ନୂଆଦିଲ୍ଲୀ,୦୨/୧୨: ଗତ ୧ ଦଶନ୍ଧି ଧରି ଅର୍ଗାନାଇଜେସନ ଫର୍ ଇକୋନୋମିକ କୋଅପରେସନ ଆଣ୍ଡ୍ ଡେଭଲପମେଣ୍ଟ (ଓଇସିଡି) ଅଞ୍ଚଳ ଗୁଡିକ ନିଯୁକ୍ତି ଅଭିବୃଦ୍ଧି ଜାରି ରଖିଛନ୍ତି । ତେବେ ଜେନେରେଟିଭ ଆର୍ଟିଫିସିଆଲ ଇଣ୍ଟେଲିଜେନ୍ସି (ଏଆଇ) ଏହି ଦେଶ ଗୁଡିକର ସ୍ଥାନିୟ ନିଯୁକ୍ତି ଖାଇଯିବାର ଢ଼େର ଆଶଙ୍କା ଉପୁଜିଛି । ସହରାଞ୍ଚଳରେ ୩୨% ନିଯୁକ୍ତି ଏବଂ ଗ୍ରାମାଞ୍ଚଳରେ ୨୧% ନିଯୁକ୍ତି ଏହା ଦ୍ୱାରା ଚାଲିଯିବ । ଗ୍ରାମାଞ୍ଚଳ ସହରାଞ୍ଚଳ ଆୟ ଏବଂ ଉତ୍ପାଦକତା କ୍ଷେତ୍ରରେ ଏହା ବଡ ବ୍ୟବଧାନ ସୃଷ୍ଟି କରିବ ବୋଲି ଓଇସିଡି ରିପୋର୍ଟରେ କୁହାଯାଇଛି ।
ଅଟୋମେଶନ ଯୋଗୁ ଯେଉଁ ଅଞ୍ଚଳ ଗୁଡିକ ବେଶି କ୍ଷତିଗ୍ରସ୍ତ ହୋଇ ନ ଥିଲେ ଜେନେରେଟିଭ ଏଆଇ ଦ୍ୱାରା ନିଯୁକ୍ତି ହ୍ରାସର ଆଶଙ୍କା ବଢ଼ିଛି। ଟେକ୍ନୋଲୋଜି ଭିତ୍ତିକ ଅଟୋମେଶନ ଅଣମେଟ୍ରୋ ଏବଂ ବିନିର୍ମାଣ କ୍ଷେତ୍ର ସହ ଜଡିତ ଏରିଆ ଗୁଡିକୁ ପ୍ରଭାବିତ କରିଥିଲା । ମାତ୍ର ବର୍ତ୍ତମାନ ମେଟ୍ରୋ ଅଞ୍ଚଳର କୁଶଳୀ ଏବଂ ମହିଳାମାନେ ଜେନେରେଟିଭ ଏଆଇଦ୍ୱାରା ନିଯୁକ୍ତିରେ ବଡ ଚ୍ୟାଲେଞ୍ଜ ସାମ୍ନା କରିବେ ବୋଲି ଆକଳନ କରାଯାଇଛି ।
ଜେନେରେଟିଭ ଏଆଇ ବୌଦ୍ଧିକ ଏବଂ ରୁଟିନ ଟାସ୍କ ଗୁଡ଼ିକୁ ବେଶ ଦକ୍ଷତାର ସହ କରିବାର କ୍ଷମତା ରଖୁଛି । ଏହା ଶିଳ୍ପ ଏବଂ ସାରା ବିଶ୍ୱର ଅର୍ଥନୀତିକୁ ଦ୍ରୁତ ଭାବେ ରୁପାନ୍ତରିତ କରୁଛି । ଏହା ଦ୍ୱାରା ନବସୃଜନ ଏବଂ ଉତ୍ପାଦକତା ବୃଦ୍ଧିର ସମ୍ଭାବନା ତ ରହିଛି, ମାତ୍ର ଲୋକଙ୍କ ନିଯୁକ୍ତି ଚାଲିଯିବା ଯୋଗୁ ଅର୍ଥନୈତିକ ବୈଷମ୍ୟ ବଢ଼ିବାର ମଧ୍ୟ ଢ଼େର ଆଶଙ୍କା ମଧ୍ୟ ଉପୁଜିଛି ।
ଏହି ରିପୋର୍ଟରେ ଚିନ୍ତାଜନକ ସ୍ଥିତି ସାମ୍ନାକୁ ଆସିଛି । ଜନେରେଟିଭ ଏଆଇ । ସ୍ୱିଡେନର ଷ୍ଟମ୍ହୋମ ଏବଂ ପ୍ରଗ୍ର ଚେକିଆରେ ୪୫% ଓ କଲମ୍ବିଆର କୁକା ଗ୍ରାମାଞ୍ଚଳରେ ୧୩% ନିଯୁକ୍ତି ନେଇଯିବ । କିଛି କ୍ଷେତ୍ରରେ ନିଯୁକ୍ତି ଅଟୋମେଟେଡ ହେବାକୁ ଥିବା ବେଳେ ଏଆଇ ବିକାଶ, ଡାଟା ସାଇନ୍ସ ଏବଂ ଏଆଇ ଏଥିକ୍ସ ଭଳି କ୍ଷେତ୍ରରେ ନିଯୁକ୍ତି ମଧ୍ୟ ଆସିପାରେ । ମାତ୍ର କିଞ୍ଚିତ ଲୋକଙ୍କୁ ଏହାର ଫାଇଦା ମିଳିବ ବୋଲି କୁହାଯାଉଛି ।
