ନୂଆଦିଲ୍ଲୀ,୨୯/୧୧: ଜର୍ମାନରୁ ଏବେ ନିଯୁକ୍ତି ଢ଼େର କିନ୍ତୁ ଲୋକ ଅଭାବ ଭଳି ଖବର ଆସିଛି। ବର୍ଟେଲ୍ସମ୍ୟାନ୍ ଷ୍ଟିଫ୍ଟଙ୍ଗର ରିପୋର୍ଟ ଅନୁଯାୟୀ, ଜର୍ମାନୀରେ ପ୍ରତିବର୍ଷ ୨ ଲକ୍ଷ ୮୮ ହଜାର ଶ୍ରମିକଙ୍କର ଆବଶ୍ୟକ ରହୁଛି। ସୂଚନାଥାଉକି, ଜର୍ମାନୀରେ ବୟସ ବୃଦ୍ଧି ହେତୁ ଶ୍ରମଶକ୍ତିର ଅଭାବ ଦେଖାଦେଇଛି, ଯେଉଁ କାରଣରୁ ଜର୍ମାନୀ ବିଦେଶୀ ପ୍ରବାସୀ ଶ୍ରମିକଙ୍କ ଉପରେ ନିର୍ଭର କରିବାକୁ ପଡ଼ୁଛି।
ରିପୋର୍ଟ ଅନୁଯାୟୀ, ଶ୍ରମଶକ୍ତି ବଜାୟ ରଖିବା ପାଇଁ ଜର୍ମାନୀକୁ ୨୦୪୦ ସୁଦ୍ଧା ପ୍ରତିବର୍ଷ ହାରାହାରି ୨ ଲକ୍ଷ ୮୮ ହଜାର ଶ୍ରମିକଙ୍କର ଆବଶ୍ୟକତା ରହିବ। ଏହି ରିପୋର୍ଟରେ ଆହୁରି ମଧ୍ୟ କୁହାଯାଇଛି ଯେ ଯଦି ବିଶେଷ ଭାବରେ ମହିଳା ଏବଂ ବୟସ୍କ ଶ୍ରମିକଙ୍କ ମଧ୍ୟରେ ବିଶେଷ ବୃଦ୍ଧି ନହୁଏ, ତେବେ ଜର୍ମାନୀକୁ ପ୍ରତିବର୍ଷ ୩ ଲକ୍ଷ ୬୮ ହଜାର ପ୍ରବାସୀଙ୍କର ଆବଶ୍ୟକତା ପଡ଼ିପାରେ। ଜର୍ମାନୀରେ ଶ୍ରମିକମାନଙ୍କ ଚାହିଦା ୨୦୦୦ ମସିହା କଥାକୁ ମନେ ପକାଉଛି। ଗତ ଦଶନ୍ଧିରେ, ସିରିଆ ଏବଂ ୟୁକ୍ରେନରେ ବିବାଦ ହେତୁ ଜର୍ମାନୀରେ ସ୍ଥାନାନ୍ତରଣ ହାର ୬ ଲକ୍ଷରେ ପହଞ୍ଚିଥିଲା ଏବଂ ଏହାର ପ୍ରଭାବ ସାରା ବିଶ୍ୱରେ ଶ୍ରମ ବଜାରରେ ଦେଖିବାକୁ ମିଳିଥିଲା।
ଜର୍ମାନୀରେ ଶ୍ରମିକଙ୍କର ବର୍ଦ୍ଧିତ ଚହିଦା ପଛରେ ଅନେକ କାରଣ ଅଛି। ଏଥିମଧ୍ୟରୁ ସବୁଠାରୁ ବଡ଼ କାରଣ ହେଉଛି, ସେଠାକାର ଜନସଂଖ୍ୟାର ଏକ ବଡ଼ ଅଂଶ କେବଳ ବାର୍ଦ୍ଧକ୍ୟ ବୟସର ଅଛନ୍ତି, ତେଣୁ ଏହାର ପ୍ରଭାବ ଏବେ ଦେଶର ଅର୍ଥବ୍ୟବସ୍ଥା ଉପରେ ଦେଖିବାକୁ ମିଳିଛି। ଏଥି ସହିତ, ବେବି ବୁମର୍ସ ଜେନେରେସନ୍ ଅର୍ଥାତ୍ ୧୯୪୬ ରୁ ୧୯୬୪ ମଧ୍ୟରେ ଜନ୍ମ ହୋଇଥିବା ପିଢ଼ି ବର୍ତ୍ତମାନ କର୍ମକ୍ଷେତ୍ରରୁ ବିଦାୟ ନେଇସାରିଛନ୍ତି। ଯେଉଁ କାରଣରୁ ଜର୍ମାନୀରେ କାର୍ଯ୍ୟ ଶକ୍ତି ଦ୍ରୁତ ଗତିରେ ହ୍ରାସ ପାଉଛି ଏବଂ ଏହାର ପ୍ରଭାବ ଦେଶର ଅର୍ଥନୀତିରେ ଦୃଶ୍ୟମାନ ହେବାରେ ଲାଗିଛି।
ଆସନ୍ତା ବର୍ଷ ଜର୍ମାନୀରେ ନିର୍ବାଚନ ଅନୁଷ୍ଠିତ ହେବ, ଏଭଳି ପରିସ୍ଥିତିରେ ଜର୍ମାନୀରେ ପ୍ରବାସୀ ଶ୍ରମିକଙ୍କ ପ୍ରସଙ୍ଗ ସରଗରମ ହେଉଛି। ଏହି କାରଣରୁ ବାମପନ୍ଥୀ ଦଳ ସମେତ ରାଜନୈତିକ ଦଳମାନେ ବୃଦ୍ଧି ପାଉଥିବା ଶରଣାର୍ଥୀଙ୍କୁ ସୀମିତ କରିବାକୁ ଦାବି କରୁଛନ୍ତି। ଅନ୍ୟପକ୍ଷରେ, ବର୍ଟେଲସମାନ ଷ୍ଟିଫ୍ଟଙ୍ଗର ସ୍ଥାନାନ୍ତରଣ ବିଶେଷଜ୍ଞ ସୁଜାନ ସ୍କଲ୍ଟ ବ୍ଲୁମବର୍ଗଙ୍କୁ କହିଛନ୍ତି ଯେ ବୟସ୍କମାନଙ୍କ ଅବସର ପରେ ଜର୍ମାନୀରେ କର୍ମଜୀବୀ ଅଭାବ ବୃଦ୍ଧି ପାଇବ, ଯେଉଁ କାରଣରୁ ପ୍ରବାସୀ ଶ୍ରମିକଙ୍କ ଚାହିଦା ଶୀଘ୍ର ବଢ଼ିବ।
