ଭୁବନେଶ୍ୱର,୨୪/୦୧: ଦିନକ ପରେ ୭୬ତମ ସାଧାରଣତନ୍ତ୍ର ଦିବସ । ମହାତ୍ମାଗାନ୍ଧି ମାର୍ଗରେ ଏଥିପାଇଁ ଜୋର୍ଦାର ପ୍ରସ୍ତୁତି ଚାଲିଛି । ଆଜି ରାଜ୍ୟସ୍ତରୀୟ ପରେଡ୍ ପାଇଁ ଫୁଲ୍ ଡେସ୍ ରିହଲର୍ସଲ କରାଯାଇଛି। ଦେଶାତ୍ମବୋଧକ ଗୀତ ତାଳେ ତାଳେ ମୋଟ ୪୩ଟି ଦଳ ପରେଡ୍ ଅଭ୍ୟାସ କରିଛନ୍ତି । ରବିବାର ହଜାର ହଜାର ଦର୍ଶକଙ୍କ ଉପସ୍ଥିତିରେ ରାଜ୍ୟପାଳ ରାଜ୍ୟପାଳ ଡ. ହରି ବାବୁ କମ୍ଭମ୍ପତି ଗାନ୍ଧିମାର୍ଗରେ ଜାତୀୟ ପତାକା ଉତ୍ତୋଳନ କରିବେ । ରାଜ୍ୟସ୍ତରୀୟ ପରେଡ୍ର ଅଭିବାଦନ ଗ୍ରହଣ କରିବେ ।
ସୂଚନା ମୁତାବିକ, ଆଜି ସକାଳେ ମହାତ୍ମାଗାନ୍ଧି ମାର୍ଗରେ ୪୯ଟି ଗ୍ରୁପ୍,୧୦ଟି ପ୍ରଜ୍ଞାପନ ମେଢ଼ ଓ ୪ଟି ସାଂସ୍କୃତିକ ଦଳ ପରେଡ୍ର ଫୁଲ୍ ଡେସ୍ ରିହଲର୍ସଲ ଅଭ୍ୟାସ କରିଛନ୍ତି। ଯାହାକୁ ଦେଖିବାକୁ ଭିଡ଼ ଜମିଥିଲା। କ୍ବାମିନାରା, ଜୟହିନ୍ଦ ଓ ଧ୍ବନିରେ ପ୍ରକମ୍ପିତ ହୋଇଥିଲା ପରେଡ୍ ସ୍ଥଳ।
ଚଳିତଥର ଝାଡ଼ଖଣ୍ଡ ପୁଲିସର ଏକ ଦଳ ପରେଡ୍ରେ ଭାଗ ନେବେ । ଅଭ୍ୟାସରେ ୪୩ଟି କଣ୍ଟିଜେଣ୍ଟ ସାମିଲ୍ ହୋଇଥିବା ବେଳେ ସାଧାରଣତନ୍ତ୍ର ଦିବସ ଦିନ ମୋଟ ୪୯ଟି ଦଳ ଭାଗ ନେବେ । ସେଥିରୁ ୨୦ଟି ସାମରିକ ଓ ଅର୍ଦ୍ଧସାମରିକ ବାହିନୀ ଅଛନ୍ତି । ୧୨୦ ଇନ୍ଫାଣ୍ଟ୍ରି ବାଟାଲିୟନ, ସୀମା ସୁରକ୍ଷା ବଳ, ଇଣ୍ଡୋ ତିକ୍ରତୀୟ ବର୍ଡର ପୁଲିସ, କେନ୍ଦ୍ରୀୟ ରିଜର୍ଭ ପୁଲିସ ବଳ (ସିଆର୍ପିଏଫ) ବ୍ୟାଣ୍ଡ, ରେଳବାଇ ସୁରକ୍ଷା ବଳ, ଷଷ୍ଠ ଭାରତୀୟ ରିଜର୍ଭ ବାଟାଲିୟନ (ଆଇଆରବିଏନ୍) ଓ ସପ୍ତମ ଓଡି଼ଶା ସଶସ୍ତ୍ର ପୁଲିସ ବଳ ଭଳି ସଶସ୍ତ୍ର ବାହିନୀ ଅଭ୍ୟାସ କରିଥିଲେ । ବାକି ୨୯ଟି କଣ୍ଟିଜେଣ୍ଟରେ ସ୍କୁଲ ଓ କଲେଜ ଛାତ୍ରଛାତ୍ରୀଙ୍କ ଏନ୍ସିସି, ସ୍କାଉଟ୍ସ୍, ଗାଇଡ୍ସ ସହ ଡେୟାର ଡେଭିଲ୍, ଏନ୍ସିସି ଅଶ୍ୱବାହିନୀ ପରେଡ୍ରେ ସାମିଲ ହେବେ । ଚଳିତ ବର୍ଷ ୧୦ଟି ପ୍ରଜ୍ଞାପନ ମେଢ଼ ଓ ୪ଟି ସାଂସ୍କୃତିକ ଦଳ ପରେଡ୍ର ଆକର୍ଷଣ ସାଜିବେ ।
୭ଟି ସ୍ୱତନ୍ତ୍ର ପାର୍କିଂ
ସାଧାରଣତନ୍ତ୍ର ଦିବସକୁ ଆସୁଥିବା ଦର୍ଶକଙ୍କ ପାଇଁ ୭ଟି ସ୍ୱତନ୍ତ୍ର ପାର୍କିଂ ସ୍ଥଳ ଚିହ୍ନଟ କରାଯାଇଛି । ରେଳଷ୍ଟେସନ ନିକଟ ବିଡିଏ ବସଷ୍ଟାଣ୍ଡ, ୨ ନଂ ସରକାରୀ ବାଳିକା ବିଦ୍ୟାଳୟ ପଡି଼ଆ ଓ ରବିନ୍ଦ୍ର ମଣ୍ଡପ ଭିତରେ ବାଇକ୍ ଓ କାର ରଖିହେବ । କଂଗ୍ରେସ ଭବନ ଓ ଇଡକଲ ଅଡିଟୋରିୟମ ନିକଟ ଖୋଲା ସ୍ଥାନ ସମେତ ଜୟଦେବ ଭବନ ଓ ୩ ନଂ ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ ସାମ୍ନା ଖୋଲା ଜାଗାରେ ମଧ୍ୟ ପାର୍କିଂ କରିପାରିବେ ।