ଓଇସିଡିର ସେକ୍ରେଟାରୀ ଜେନେରାଲ ମାଥିଆସ କୋରମାନ କୁହନ୍ତି, ଏବେ ଜେନେରେଟିଭ ଏଆଇର ଗ୍ରହଣୀୟତା ଦ୍ରୁତ ଭାବେ ବଢ଼ିଛି । ଫଳରେ ଏହା ସ୍ଥାନିୟ ନିଯୁକ୍ତି ବଜାରକୁ ପୁର୍ନଭାଷିତ କରିଛି । ଏହା ଉତ୍ପାଦକତା ବଢ଼ାଇବା ସହ ଶ୍ରମିକ ଅଭାବ ସମସ୍ୟା ସମାଧାନ କରୁଛି। ମାତ୍ର ଏହା ସତ୍ତେ୍ୱ ଏହା ଡିଜିଟାଲ ବୈଷମ୍ୟତା ମଧ୍ୟ ବଢ଼ାଉଛି ।
ଏଭଳି ଟେକ୍ନୋଲୋଜିର ଲାଭ ଲୋକମାନେ ଯେଭଳି ନେଇପାରିବେ ନୀତି ନିର୍ଦ୍ଧାରକ ମାନେ ଅଭିନବ ଯୋଜନା ହାତକୁ ନେବା ଉଚିତ । ଡିଜିଟାଲ ଭିତ୍ତିଭୂମି ଦୃଢ଼ୀକରଣ, ଡିଜିଟାଲ ସାକ୍ଷରତା ଏବଂ ଏମ୍ଏସ୍ଏମ୍ଇ ଗୁଡ଼ିକ ଏଆଇ ଦ୍ୱାରା କିଭଳି ସ୍କିଲ ଶିଖି ପାରିବେ ସେ ଦିଗରେ ଧ୍ୟାନ ଦେବାକୁ ପଡିବ ବୋଲି କୋରମାନ ଉଲ୍ଲେଖ କରିଛନ୍ତି ।
ତେବେ କେବଳ ଓଇସିଡି ରିପୋର୍ଟ ନୁହେଁ ଇୱାଇ ଗ୍ଲୋବାଲ ପକ୍ଷରୁ ନିକଟରେ ଜାରି ହୋଇଥିବା ଏକ ରିପୋର୍ଟରେ ମଧ୍ୟ ଜେନେରେଟିଭ ଏଆଇ ଦ୍ୱାରା ନିଯୁକ୍ତି ହ୍ରାସକୁ ନେଇ ଚିନ୍ତାପ୍ରକଟ କରାଯାଇଥିଲା । ଏହି ରିପୋର୍ଟରେ କୁହାଯାଇଥିଲା ଯେ, ଜେନେରେଟିଭ ଏଆଇ ଦ୍ୱାରା ଆମେରିକାର ୬୬% ନିଯୁକ୍ତି ପ୍ରଭାବିତ ହେବ । ବିଶ୍ୱ ବଜାର କଥା ବିଚାରକୁ ନେଲେ ୫୯% ନିଯୁକ୍ତି ପ୍ରତି ଉଚ୍ଚ ଠାରୁ ସାମାନ୍ୟ ପ୍ରଭାବ ରହିବ । ତେବେ ଅଭିବୃଦ୍ଧିଶୀଳ ଏବଂ ଅନୁନ୍ନତ ଅର୍ଥନୀତି ତୁଳନାରେ ବିକଶିତ ଅର୍ଥନୀତିଗୁଡିକ ଏଆଇ ଦ୍ୱାରା ବେଶି ଲାଭବାନ ହେବେ ବୋଲି ଆକଳନ କରାଯାଇଛି ।
ରିପୋର୍ଟ ମୁତାବକ, ଜେନେରେଟିଭ ଏଆଇ ଟୁଲ୍ ଦ୍ୱାରା ସୃଜନାତ୍ମକ କ୍ଷେତ୍ର ଯଥା- କଣ୍ଟେଣ୍ଟ କ୍ରିଏସନ, ଡିଜାଇନ, ମ୍ୟୁଜିକ କମ୍ପୋଜିସନ ଭଳି କ୍ଷେତ୍ରଗୁଡିକରେ ନିଯୁକ୍ତି ପ୍ରଭାବିତ ହେବ । ଏହବାଦ କଷ୍ଟମର ସର୍ଭିସ କ୍ଷେତ୍ରରେ ଏଆଇ ଭିତ୍ତିକ ଚାଟ୍ବଟ୍ ଏବଂ ଭର୍ଚୁଆଲ ଆସିଷ୍ଟାଣ୍ଟ ରୁଟିନ୍ କଷ୍ଟମରଙ୍କ ଇନ୍କ୍ୱାରି କରିବା ସହ ମାନବ ଏଜେଣ୍ଟଙ୍କ ଆବଶ୍ୟକତାକୁ ଗୌଣ କରିବ । ମେଡିକାଲ ଫିଲ୍ଡରେ ଏଆଇ ମେଡିକାଲ ଡାଟା, ଡାଏଗ୍ନୋସିସ୍ରେ ସହାୟତା, ବ୍ୟକ୍ତିଗତ ଚିକିତ୍ସା ଯୋଜନା ବିକଶିତ କରିବା ଭଳି କାମ କରିବ । ଆର୍ଥିକ କ୍ଷେତ୍ରରେ ଏଆଇ ଟୁଲର ବ୍ୟବହାର ଦ୍ୱାରା ସମ୍ଭାବ୍ୟ ଠକେଇକୁ ଚିହ୍ନଟ କରିବା, ରିସ୍କର ଅନୁମାନ ଲଗାଇବା, ଆର୍ଥିକ ଆନାଲିସିସ ଭଳି ନିଯୁକ୍ତି ରୋଲ ଗୁଡିକ ବେଶି ପ୍ରଭାବିତ ହେବ ।
