ନୂଆଦିଲ୍ଲୀ, ୨୯।୪: ବିଶ୍ୱ ବଜାରରେ ଆମେରିକୀୟ ଡଲାର ଶକ୍ତିଶାଳୀ ହେବା ଏବଂ ଅଶୋଧିତ ତୈଳ ଦର ବୃଦ୍ଧି ପାଇବା ଯୋଗୁଁ ସୁନା ମୂଲ୍ୟରେ ଏକ ବଡ଼ ଧରଣର ହ୍ରାସ ଦେଖିବାକୁ ମିଳିଛି । ମଙ୍ଗଳବାର ସୁନା ଦର ପ୍ରାୟ ଏକ ମାସର ସର୍ବନିମ୍ନ ସ୍ତରକୁ ଖସି ଆସିଛି । ବିଶ୍ୱର ବିଭିନ୍ନ କେନ୍ଦ୍ରୀୟ ବ୍ୟାଙ୍କଗୁଡ଼ିକ ପକ୍ଷରୁ ସୁଧ ହାର ନିଷ୍ପତ୍ତିକୁ ନେଇ ଚାଲିଥିବା କଳ୍ପନାଜଳ୍ପନା ମଧ୍ୟରେ ସୁନା ବଜାରରେ ଏହି ମାନ୍ଦାବସ୍ଥା ଦେଖାଦେଇଛି । ମଙ୍ଗଳବାର ବଜାର ବନ୍ଦ ହେବା ସୁଦ୍ଧା ସ୍ପଟ୍ ଗୋଲ୍ଡ ମୂଲ୍ୟ ୧.୮ ପ୍ରତିଶତ ହ୍ରାସ ପାଇ ପ୍ରତି ଆଉନ୍ସ ପିଛା ୪,୫୯୭.୦୬ ଡଲାରରେ ପହଞ୍ଚିଛି । ସେହିପରି ସୁନା ଫ୍ୟୁଚର୍ସ ମଧ୍ୟ ୧.୮ ପ୍ରତିଶତ କମି ୪,୬୦୯.୩୫ ଡଲାର ସ୍ତରକୁ ଖସି ଆସିଛି । ଅନ୍ତର୍ଜାତୀୟ ବଜାରରେ ଡଲାରର ମୂଲ୍ୟ ବଢ଼ିବା ଯୋଗୁଁ ଅନ୍ୟ ମୁଦ୍ରା ବ୍ୟବହାର କରୁଥିବା ନିବେଶକଙ୍କ ପାଇଁ ସୁନା କିଣିବା ମହଙ୍ଗା ହୋଇପଡ଼ିଛି, ଯାହାର ପ୍ରଭାବ ସିଧାସଳଖ ଚାହିଦା ଉପରେ ପଡ଼ିଛି ।
ବର୍ତ୍ତମାନର ଭୂ-ରାଜନୈତିକ ସ୍ଥିତି ମଧ୍ୟରେ ଡଲାର ଏକ 'ସେଫ୍ ହେଭେନ୍' ବା ସୁରକ୍ଷିତ ନିବେଶ ଭାବେ ଉଭା ହୋଇଛି । ଆମେରିକା ଏକ ପ୍ରମୁଖ ଶକ୍ତି ରପ୍ତାନିକାରୀ ଦେଶ ହୋଇଥିବାରୁ ତୈଳ ଯୋଗାଣରେ ବାଧା ସତ୍ତ୍ୱେ ଡଲାରର ସ୍ଥିତି ମଜଭୁତ ରହିଛି । ଅନ୍ୟପଟେ, ଇରାନ ଏବଂ ଆମେରିକା ମଧ୍ୟରେ ଚାଲିଥିବା ଉତ୍ତେଜନା ସୁନା ଓ ତୈଳ ବଜାରକୁ ପ୍ରଭାବିତ କରୁଛି । ରିପୋର୍ଟ ଅନୁଯାୟୀ, ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନର