ପାଳଲହଡା,୧୪/୮ : ନିଜ ଘରେ ଚୋରା ଦେଶୀ ବନ୍ଧୁକ ରଖିବା ଅପରାଧରେ ୪ଜଣକୁ ଗିରଫ କରିବା ସହ ୪ ଟି ଦେଶୀ ବନ୍ଧୁକ ଜବତ କରିଛି ପାଳଲହଡା ପୋଲିସ । ଏପରି ଏକ ଘଟଣା ଘଟିଛି ଅନୁଗୁଳ ଜିଲ୍ଲା ପାଳଲହଡା ବ୍ଲକ ପାଳଲହଡା ଥାନା ଅଞ୍ଚଳରେ।
ସୂଚନା ଅନୁସାରେ, ପାଳଲହଡା ଥାନା ଅଂଚଳରେ ବହୁ ଦିନ ଧରି ଚୋରା ଦେଶୀ ବନ୍ଧୁକ କିଛି ଲୋକମାନେ ରଖିଥିବା ଅଭିଯୋଗ ହୋଇ ଆସୁଥିଲା । ସେହି ଅଭିଯୋଗ ଅନୁଯାୟୀ ଗତ ଜୁନ ମାସରେ ପାଳଲହଡା ଥାନା ଅଂଚଳରୁ ପୋଲିସ ୩ଟି ବନ୍ଧୁକ ଜବତ କରିବା ସହ ୩ଜଣକୁ ଗିରଫ କରି କୋର୍ଟ ଚାଲାଣ କରିଥିଲା ଓ ଗୋଟିଏ ଦେଶୀ ବନ୍ଧୁକ କାରଖାନା ମଧ୍ୟ ଠାବ କରିଥିଲା ଖମାର୍ ପୋଲିସ। ବିଶେଷ ସୂତ୍ରରୁ ଖବରପାଇ ଜିଲ୍ଲା ଆରକ୍ଷୀ ଅଧିକାରୀଙ୍କ ନିର୍ଦେଶ କ୍ରମେ ଏସଡିପିଓ କୈଳାଶ ଚନ୍ଦ୍ର ସେଠୀଙ୍କ ତତ୍ତ୍ବାବଧାନରେ ପାଳଲହଡା ଥାନା ପ୍ରଦୀପ କୁମାର ମହାନ୍ତଙ୍କ ନେତୃତ୍ୱରେ ପାଳଲହଡା ପୋଲିସର ଏକ ସ୍ୱତନ୍ତ୍ର ଟିମ ପାଳଲହଡା ଥାନା ଡ଼ିମିରିଆ ପଞ୍ଚାୟତ ଅନ୍ତର୍ଗତ ରେଙ୍ଗାଳି ଗ୍ରାମ, ସୋଲଡା ଗ୍ରାମ ଓ କୋରଡା ଗ୍ରାମରେ ଆଜି ପୂର୍ବାହ୍ନରେ ଅତର୍କିତ ଚଢ଼ଉ କରି ୪ଟି ଦେଶୀ ଚୋରା ବନ୍ଧୁକ ଜବତ କରିବା ସହିତ ଚୋରା ବନ୍ଧୁକ ରଖିଥିବା ଅଭିଯୋଗରେ ୪ଜଣଙ୍କୁ ଗିରଫ କରିଛି । ଅଭିଯୁକ୍ତମାନେ ହେଲେ ପାଳଲହଡା ଥାନା ଡ଼ିମିରିଆ ପଂଚାୟତ ସୋଲଡା ଗ୍ରାମର ସୁରେନ୍ଦ୍ର ଦେଓଗାମ (୪୦) କୋରଡା ଗ୍ରାମର ଗୋଲେଖ ବୋଇତା (୬୦) ରେଙ୍ଗାଳି ଗ୍ରାମର ଦୁଇ ଜଣ ସିକୁର ପୂର୍ତ୍ତି (୪୦) ଏବଂ ରେନ୍ସା ହେସା (୨୭) ବୋଲି ପୋଲିସ ସୂଚନା ଦେଇଛି । ପାଳଲହଡା ପୋଲିସ ପକ୍ଷରୁ ଦେଶୀ ବନ୍ଧୁକ ଗୁଡ଼ିକୁ ଜବତ କରିବା ସହ ଅଭିଯୁକ୍ତ ୪ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡ଼ିଛି ।
