ନୂଆଦିଲ୍ଲୀ,୦୪/୦୭: ଆମେରିକା ଚିକାଗୋର ରିଭର ନର୍ଥ ଅଞ୍ଚଳର ଏକ ନାଇଟ୍ କ୍ଲବରେ ଆଖିବୁଜା ଗୁଳିମାଡ଼। ଯେଉଁଥିରେ ୪ ଜଣଙ୍କର ମୃତ୍ୟୁ ହୋଇଥିବା ବେଳେ ୧୪ ଜଣ ଆହତ ହୋଇଛନ୍ତି। ଚିକାଗୋ ପୁଲିସ ଅନୁଯାୟୀ, ଚିକାଗୋରେ ଜଣେ ରାପରଙ୍କ ଆଲବମ୍ ରିଲିଜ୍ ପାର୍ଟି ପରେ ଆର୍ଟିଷ୍ଟ ଲାଉଞ୍ଜ ନାଇଟ୍ କ୍ଲବ୍ ରୁ ବାହାରିଥିଲେ । ଏହି ସମୟ ଭିଡ଼ ଉପରେ କେହି ଗୁଳି ଚଳାଇଥିଲା। ଏହି ଘଟଣାରେ ୪ ଜଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଛି । ସେହିପରି ୧୪ ଜଣ ଆହତଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି।
ତେବେ ନାଇଟ୍ କ୍ଲବ୍ ବାହାରେ ଗୁଳିକାଣ୍ଡ ହେବା ପରେ କ୍ଲବ୍ ବାହାରେ ଜମା ହୋଇଥିବା ଲୋକମାନେ ଜୀବନ ବଞ୍ଚାଇବା ପାଇଁ ଏଣେତେଣେ ଦୌଡ଼ିଥିଲେ । ସେପଟେ ରେଷ୍ଟୁରାଣ୍ଟ ବାହାରେ ଠିଆ ହୋଇଥିବା ଲୋକଙ୍କ ଉପରେ ଗୁଳିଚାଳନା ଘଟଣା ସୂଚନା ଦେଇ ପୁଲିସ କହିଛି, ଜଣେ ବ୍ୟକ୍ତି ରେଷ୍ଟୁରାଣ୍ଟ ବାହାରେ ଠିଆ ହୋଇଥିବା ଲୋକଙ୍କ ଉପରେ ଗୁଳିଚାଳନା କରିଥିଲେ ଏବଂ ତୁରନ୍ତ ସେଠାରୁ ଫେରାର୍ ହୋଇଯାଇଥିଲେ । ବର୍ତ୍ତମାନ ସୁଦ୍ଧା କାହାକୁ ଅଟକ ରଖାଯାଇ ନାହିଁ । ଘଟଣାର ତଦନ୍ତ ଚାଲିଛି, ଖୁବଶୀଘ୍ର ଅଭିଯୁକ୍ତମାନଙ୍କୁ ଗିରଫ କରାଯିବ ।
