ନୂଆଦିଲ୍ଲୀ: ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ତଥା ବିଏନପି ଅଧ୍ୟକ୍ଷ ଖଲିଦା ଜିଆଙ୍କୁ ବୁଧବାର ହାଇକୋର୍ଟ ଏକ ଦୁର୍ନୀତି ମାମଲାରେ ନିର୍ଦ୍ଦୋଷରେ ଖଲାସ କରିଛନ୍ତି। ୨୦୧୮ ରେ ଜିଆ ଚାରିଟେବୁଲ୍ ଟ୍ରଷ୍ଟ ଦୁର୍ନୀତି ମାମଲାରେ ପୂର୍ବତନ ପ୍ରଧାନମନ୍ତ୍ରୀ ଖାଲିଦା ଜିଆଙ୍କୁ ଢାକାର ଏକ କୋର୍ଟ ଦୋଷୀ ସାବ୍ୟସ୍ତ କରିଥିଲେ । ତାଙ୍କୁ ସାତ ବର୍ଷ କାରାଦଣ୍ଡରେ ଦଣ୍ଡିତ କରାଯିବା ସହ ଏକ ଲକ୍ଷ ଟଙ୍କା ଜରିମାନା ମଧ୍ୟ କରାଯାଇଥିଲା।
ବାଂଲାଦେଶୀ ଗଣମାଧ୍ୟମ ରିପୋର୍ଟ ଅନୁଯାୟୀ ଜିଆଙ୍କ ଆବେଦନ ଆଧାରରେ ଜଷ୍ଟିସ ଏ.କେ.ଏମ ଆସାଦୁଜାମା ଏବଂ ସୟଦ ଇନାୟତ ହୁସେନଙ୍କ ବେଞ୍ଚ ଜିଆଙ୍କ ଆବେଦନକୁ ଆଧାର କରି ଢାକା କୋର୍ଟର ନିଷ୍ପତ୍ତିକୁ ଖାରଜ କରିଦେଇଛନ୍ତି । ଏହି ମାମଲାରେ ଅନ୍ୟ ଦୁଇ ଅଭିଯୁକ୍ତ ମଧ୍ୟ ନିର୍ଦ୍ଦୋଷରେ ଖଲାସ ହୋଇଛନ୍ତି । ୨୦୧୧ ରେ ଦୁର୍ନୀତି ନିବାରଣ ଆୟୋଗ (ଏସିସି) ପୂର୍ବତନ ପ୍ରଧାନମନ୍ତ୍ରୀ ତଥା ଜିଆ ଚାରିଟେବୁଲ ଟ୍ରଷ୍ଟର ଖଲିଦା ଏବଂ ଅନ୍ୟ ତିନିଜଣ ଖାଲିଦାଙ୍କ ରାଜନୈତିକ ସଚିବ ଜିଆଉଲ ଇସଲାମ ମୁନ୍ନା, ଆସିଷ୍ଟାଣ୍ଟ ପ୍ରାଇଭେଟ୍ ସେକ୍ରେଟେରୀ (ଏପିଏସ୍) ହାରିସ୍ ଏବଂ ଢାକା ନଗର ମେୟର ସାଦିକଙ୍କ ଏପିଏସ୍ ମୋନିରୁଲ ଇସଲାମ ଖାନଙ୍କ ବିରୋଧରେ ଅଭିଯୋଗ ଆଣିଥିଲେ। ତେଜଗାଓଁରେ କ୍ଷମତାର ଅପବ୍ୟବହାର କରି ଟ୍ରଷ୍ଟ ପାଇଁ ଅଜ୍ଞାତ ଉତ୍ସରୁ ଟଙ୍କା ସଂଗ୍ରହ ପାଇଁ ପୋଲିସ ଷ୍ଟେସନରେ ଏକ ମାମଲା ପଞ୍ଜିକୃତ ହୋଇଥିଲା।
ଏହା ପୂର୍ବରୁ ଖଲିଦା ଜିଆଙ୍କୁ ଅନାଥ ଆଶ୍ରମ ଟ୍ରଷ୍ଟ ଦୁର୍ନୀତି ମାମଲାରେ ସ୍ୱତନ୍ତ୍ର କୋର୍ଟ ଦ୍ୱାରା ୫ ବର୍ଷ ଜେଲ ଦଣ୍ଡାଦେଶ ହୋଇଥିଲା। ଏହା ପରେ ତାଙ୍କୁ ଫେବୃଆରୀ ୮, ୨୦୧୮ ରେ ପୁରୁଣା ଢାକା କେନ୍ଦ୍ରୀୟ ଜେଲରେ ରଖାଯାଇଥିଲା । ଅକ୍ଟୋବର ୩୦, ୨୦୧୮ରେ ହାଇକୋର୍ଟ ତାଙ୍କ ଦଣ୍ଡକୁ ୧୦ ବର୍ଷକୁ ବୃଦ୍ଧି କରିଥିଲେ। ପରେ ତାଙ୍କୁ ଜିଆ ଚାରିଟେବୁଲ ଟ୍ରଷ୍ଟ ଦୁର୍ନୀତି ମାମଲାରେ ଦୋଷୀ ସାବ୍ୟସ୍ତ କରାଯାଇଥିଲା । ତାଙ୍କୁ ସାତ ବର୍ଷ କାରାଦଣ୍ଡରେ ଦଣ୍ଡିତ କରାଯାଇଥିଲା।
କୋଭିଡ ସମୟରେ ଶେଖ ହସିନା ସରକାର ୭୭୬ଦିନ ପରେ ଖାଲିଦା ଜିଆଙ୍କୁ ସାମୟିକ ଭାବେ ଜେଲରୁ ମୁକ୍ତ କରିଥିଲେ । ୨୫ ମାର୍ଚ୍ଚ ୨୦୨୦ ରେ ତାଙ୍କ ଦଣ୍ଡ ସ୍ଥଗିତ ରଖାଯାଇଥିଲା । ସେ ତାଙ୍କ ଗୁଲଶାନ ଘରେ ରହି ଦେଶ ଛାଡିବେ ନାହିଁ ବୋଲି ଏକ ସର୍ତ୍ତ ରଖାଯାଇଥିଲା । ମାର୍ଚ୍ଚ ୧୯୯୧ ରୁ ମାର୍ଚ୍ଚ ୧୯୯୬ ପର୍ଯ୍ୟନ୍ତ ଏବଂ ଜୁନ୍ ୨୦୦୧ରୁ ଅକ୍ଟୋବର ୨୦୦୬ ପର୍ଯ୍ୟନ୍ତ ଖାଲିଦା ଜିଆ ବାଂଲାଦେଶର ପ୍ରଧାନମନ୍ତ୍ରୀ ଥିଲେ ।