ସାମ୍ପ୍ରତିକ ପ୍ରସ୍ତାବରେ ଅସନ୍ତୁଷ୍ଟ ଅଛନ୍ତି । ବିଶେଷ କରି ହର୍ମୁଜ ପ୍ରଣାଳୀ ବନ୍ଦ ରହିବା ଯୋଗୁଁ ବିଶ୍ୱର ପ୍ରାୟ ୨୦ ପ୍ରତିଶତ ଅଶୋଧିତ ତୈଳ ଯୋଗାଣ ବାଧାପ୍ରାପ୍ତ ହୋଇଛି, ଯାହା ତୈଳ ଦରକୁ ଆହୁରି ବଢ଼ାଇ ଦେଇଛି ।
କେନ୍ଦ୍ରୀୟ ବ୍ୟାଙ୍କଗୁଡ଼ିକ ଉପରେ ନଜର:
ଚଳିତ ସପ୍ତାହରେ ବିଶ୍ୱର ପ୍ରାୟ ୧୦ଟି ପ୍ରମୁଖ କେନ୍ଦ୍ରୀୟ ବ୍ୟାଙ୍କ ସୁଧ ହାର ସମ୍ପର୍କରେ ନିଷ୍ପତ୍ତି ନେବାକୁ ଯାଉଛନ୍ତି । ତୈଳ ଦର ବଢ଼ିଲେ ମୁଦ୍ରାସ୍ଫୀତି ବଢ଼ିବା ଆଶଙ୍କା ରହିଛି, ଯାହାକୁ ନିୟନ୍ତ୍ରଣ କରିବା ପାଇଁ ବ୍ୟାଙ୍କଗୁଡ଼ିକ ସୁଧ ହାର ବଢ଼ାଇ ପାରନ୍ତି । ସାଧାରଣତଃ ସୁଧ ହାର ବଢ଼ିଲେ ସୁନା ଦର ହ୍ରାସ ପାଇଥାଏ ।ମଙ୍ଗଳବାର ଜାପାନର କେନ୍ଦ୍ରୀୟ ବ୍ୟାଙ୍କ ସୁଧ ହାରକୁ ୦.୭୫% ରେ ଅପରିବର୍ତ୍ତିତ ରଖିଛି । ତେବେ ବ୍ୟାଙ୍କ ଚେତାବନୀ ଦେଇଛି ଯେ, ମଧ୍ୟପ୍ରାଚ୍ୟ ଯୁଦ୍ଧ ଯୋଗୁଁ ଆଗକୁ ମୁଦ୍ରାସ୍ଫୀତି ବଢ଼ିପାରେ । ଚଳିତ ସପ୍ତାହ ଶେଷ ସୁଦ୍ଧା ଆମେରିକାର ଫେଡେରାଲ ରିଜର୍ଭ, ୟୁରୋପୀୟ କେନ୍ଦ୍ରୀୟ ବ୍ୟାଙ୍କ ଏବଂ ବ୍ୟାଙ୍କ ଅଫ୍ ଇଂଲଣ୍ଡ ମଧ୍ୟ ସେମାନଙ୍କର ସୁଧ ହାର ନୀତି ଘୋଷଣା କରିବେ ।
ନିବେଶକଙ୍କ ପାଇଁ କ’ଣ ରହିଛି ସଙ୍କେତ ?
ବଜାର ବିଶ୍ଳେଷକଙ୍କ ଅନୁଯାୟୀ, ଯଦି ତୈଳ ଯୋଗାଣ ସ୍ୱାଭାବିକ ନ ହୁଏ ଏବଂ ମୁଦ୍ରାସ୍ଫୀତି ବଢ଼େ, ତେବେ ଆଗକୁ ସୁନା ଦରରେ ଆହୁରି ଅସ୍ଥିରତା ଦେଖାଦେଇପାରେ । ବର୍ତ୍ତମାନ ପାଇଁ ନିବେଶକମାନେ କେନ୍ଦ୍ରୀୟ ବ୍ୟାଙ୍କଗୁଡ଼ିକର ଆଭିମୁଖ୍ୟକୁ ଅପେକ୍ଷା କରିଛନ୍ତି ।
