ବିରଳ ମୃତ୍ତିକାର ବିଶ୍ୱବ୍ୟାପୀ ଅଭାବ ବା ବୈଶ୍ୱିକ ସ୍ୱଳ୍ପତାକୁ ସମାଧାନ କରିବାର ଦାୟିତ୍ୱ ଚୀନର ନୁହେଁ, କାରଣ ଏହା ତାର ଯୋଜନାରେ ଅନ୍ତର୍ଭୁକ୍ତ ନୁହେଁ । ଆମ ଦେଶ ଭଳି ଏକ ବିଶାଳ ଜନସଂଖ୍ୟାର ଦେଶ ପାଇଁ କିନ୍ତୁ ଜରୁରି । ତେଣୁ ଏ କ୍ଷେତ୍ରରେ ଚୀନ ଆମର ପ୍ରତିଦ୍ୱନ୍ଦ୍ୱୀ ନୁହେଁ। ଏଥିପାଇଁ ଇଞ୍ଜିନିୟରିଂ ଟ୍ୟାଲେଣ୍ଟର ଆବଶ୍ୟକତା ଅଛି ।
ବିଶ୍ୱବିଜୟୀ ହବାର ଉଚ୍ଚାକାଂକ୍ଷା ନେଇ ହିଟଲର ପ୍ରସ୍ତୁତି ଚଳାଇଥାନ୍ତି । ସେ ଦେଖିଲେ ଜର୍ମାନୀରେ ଯେତିକି ଅଶୋଧିତ ତୈଳ ରିଜର୍ଭ ଅଛି ତାହା ଅତ୍ୟନ୍ତ ସ୍ୱଳ୍ପ । ଜରୁରିକାଳୀନ ଅବସ୍ଥାରେ ତାହା ୩ମାସରୁ ଅଧିକ ଯିବନାହିଁ । ତାରି ଉପରେ ଗବେଷଣା କରି କିପରି ଅନ୍ୟ କୌଣସି ସୂତ୍ରରୁ ପେଟ୍ରୋଲ ଡିଜେଲ ଆଦି ଉତ୍ପାଦନ କରାଯାଇପାରିବ ତାହା କରିବାପାଇଁ ନିର୍ଦ୍ଦେଶ ଦେଲେ । ତାର ଫଳସ୍ୱରୂପ କୋଇଲାରୁ ପେଟ୍ରୋଲ ପ୍ରସ୍ତୁତି ଆରମ୍ଭ ହୋଇଗଲା । ତାହାକୁ କୁହାଯାଏ ସିନ୍ଥେଟିକ୍ ପେଟ୍ରୋଲ । ଏହା ଜର୍ମାନୀର ଏୟାରଫୋର୍ସ ଲୁଫ୍ଟ ୱେଫ୍’ର ୯୨% ବିମାନ ଚାଳନାପାଇଁ ଜାଳେଣି ଭାବେ ଯଥେଷ୍ଟ ହୋଇଗଲା । ତିନି ମାସ ପାଇଁ ମାତ୍ର ଥିବା ଜାଳେଣିର ମାତ୍ରା ବୃଦ୍ଧିପାଇଁ ୫ବର୍ଷ ଧରି ଦ୍ୱିତୀୟ ବିଶ୍ୱଯୁଦ୍ଧ ଲଢ଼ିବାରେ ସାମର୍ଥ୍ୟ ସୃଷ୍ଟି କରିଦେଲା । ଏହା ହିଁ ଆବଶ୍ୟକତା ହେଉଛି ଆବିଷ୍କାର ଜନନୀର ଏକ ଜ୍ୱଳନ୍ତ ଦୃଷ୍ଟାନ୍ତ । ଅର୍ଥାତ୍ ପ୍ରତ୍ୟେକ ଆହ୍ୱାନ ଏକ ଅଭୂତପୂର୍ବ ସୁଯୋଗ ସୃଷ୍ଟିକରେ ।
