ଉତ୍ତରପ୍ରଦେଶ, ୧।୬: ଉତ୍ତର ପ୍ରଦେଶର ଗାଜିଆବାଦ ଅନ୍ତର୍ଗତ ଖୋଡ଼ା କଲୋନୀର ଚର୍ଚ୍ଚିତ ସୂର୍ଯ୍ୟା ଚୌହାନ ହତ୍ୟାକାଣ୍ଡ ମାମଲାରେ ଏବେ ଯୋଗୀ ପ୍ରଶାସନ ଶକ୍ତ ଆଭିମୁଖ୍ୟ ଗ୍ରହଣ କରିଛି । ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଅସଦ୍ ଏବଂ ତାର ପରିବାର ଉପରେ ପ୍ରଶାସନିକ ଚାପ ଦ୍ୱିଗୁଣିତ ହେବାରେ ଲାଗିଛି । ସାମ୍ପ୍ରତିକ କାର୍ଯ୍ୟାନୁଷ୍ଠାନ ସ୍ୱରୂପ, ଜିଲ୍ଲା ମାଜିଷ୍ଟ୍ରେଟ୍ ଏବଂ ଉପ-ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଅଭିଯୁକ୍ତ ଅସଦ୍ର ବାସଭବନ ବାହାରେ ଏକ ବଡ଼ ଧରଣର ବେଆଇନ ନିର୍ମାଣ ଉଚ୍ଛେଦ ନୋଟିସ୍ ଜାରି କରାଯାଇଛି, ଯାହା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । ଖୋଡ଼ାର ନବନୀତ ବିହାରସ୍ଥିତ ଅସଦ୍ର ବାସଭବନରେ ଗାଜିଆବାଦ ରାଜସ୍ୱ ବିଭାଗ, ତହସିଲଦାର ଏବଂ ସ୍ଥାନୀୟ ପ୍ରଶାସନର ଏକ ଉଚ୍ଚସ୍ତରୀୟ ଟିମ୍ ପୁଲିସ ଫୋର୍ସ ସହ ପହଞ୍ଚିଥିଲେ । କେବଳ ନୋଟିସ୍ ମାରି ପ୍ରଶାସନ ଚୁପ୍ ରହିନାହିଁ, ବରଂ ସେହି ଅଞ୍ଚଳରେ ଢୋଲ ବଜାଇ ଏବଂ ମାଇକ୍ ଯୋଗେ ଘୋଷଣା କରି ଆଖପାଖର ଲୋକଙ୍କୁ ଏହି କାର୍ଯ୍ୟାନୁଷ୍ଠାନ ବିଷୟରେ ଅବଗତ କରାଯାଇଛି । ପ୍ରଶାସନର ଏଭଳି ରୂପ ଦେଖି ଅପରାଧୀଙ୍କ ପରିବାର ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି ।
୧୫ ଦିନର ଅଲ୍ଟିମେଟମ୍, ନଚେତ୍ ଚାଲିବ ବୁଲଡୋଜର:
ଘଟଣାସ୍ଥଳରେ ଉପସ୍ଥିତ ତହସିଲଦାର ଏବଂ ରାଜସ୍ୱ ଅଧିକାରୀମାନେ ଗଣମାଧ୍ୟମକୁ ସୂଚନା ଦେଇଛନ୍ତି ଯେ, ସମ୍ପୃକ୍ତ ଜମି ଓ ବେଆଇନ ଭାବେ ସରକାରୀ ଜମି ଜବରଦଖଲ କରି ନିର୍ମାଣ କରାଯାଇଥିବା ନେଇ ଅନେକ ଅଭିଯୋଗ ଆସିଥିଲା । ତଦନ୍ତ ପରେ ଏହି ଅଭିଯୋଗ ସତ୍ୟ ପ୍ରମାଣିତ ହେବାରୁ ଉପ-ଜିଲ୍ଲାପାଳଙ୍କ କୋର୍ଟ ପକ୍ଷରୁ ଏହି ନୋଟିସ୍ ଜାରି କରାଯାଇଛି ।
ନୋଟିସ୍ର ମୁଖ୍ୟ ଚେତାବନୀ:
