙ୍କୁ ତଣ୍ଟି ଚିପି ହତ୍ୟା କରିଥିଲେ । ଏହାପରେ ମୃତଦେହକୁ ୭ ଖଣ୍ଡ କରି ଅଖାରେ ଭର୍ତ୍ତି କରି କୂଅ ମଧ୍ୟରେ ଫିଙ୍ଗିଦେଇଥିଲେ । ରଚନାଙ୍କ ପରିଚୟ ଲୁଚାଇବା ପାଇଁ ତାଙ୍କ କଟା ମୁଣ୍ଡ ଓ ପାଦକୁ ସେମାନେ ଲଖେରି ନଦୀରେ ଫିଙ୍ଗିଦେଇଥିଲେ । ଅଗଷ୍ଟ ୧୩ରେ ପୁଲିସ କୂଅ ଶୁଖାଇ ମୃତଦେହ ବାହାର କରିଥିଲା । ଏହା ରଚନାଙ୍କ ମୃତଦେହ ବୋଲି ଗ୍ରାମବାସୀ ଜାଣିପାରି ତାଙ୍କ ଘର ଲୋକଙ୍କୁ ଖବର ଦେଇଥିଲେ ।
ପୁଲିସ ମୁତାବକ, ପୂର୍ବତନ ସରପଞ୍ଚ ସଞ୍ଜୟଙ୍କ ସହ ପ୍ରେମ ସମ୍ପର୍କ ପୂର୍ବରୁ ରଚନା ଦୁଇଥର ବିବାହ କରିଥିଲେ । ପ୍ରଥମ ବିବାହରୁ ତାଙ୍କର ଦୁଇ ସନ୍ତାନ ରହିଛନ୍ତି । ଦ୍ୱିତୀୟ ସ୍ୱାମୀଙ୍କଠାରୁ ଅଲଗା ହେବା ପରେ ସେ ମହେବା ଗ୍ରାମର ଶିବରାଜ ଯାଦବଙ୍କ ସହ ରହିବାକୁ ଲାଗିଥିଲେ । ୨୦୨୩ରେ ସେ ଶିବରାଜଙ୍କ ବିରୋଧରେ ବଳାତ୍କାର ଓ ହତ୍ୟା ଉଦ୍ୟମ ଅଭିଯୋଗ ଆଣିଥିଲେ । ଜୁନ୍ରେ ଶିବରାଜଙ୍କ ମୃତ୍ୟୁ ପରେ ରଚନା ସଞ୍ଜୟଙ୍କ ସହ ପ୍ରେମ ସମ୍ପର୍କ ସ୍ଥାପନ କରିଥିଲେ । ତେବେ ବିବାହ ପାଇଁ ସଞ୍ଜୟଙ୍କ ଉପରେ ସେ ଚାପ ପକାଇଥିଲେ । ଏହାକୁ ନେଇ ବାରମ୍ବାର ବିବାଦ ଉପୁଜିବାରୁ ଶେଷରେ ସଞ୍ଜୟ ତାଙ୍କୁ ରାସ୍ତାରୁ ହଟାଇବାକୁ ନିଷ୍ପତ୍ତି ନେଇଥିଲେ ବୋଲି ପୁଲିସ ସୂତ୍ରରୁ ଜଣାପଡ଼ିଛି ।