ଏହା ଉଲ୍ଲେଖ କରିବାର କାରଣ, ଅଳ୍ପ କେଇଦିନ ତଳେ ଚୀନ-ଆମେରିକା ବାଣିଜ୍ୟ ଯୁଦ୍ଧ ପରିପ୍ରେକ୍ଷୀରେ ଚୀନ ଧମକ ଦେଇଛି ସମଗ୍ର ବିଶ୍ୱକୁ ସେ ରପ୍ତାନି କରୁଥିବା ରେୟାର ଆର୍ଥ ପରମାନେଣ୍ଟ ମାଗ୍ନେଟ ବା ବିରଳ ମୃତ୍ତିକାରୁ ନିର୍ମିତ ହେଉଥିବା ସ୍ଥାୟୀ ଚୁମ୍ବକକୁ ସେ ବନ୍ଦ କରିଦବ । ଏହାକୁ ନିର୍ମାଣ କରିବାରେ ଚୀନର ଅଛି ବିଶ୍ୱରେ ପ୍ରାୟ ମନୋପଲି ବା ଏକଚାଟିଆ ଅଧିକାର । ଏହାର ସରଳ ଅର୍ଥ ହେଲା, ଚୀନ ଏହାକୁ ଏକ ଶାଣିତ ଅସ୍ତ୍ରଭାବରେ ବ୍ୟବହାର କରିବାକୁ ଉଦ୍ୟତ । ଏପ୍ରିଲ ୪ ତାରିଖରେ ଚୀନ ଏହା ଘୋଷଣା କରି ଏହାର ଯୋଗାଣକୁ ହ୍ରାସ କରିଦେଇଛି ।
ଏହି ଚୁମ୍ବକ ବା ଆରଇପିଏମ ପ୍ରାୟ ସବୁ ମୋଟରଗୁଡ଼ିକରେ ବ୍ୟବହୃତ ହୁଏ । ଗୋଟିଏ ଇଲେକଟ୍ରିକ କାର୍କୁ ଚଳାଇବା, ତାର ଉଇଣ୍ଡୋ କୋଡ୍କୁ ଉପର-ତଳ କରିବା, ଷ୍ଟିଅରିଂ ହୁଇଲ୍କୁ ଚଳାଇବାରେ ସାହାଯ୍ୟ କରିବା, ବ୍ରେକକୁ ଚଳାଇବା ଇତ୍ୟାଦି ଛୋଟରୁ ଆରମ୍ଭକରି ବଡ଼ ପର୍ଯ୍ୟନ୍ତ ସବୁ ମୋଟର ଚଳାଇବାରେ ଏହି ସ୍ଥାୟୀ ଚୁମ୍ବକର ଆବଶ୍ୟକତା । ଚୀନରେ ଏହି ବିରଳ ମୃତ୍ତିକା ଗଚ୍ଛିତ ଥିବାର ପରିମାଣ ୪.୪କୋଟି ମେଟ୍ରିକ ଟନ୍³ ଯାହା ସମଗ୍ର ବିଶ୍ୱରେ ଗଚ୍ଛିତ ପରିମାଣର ୪୦% । ଏହା ସହିତ ଏହି ଗଚ୍ଛିତ ମୃତ୍ତିକାର ଉତ୍ତୋଳନ, ପ୍ରସେସିଂ କରିବା ଉପରେ ଚୀନର ସଂପୂର୍ଣ୍ଣ ନିୟନ୍ତ୍ରଣ ଅଛି । ତେଣୁ ଏହାର ମହତ୍ତ୍ୱପୂର୍ଣ୍ଣ ନିୟନ୍ତ୍ରଣ ପାଇଁ ସେ ସମଗ୍ର ବିଶ୍ୱ ଉପରେ ନିଜର କର୍ତ୍ତୃତ୍ୱ ଜାହିର କରିବାକୁ ଆରମ୍ଭ କରିଛି ଗ୍ଲୋବାଲ ମାର୍କେଟରେ । ଚୀନ ବହୁ ଆଗରୁ ଏହି ବିରଳ ମୃତ୍ତିକାଗୁଡ଼ିକର ମୂଲ୍ୟ ବିଷୟରେ ଅବଗତ ଓ ଚାହିଦା ଉପରେ ବି ଅବଗତ । ଗତ କିଛି ସପ୍ତାହ ହେଲା ଚୀନର ଧମକ ପରିପ୍ରେକ୍ଷୀରେ ୟୁରୋପୀୟ ଓ ପାଶ୍ଚାତ୍ୟ ରାଷ୍ଟ୍ରଗୁଡ଼ିକର କାର୍ ନିର୍ମାଣକାରୀ ସଂସ୍ଥାଗୁଡ଼ିକ କାର୍ ନିର୍ମାଣ କରିବାକୁ ଆରମ୍ଭ କରିଛନ୍ତି, ଯାହାର କେତେଗୁଡ଼ିଏ କମ୍ପୋନେଣ୍ଟରୁ ବିରଳ ମୃତ୍ତିକା ଚୁମ୍ବକର ବ୍ୟବହାରକୁ ଆଡେଇ ଯାଇଛନ୍ତି । ଆମ ଦେଶର ମାରୁତି କମ୍ପାନୀ ମଧ୍ୟ ଏହାର ପ୍ରଥମ ବ୍ୟାଚର ଇଲେକଟ୍ରିକ୍ କାର୍ ନିର୍ମାଣରେ ଏହି ଚୁମ୍ବକ ବ୍ୟବହାରକୁ ଆଡ଼େଇ ଦବାକୁ ପ୍ଲାନ କରିଛି ଏହାର ଅଭାବକୁ ଦୃଷ୍ଟିରେ ରଖି ।
ଏଠାରେ ଉଲ୍ଲେଖଯୋଗ୍ୟ, ଏହି ଚୁମ୍ବକଗୁଡ଼ିକରେ ପାଖାପାଖି ୨୫% ଏକ ବିରଳ ମୃତ୍ତିକା ବ୍ୟବହୃତ ହୋଇଥାଏ, ଯାହାର ନାମ ନିଡୋଇମିୟମ୍ । ଏହି ହାଲ୍କା ବିରଳ ମୃତ୍ତିକା ମଧ୍ୟ ଆମ ଦେଶରେ ଗଚ୍ଛିତ ଅଛି । ଏହାର ଉତ୍ତୋଳନ, ବିଶୁଦ୍ଧକରଣ ଓ ପ୍ରକ୍ରିୟାକରଣକୁ ଆମ ଦେଶ ସେତେ ଗୁରୁତ୍ୱ ଦେଇନାହିଁ, କାରଣ ଏଥିପାଇଁ ଯେତେ ଖର୍ଚ୍ଚ ହେବ ତା’ଠାରୁ ଯଥେଷ୍ଟ କମ୍ ଖର୍ଚ୍ଚରେ ଚୀନଠାରୁ ଏହା କ୍ରୟ କରାଯାଇଥାଏ । ତେଣୁ ଏଥିପାଇଁ ବିପୁଳ ଅର୍ଥ ବିନିଯୋଗ କରିବା ଏକ ଆକର୍ଷଣୀୟ ଯୋଜନା ଆଦୌ ନୁହେଁ । କିନ୍ତୁ ଏବେ? ଏହି ପ୍ରସେସିଂ ପାଇଁ କିପରି କମ୍ ଖର୍ଚ୍ଚ ହେବ ସେଥିପାଇଁ ଧ୍ୟାନ ଦେବାର ସମୟ ଆସିଯାଇଛି । ଏହି ବିରଳ ମୃତ୍ତିକାର ବିଶ୍ୱବ୍ୟାପୀ ଅଭାବ ବା ବୈଶ୍ୱିକ ସ୍ୱଳ୍ପତାକୁ ସମାଧାନ କରିବାର ଦାୟିତ୍ୱ ଚୀନର ନୁହେଁ, କାରଣ ଏହା ତାର ଯୋଜନାରେ ଅନ୍ତର୍ଭୁକ୍ତ ନୁହେଁ । ଆମ ଦେଶ ଭଳି ଏକ ବିଶାଳ ଜନସଂଖ୍ୟାର ଦେଶ ପାଇଁ କିନ୍ତୁ ଜରୁରି । ତେଣୁ ଏ କ୍ଷେତ୍ରରେ ଚୀନ ଆମର ପ୍ରତିଦ୍ୱନ୍ଦ୍ୱୀ ନୁହେଁ । ଏଥିପାଇଁ ଇଞ୍ଜିନିୟରିଂ ଟ୍ୟାଲେଣ୍ଟର ଆବଶ୍ୟକତା ଅଛି । ଏହାର ତ ଅଭାବ ନାହିଁ । କିନ୍ତୁ ଏ କ୍ଷେତ୍ରରେ ଦୃଷ୍ଟିନିବଦ୍ଧ କରିବା ଏଯାଏଁ ସେପରି ହୋଇନାହିଁ ।
