କଟକ,୨୮/୧୧: କଟକରେ ମାତିଛନ୍ତି ଲୁଟେରା । ଦ୍ବିତୀୟ ଦିନରେ କଟକ ତିଗିରିଆ ଥାନା ନିଜିଗଡ଼ରେ ବାଡ଼ି କବାଟ ତାଡି କରିଲେ ଲୁଟ୍ । ଲକ୍ଷାଧିକ ଟଙ୍କାର ସୁନା ଅଳଙ୍କାର ଏବଂ ନଗଦ ୨୦ ହଜାର ଟଙ୍କା ଲୁଟି ନେଲେ ଦୁର୍ବୃତ୍ତ । କଟକ ଜିଲ୍ଲା ତିଗିରିଆ ଥାନା ଅନ୍ତର୍ଗତ ତିଗିରିଆ ଗୋହିରିମୁଣ୍ଡ ଛକରେ ଏଭଳି ଘଟଣା ଘିଟିଛି ।
ସୂଚନା ମୁତାବକ, କୁଟାରିମାଲ ଗ୍ରାମର ଜିତେନ୍ଦ୍ର ନାୟକଙ୍କ ତିଗିରିଆ ଅଞ୍ଚଳରେ ଏକ ଭଡ଼ା ଘରେ ରହୁଥିଲେ । ବୁଧବାର ବିଳମ୍ୱିତ ରାତିରେ ଲୁଟେରା ମାନେ ଘରର ବାଡ଼ି କବାଟ ତାଡି ଘରେ ପଶିଥିଲେ । ଘରେ ପଶି ଆଲମୀରା ଭାଙ୍ଗି ଲକ୍ଷାଧିକ ଟଙ୍କାର ସୁନା ଅଳଙ୍କାର, ନଗଦ ୨୦ ହଜାର ଟଙ୍କା ଲୁଟି ନେଇଥିଲେ । ଗୁରୁବାର ସକାଳୁ ଘରୁ ଲୁଟ୍ ହୋଇଥିବା ନେଇ ଜିତେନ୍ଦ୍ର ଜାଣିବାକୁ ପାଇଥିଲେ । ଏନେଇ ଜିତେନ୍ଦ୍ର ତିଗିରିଆ ଥାନାରେ ଅଭିଯୋଗ କରିଥିଲେ । ଏକ ମାମଲା ରୁଜୁ କରି ସାଇଣ୍ଟିଫିକ୍ ଟିମ୍ ସାହାଯ୍ୟରେ ଘଟଣାର ତଦନ୍ତ ଚଳାଇଛି ପୋଲିସ ।
ତେବେ ମଙ୍ଗଳବାର ବିଳମ୍ବିତ ରାତିରେ ନିଜିଗଡ଼ର ସୁଶିଲ ନନ୍ଦଙ୍କ ଘରୁ ଏହିଭଳି ଢଙ୍ଗରେ ୧୨ ଲକ୍ଷ ଟଙ୍କାର ସୁନା ଅଳଙ୍କାର ଓ ନଗଦ ୨୧ ହଜାର ଟଙ୍କା ଚୋରି ହୋଇଥିବା ଅଭିଯୋଗ ହୋଇଥିଲା । ଲଗାତାର ଦୁଇଟି ଦିନରେ ଦୁଇଥର ଲୁଟ୍ ଘଟଣା ପୋଲିସର ମୁଣ୍ଡବିନ୍ଧାର କାରଣ ସାଜିଛି ।