ଅଭିଯୁକ୍ତର ପରିବାରକୁ ନିଜ ଖର୍ଚ୍ଚରେ ଏହି ବେଆଇନ ନିର୍ମାଣ ହଟାଇବା ପାଇଁ ୧୫ ଦିନର ସମୟ ଦିଆଯାଇଛି ।
ଯଦି ସ୍ଥିରୀକୃତ ସମୟସୀମା ମଧ୍ୟରେ ପରିବାର ଲୋକେ ଜବରଦଖଲ ମୁକ୍ତ ନକରନ୍ତି, ତେବେ ପ୍ରଶାସନ ନିୟମାନୁସାରେ ଡିମୋଲିସନ ବା ବୁଲଡୋଜର କାର୍ଯ୍ୟାନୁଷ୍ଠାନ ଗ୍ରହଣ କରିବ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଘର ଭାଙ୍ଗିବା ପାଇଁ ବ୍ୟବହୃତ ହେବାକୁ ଥିବା ବୁଲଡୋଜର ଏବଂ ଶ୍ରମିକମାନଙ୍କ ସମସ୍ତ ଖର୍ଚ୍ଚ ମଧ୍ୟ ଅସଦ୍ର ପରିବାରଠାରୁ ଜୋରିମାନା ସ୍ୱରୂପ ଆଦାୟ କରାଯିବ ।
ନୋଟିସ୍ ଦେଖିବାକୁ ଜମିଲା ଲୋକଙ୍କ ଭିଡ଼:
ପ୍ରଶାସନ ପକ୍ଷରୁ ମାଇକରେ ଘୋଷଣା କରାଯିବା ପରେ ସେଠାରେ ଶତାଧିକ ସ୍ଥାନୀୟ ବାସିନ୍ଦା ଏକତ୍ରିତ ହୋଇଯାଇଥିଲେ । ସୂର୍ଯ୍ୟା ଚୌହାନଙ୍କ ଭଳି ଜଣେ ନିରୀହ ଯୁବକଙ୍କୁ ହତ୍ୟା କରିଥିବା ଅପରାଧୀ ବିରୋଧରେ ଏଭଳି କଡ଼ା ପଦକ୍ଷେପକୁ ଅନେକ ଲୋକ ସ୍ୱାଗତ କରିଛନ୍ତି । ବର୍ତ୍ତମାନ ସେହି ଅଞ୍ଚଳରେ ଏହି ନୋଟିସ୍ ଏକ ବଡ଼ ଚର୍ଚ୍ଚାର ବିଷୟ ପାଲଟିଛି । ଲୋକମାନେ ଦୂରଦୂରାନ୍ତରୁ ଅସଦ୍ର ଘରକୁ ଦେଖିବାକୁ ଆସୁଛନ୍ତି ଏବଂ ନିଜ ମୋବାଇଲ୍ରେ ସେହି ସରକାରୀ ନୋଟିସ୍ର ଫଟୋ ଉଠାଇ ସୋସିଆଲ ମିଡିଆରେ ଭାଇରାଲ୍ କରୁଛନ୍ତି । ଲୋକମାନେ କମେଣ୍ଟରେ ପଚାରୁଛନ୍ତି, "ଏଇଟା ସେହି ହତ୍ୟାକାରୀ ଅସଦ୍ର ଘର କି ?" ସୂର୍ଯ୍ୟା ଚୌହାନ ହତ୍ୟାକାଣ୍ଡ ପରେ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା । ଏବେ ପ୍ରଶାସନର ଏହି ଆଇନଗତ ଏବଂ ପ୍ରତିଶୋଧମୂଳକ ଆଭିମୁଖ୍ୟ ପରେ ଅଞ୍ଚଳରେ ଆଇନ ଶୃଙ୍ଖଳା ପରିସ୍ଥିତି ସୁଧୁରିବ ବୋଲି ଆଶା କରାଯାଉଛି । ୧୫ ଦିନ ପରେ ପ୍ରଶାସନ ଏହି ବେଆଇନ ସମ୍ପତ୍ତି ଉପରେ କେବେ ଏବଂ କିଭଳି ବୁଲଡୋଜର ଚଲାଉଛି, ତାହା ଉପରେ ସମସ୍ତଙ୍କ ନଜର ରହିଛି ।
ଆହୁରି ପଢ଼ନ୍ତୁ... Encounter News : ଗାଜିଆବାଦ ଛାତ୍ର ହତ୍ୟା ମାମଲା, ମୁଖ୍ୟ ଅଭିଯୁକ୍ତ ଅସଦକୁ ଏନ୍କାଉଣ୍ଟର କଲା ପୁଲିସ