ଏହାର ଆବଶ୍ୟକତା ଏଥିପାଇଁ ଯେ ଚୀନ ବିରୁଦ୍ଧରେ ଏକ ବିକଳ୍ପ ସପ୍ଲାଏ ଚେନ ଆମ ଦେଶ ସୃଷ୍ଟି କରିପାରିବ । ଇଣ୍ଡିଆନ ରେୟାର ଆର୍ଥ ଲିମିଟେଡ ଆମ ଦେଶରେ ୧୯୫୦ ମସିହାରୁ କାର୍ଯ୍ୟ କରୁଛି । ଏହାକୁ ଯେବେ ପ୍ରତିଷ୍ଠା କରାଯାଇଥିଲା ସେଥିରେ ମୋନାଜାଇଟ ସ୍ୟାଣ୍ଡକୁ, ଯାହା କେରଳର ସମୁଦ୍ର ଉପକୂଳରେ ମିଳେ ତାକୁ ପ୍ରସେସିଂ କରିବାପାଇଁ ଉଦ୍ଦିଷ୍ଟ ଥିଲା । ଆଉ ମଧ୍ୟ ଟାଇଟାନିୟମକୁ ପାଇବା ପାଇଁ ଲିମୋନାଇଟ ସ୍ୟାଣ୍ଡକୁ ପୃଥକ ଭାବେ ବ୍ୟବହାର କରାଯାଇଥିଲା । ମୋନାଜାଇଟରୁ ଥୋରିୟମକୁ ପୃଥକୀକରଣ କରାଯାଉଥିଲା, କାରଣ ଏହି ଥୋରିୟମରୁ ନ୍ୟୁକ୍ଲିୟର ଏନର୍ଜି ପ୍ରାପ୍ତହେବା ଆମ ଦେଶୀୟ ଗବେଷଣାର ଏକ ମୁଖ୍ୟ ପ୍ରସଙ୍ଗ । ଆମ ଦେଶର ପରମାଣୁ ଅସ୍ତ୍ର, ବିଦ୍ୟୁତ ଶକ୍ତି ଉତ୍ପନ୍ନ ପାଇଁ ଥୋରିୟମ ବ୍ୟବହୃତ ହୁଏ ନ୍ୟୁକ୍ଲିୟର ପାୱାର ପ୍ଲାଣ୍ଟଗୁଡ଼ିକରେ । ଏହି ରେୟାର ଆର୍ଥ ଲିମିଟେଡର ଆଉ ଏକ ପ୍ଲାଣ୍ଟ ଆମ ରାଜ୍ୟରେ ମଧ୍ୟ ସ୍ଥାପିତ ହୋଇଛି । ପୁଣି ପୂର୍ବାଞ୍ଚଳ ପର୍ବତ ଶ୍ରେଣୀରେ ଅନେକ ପରିମାଣରେ ବିରଳ ମୃତ୍ତିକା ଗଚ୍ଛିତ ଅଛି, ଯାହାକୁ ଏପର୍ଯ୍ୟନ୍ତ ଉତ୍ତୋଳନ କରାଯିବା ଆରମ୍ଭ ହୋଇନାହିଁ ।
ଏଠାରେ ଉଲ୍ଲେଖନୀୟ, ବିରଳ ମୃତ୍ତିକା ବ୍ୟବହାର ବିନା ହୁଏତ ମୋଟର ନିର୍ମାଣ ସମ୍ଭବ । କିନ୍ତୁ ଟିଭି ସ୍କ୍ରିନ୍ସ, କମ୍ପୁଟର୍ସ, ଏମଆରଇଆଇ ମେସିନ୍ସ ଆଦି ନିର୍ମାଣ କରିବା ଅସମ୍ଭବ । ସେଥିପାଇଁ ଏକ ବିଶାଳ ବିରଳ ମୃତ୍ତିକା ଶିଳ୍ପ ଆମ ଦେଶରେ ପ୍ରତିଷ୍ଠା ହେବା ଅତ୍ୟନ୍ତ ଜରୁରି । ଆମ ଦେଶ ହେଉଛି ବିରଳ ମୃତ୍ତିକା ଗଚ୍ଛିତ ଥିବାର