ଆହ୍ଲାବାଦ, ୦୪/୦୭: ସୋସିଆଲ ମିଡିଆ ପୋଷ୍ଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଅପମାନିତ କରିଥିବା ଜଣେ ବ୍ୟକ୍ତିଙ୍କ ଜାମିନ ଆବେଦନକୁ ଆହ୍ଲାବାଦ ହାଇକୋର୍ଟ ଖାରଜ କରିଦେଇଛନ୍ତି । କହିଛନ୍ତି ସମ୍ବିଧାନ ଦେଇଥିବା ବାକ୍ ସ୍ୱାଧୀନତାର ଅର୍ଥ ନୁହେଁ ଯେ ଦେଶର ପ୍ରଧାନମନ୍ତ୍ରୀଙ୍କୁ ଅପମାନିତ କରିବା । ଗିରଫ ବ୍ୟକ୍ତିଙ୍କ ନାମ ଅଶରଫ ଖାନ୍ ଓରଖ ନିସରତ ।
ନିକଟରେ ଭାରତ ଓ ପାକ୍ ମଧ୍ୟରେ ଘଟିଥିବା ସଂଘର୍ଷ ସମୟରେ ସେ ସୋସିଆଲ ମିଡିଆ ଫେସବୁକ୍ରେ ପ୍ରଧାନମନ୍ତ୍ରୀ ଓ ଭାରତୀୟ ସେନା ଉପରେ କେତେକ ସଂଶୋଧିତ ତଥା ଆପତ୍ତିଜନକ ଭିଡିଓ ସେୟାର କରିଥିଲେ । କେବଳ ଏତିକି ନୁହେଁ ସେ ମଧ୍ୟ ଉକ୍ତ ପୋଷ୍ଟରେ ପାକିସ୍ତାନକୁ ପ୍ରଶଂସା କରିଥିଲେ । ଏହି ଘଟଣା ପରେ ତାଙ୍କୁ ଗତ ମେ ୧୩ ତାରିଖରେ ଗିରଫ କରାଯାଇଥିଲା । ହାଇକୋର୍ଟରେ ଅଶରଫଙ୍କ ଓକିଲ ଦର୍ଶାଇଥିଲେ ଯେ ଉକ୍ତ ପୋଷ୍ଟ କିମ୍ବା ଭିଡିଓ ତାଙ୍କ ମହକିଲଙ୍କର ନୁହେଁ । ଶାହରୁଖ ନାମକ ଅନ୍ୟ ଜଣେ ବ୍ୟକ୍ତିଙ୍କ ପକ୍ଷରୁ ଏହି ଆପତ୍ତିଜନକ ପୋଷ୍ଟ ଓ ଭିଡିଓ ଆସିଥିଲା । ଯାହାକୁ ଅଶରଫ ସେୟାର କରିଥିଲେ । ଅଶରଫଙ୍କର ଏଥିରେ ପ୍ରତ୍ୟକ୍ଷ ଭାବେ କୌଣସି ସମ୍ପୃକ୍ତି ନାହିଁ । ତାଙ୍କୁ ବେଆଇନ ଭାବେ ଗିରଫ କରାଯାଇଛି । ତେଣୁ ତାଙ୍କୁ ଜାମିନ ପ୍ରଦାନ କରାଯାଉ । ଅନ୍ୟପକ୍ଷରେ ସରକାରୀ ଓକିଲ ଦର୍ଶାଇଥିଲେ ଯେ ସୋସିଆଲ ମିଡିଆରେ ଏଭଳି ପୋଷ୍ଟ କରାଯିବ ଓ ଭିଡିଓ ଛଡାଯିବା କେବଳ ଦେଶର ନେତୃତ୍ୱ ପ୍ରତି ଅପମାନ ନୁହେଁ, ବରଂ ଏକ ସମୁଦାୟ ଭିତରେ ଉତ୍ତେଜନା ସୃଷ୍ଟି କରିବା ଭଳି ପଦକ୍ଷେପ । ଏଭଳି କ୍ଷେତ୍ରରେ ଜାମିନ ପ୍ରଦାନ କରାଯିବା ଉଚିତ ନୁହେଁ । ତେବେ ଅଦାଲତ ଅଶରଫଙ୍କ ଓକିଲ କରିଥିବା ଯୁକ୍ତିକୁ ଗ୍ରହଣ କରିପାରି ନଥିଲେ ।
କହିଥିଲେ ଯେ ବାକ୍ ସ୍ୱାଧୀନତା ନାମରେ ସୋସିଆଲ ମିଡିଆର ଅପବ୍ୟବହାର କରାଯାଉଛି । ସେଥିରେ ସାମ୍ବିଧାନିକ ପଦ ପଦବିରେ ଥିବା ବ୍ୟକ୍ତିଙ୍କୁ ଅପମାନିତ କରାଯିବାକୁ ପଛାଉନାହାନ୍ତି । ଏହା କିଛି ବ୍ୟକ୍ତିଙ୍କ ଆଚରଣ ପାଲଟିଛି । ଆବେଦନକାରୀ ଯେଉଁ ଆପତ୍ତିଜନକ ପୋଷ୍ଟ କରିଛନ୍ତି ସେଥିରେ ତାଙ୍କ ପ୍ରତି କୌଣସି ପ୍ରକାର କୋହଳ ମନୋଭାବ ପୋଷଣ କରାଯାଇପାରିବ ନାହିଁ । ଏଭଳି ସମୟରେ ତାଙ୍କୁ ଜାମିନ ପ୍ରଦାନ କରାଯିବା ସମ୍ଭବ ନୁହେଁ । ତେଣୁ ତାଙ୍କ ଆବେଦନ ଖାରଜ କରାଗଲା ବୋଲି କୋର୍ଟ କହିଥିଲେ ।