ପଞ୍ଚମ ବୃହତ୍ତମ ରାଷ୍ଟ୍ର । ଦକ୍ଷିଣ ଆଫ୍ରିକାର କେପ୍ ରାଜ୍ୟରେ ଗଚ୍ଛିତ ଅଛି ପାଖାପାଖି ୮୬ହଜାର ୯ଶହ ଟନ୍ ବିରଳ ମୃତ୍ତିକା ଅକସାଇଡ୍ । ବିଶେଷ ଭାବରେ ନିଓଡାଇମିୟମ ଓ ପ୍ରାସୋଡାଇମିୟମ, ଯାହାକି ଅତ୍ୟନ୍ତ ଉଚ୍ଚମାନର ଓ ଭାରତ ସହିତ ଦ.ଆଫ୍ରିକାର ସୁସଂପର୍କ ଅଛି ।
ସେଠାରୁ ପ୍ରଚୁର ପରିମାଣରେ ଆମ ଦେଶ ଆମଦାନୀ କରିବାକୁ ସକ୍ଷମ । ଏଗୁଡ଼ିକର ବ୍ୟବହାର ହାଇ-ଟେକ୍ନୋଲୋଜି ଆପ୍ଲିକେସନରେ ଇଲେକଟ୍ରୋନିକ୍ସ ବିଦ୍ୟୁତଚାଳିତ ଯାନବାହନ ଓ ସାମରିକ ଉତ୍ପାଦନ କ୍ଷେତ୍ରରେ । ତେବେ ଆମ ଦେଶ ବା ଅନେକ ପାଶ୍ଚାତ୍ୟ ରାଷ୍ଟ୍ର ଏହି ବିରଳ ମୃତ୍ତିକା କ୍ଷେତ୍ରକୁ ଏତେ ଗୁରୁତ୍ୱ ନେଇନାହାଁନ୍ତି, କାରଣ ଖଣିଜରୁ ଏହି ବିରଳ ମୃତ୍ତିକାକୁ ପୃଥକ୍ କରିବା ଏକ ସମୟସାପେକ୍ଷ ବ୍ୟବହୁଳ ଓ ଅତ୍ୟଧିକ ପ୍ରଦୂଷଣ ସୃଷ୍ଟିକାରୀ ପ୍ରକ୍ରିୟା । ତେଣୁ ଚୀନ ଉପରେ ଛାଡ଼ି ଦେଇଛନ୍ତି ଏହି ଶିଳ୍ପକୁ ନିଜ ଦେଶର ଗଚ୍ଛିତ ଅଙ୍ଗ ଉପରେ ଧ୍ୟାନ ନଦେଇ । ତେଣୁ ଚୀନ ୯୦% ବିରଳ ମୃତ୍ତିକା ଉପରେ ନିୟନ୍ତ୍ରଣ ଜାହିର କରି ରଖିଛି । କେତେଗୁଡ଼ିଏ ବିରଳ ମୃତ୍ତିକା ଅଛି ଯେଉଁଗୁଡ଼ିକର ବ୍ୟବହାର ଫସ୍ଫର ଭାବରେ ଏଲଇଡିଗୁଡ଼ିକରେ, ରଙ୍ଗୀନ ପର୍ଦ୍ଦାରେ ରଙ୍ଗ ନିର୍ଭୁଲ ପାଇଁ, ଲେଜର ରଶ୍ମିର ୱେଭଲେଙ୍ଗ୍ଥର ଟ୍ୟୁନିଂ ପାଇଁ ଯେବେ ସେଗୁଡ଼ିକ ଗତିକରନ୍ତି ଅପଟିକାଲ ଫାଇବର କେବୁଲରେ । ଏ କ୍ଷେତ୍ରରେ ବିରଳ ମୃତ୍ତିକାର ବ୍ୟବହାରର ବିକଳ୍ପ ଏତେ ସହଜରେ ମିଳିବା ସମ୍ଭପର ନୁହେଁ । ଏଠାରେ ଅବଶ୍ୟ ଉଲ୍ଲେଖନୀୟ, ଏଗୁଡ଼ିକୁ ବିରଳ ମୃତ୍ତିକା କହିବା ମାନେ ନୁହେଁ- ଏଗୁଡ଼ିକ ବିରଳ ଆମ ପୃଥିବୀରେ । ବରଂ ଏଗୁଡ଼ିକର ଉତ୍ତୋଳନ କଷ୍ଟସାଧ୍ୟ ଅର୍ଥବ୍ୟୟ ଦୃଷ୍ଟିରୁ, କିନ୍ତୁ ସେଗୁଡ଼ିକ ଅତ୍ୟନ୍ତ ଆବଶ୍ୟକ ଆଧୁନିକ ଟେକ୍ନୋଲୋଜି ବ୍ୟବହାରରେ । ଏହି ବିରଳ ଧାତୁର ସଂଖ୍ୟା ୧୭ । ସେଥିରୁ ୧୫ଟି ଲାନ୍ଥାନାଇଡ୍ସ ପାରମାଣବିକ କ୍ରମାଙ୍କ ୫୭ରୁ ୭୧ ଓ ତା’ ସହିତ ଆଉ ଦୁଇଟି ସ୍ନାଣ୍ଡିୟମ ଓ ୟଟ୍ରିୟମ୍ । ସେଗୁଡ଼ିକର ବିଶେଷ ରୂପେ ବ୍ୟବହାର ସ୍ଥାୟୀ ଚୁମ୍ବକ ଭାବରେ ଯେଉଁଥିରେ ବ୍ୟବହୃତ ହୁଏ ନିଓଡାଇମିୟମ୍, ପ୍ରାସିଓଡାଇମିୟମ ଓ ଡାଇ-ସ୍ପ୍ରୋସିଅମ ।
ଏହି ଚୁମ୍ବକଗୁଡ଼ିକ ଉଚ୍ଚତମ କ୍ଷମତାସଂପନ୍ନ ଓ ବ୍ୟବହୃତ ହୁଅନ୍ତି ବିଦ୍ୟୁତଚାଳିତ ଯାନବାହନ, ଉଇଣ୍ଡ ଟର୍ବାଇନ ଓ ଇଲେକଟ୍ରନିକ୍ସରେ, ଉଡ଼ାଜାହାଜ, ଟ୍ରେନ, କାର୍,ଫ୍ୟାନ, ଫ୍ୟାକଟ୍ରି, ଏସି, କମ୍ପୁଟରଗୁଡ଼ିକରେ । ଇଣ୍ଡକ୍ସନ ମୋଟରଗୁଡ଼ିକର ନିର୍ମାଣ ସହଜ, କାରଣ ସେଗୁଡ଼ିକ ପ୍ରାୟ ଅସ୍ଥାୟୀ ଚୁମ୍ବକ ଆବଶ୍ୟକ କରନ୍ତି । ଏଗୁଡ଼ିକର ସାମର୍ଥ୍ୟ କମ୍ ସ୍ଥାୟୀ ଚୁମ୍ବକ ଦେଇ ନିର୍ମିତ ହେଉଥିବା ମୋଟର ତୁଳନାରେ । ଏହି ସ୍ଥାୟୀ ଚୁମ୍ବକ ପାଇଁ ଆବଶ୍ୟକ ନିଓଡାଇମିୟମ ଓ ଡାଇ-ସ୍ପ୍ରୋସିଅମ ସହିତ ଲୌହ ଓ ବୋରନକୁ ମିଶ୍ରଣ କରି ପ୍ରସ୍ତୁତ କରାଯାଉଥିବା ଆଲୟ । ଏଥିପାଇଁ ପ୍ରତିବର୍ଷ ଆମ ଦେଶ ୧୬ହଜାର କୋଟି ଟଙ୍କାର ନିୟୋପରମିୟମ ଚୀନରୁ ଆମଦାନୀ କରେ । ଏହି ଚୁମ୍ବକ ଲୌହନିର୍ମିତ ଚୁମ୍ବକଠାରୁ ୧୨ଗୁଣା ଶକ୍ତିଶାଳୀ ।
ସେହିଭଳି ଆଉ ଏକ ବିରଳ ଧାତୁ ସମାରିଅମ ସହିତ କୋବାଲଟର ଆଲୟରୁ ପ୍ରସ୍ତୁତ ଚୁମ୍ବକ ଲୌହନିର୍ମିତ ଚୁମ୍ବକଠାରୁ ୮ଗୁଣା ଶକ୍ତିଶାଳୀ, ଯାହା କାର୍ଯ୍ୟ କରିପାରିବ ବିଯୁକ୍ତ ୨୭୩ ଡିଗ୍ରୀରୁ ୩୫୦ ଡିଗ୍ରୀ ସେଲସିୟସ ତାପମାତ୍ରା ମଧ୍ୟରେ । ଏହି ଚୁମ୍ବକଗୁଡ଼ିକ ଉପରେ ଚୀନର ଆଧିପତ୍ୟ ସମଗ୍ର ବିଶ୍ୱକୁ ବ୍ଲାକମେଲ କରିବା ଉଦ୍ଦେଶ୍ୟରେ । ଅବଶ୍ୟ ଶସ୍ତାରେ ଜିନିଷ କିଣିବା ଆର୍ଥିକ ଦୃଷ୍ଟିରୁ ଉତ୍ତମ । କିନ୍ତୁ ଏହା ସହିତ ସର୍ବଦା ଜଡ଼ିତ ଥାଏ ଷ୍ଟ୍ରାଟେଜିକ ରିସ୍କ ବା କୌଶଳଗତ ସଙ୍କଟ, ଯାହା ଏବେ ଚୀନ ସୃଷ୍ଟି କରିଚାଲିଛି । ଯେପରିକି ଆମ ଦେଶ ନିଜ ଚାହିଦାର ଔଷଧ ଉତ୍ପାଦନ ପାଇଁ ଚୀନ ପାଖରୁ ୭୦ ପ୍ରତିଶତ ଆକ୍ଟିଭ, ଇନଗ୍ରେଡିଏଣ୍ଟ ଖରିଦ କରୁଛି । ଚୀନ ଏହାକୁ ଆୟୁଧ କରି ଆମକୁ ଯେକୌଣସି ମୁହୂର୍ତ୍ତରେ ସଙ୍କଟରେ ପକାଇ ଦେଇପାରେ ।
ଏଠାରେ ବିରଳ ମୃତ୍ତିକା ବ୍ୟବହାରକୁ ହ୍ରାସକରି ଆଉ ଏକ ନୂତନ ଟେକ୍ନୋଲୋଜିର ବ୍ୟବହାର ବିଷୟରେ ଉଲ୍ଲେଖ କରିବା ଜରୁରି । ସ୍ଥାୟୀ ଚୁମ୍ବକର ବ୍ୟବହାରକୁ ହ୍ରାସ କରି ସେହିଭଳି ଶକ୍ତିଶାଳୀ ମୋଟର ନିର୍ମାଣ ସମ୍ଭବ । ତାହା ହେଲା ମାଗ୍ନେଟିକ ରେଲୁକଟାନ୍ସ ବା ଚୁମ୍ବକୀୟ ପ୍ରତିରୋଧ ବା ଚୁମ୍ବକୀୟ ଅନିଚ୍ଛା । ଭିନ୍ନ ଭିନ୍ନ ପ୍ରକାରର ରେଲୁକଟାନ୍ସ ମୋଟର ଏବେ ମଧ୍ୟ ନିର୍ମିତ ହୋଇଚାଲିଛି । ଏଗୁଡ଼ିକୁ ଆଗରୁ ନିୟନ୍ତ୍ରଣ କରାଯାଇ ପାରୁନଥିଲା । ଆଧୁନିକ ମାଇକ୍ରୋ ଇଲେକଟ୍ରୋନିକ୍ସର ଆବିଷ୍କାର ପରେ ୧୯୯୦ ମସିହାରୁ ଏହି ମୋଟରଗୁଡ଼ିକୁ ନିୟନ୍ତ୍ରଣ କରିବା ସମ୍ଭବ ହୋଇଛି । ମୋଟର କମ୍ପାନୀ ଟେସଲାର ମଡେଲ-୩ ବ୍ୟବହାର କରୁଛି ସ୍ଥାୟୀ ମାଗ୍ନେଟିକ ମଟର ସହିତ ରେଲୁକଟାନ୍ସ ମଟରକୁ ଯୋଡ଼ିଦେଇ ଏବଂ ଅତି ସୁପରିଅର ଏଫିସିଏନ୍ସି ସୃଷ୍ଟି କରିବା ସମ୍ଭବ ହୋଇଛି । ଆମରି ଇଞ୍ଜିନିୟର ଓ ଗବେଷକମାନଙ୍କ ଉପରେ ନିର୍ଭର କରୁଛି ଏହାର ଭବିଷ୍ୟତ ।
