ନୂଆଦିଲ୍ଲୀ,୨୨/୧୦: ହ୍ୱାଉଟ୍ ହାଉସରେ ଦୀପାବଳି ପାଳିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ସେଠାରେ ରହୁଥିବା ଭାରତୀୟଙ୍କୁ ଶୁଭେଚ୍ଛା ଜଣାଇଛନ୍ତି । ଏହା ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମଧ୍ୟ ଫୋନ୍ କରି ଦୀପାବଳି ଶୁଭେଚ୍ଛା ଦେଇଛନ୍ତି । ଦୁହିଁଙ୍କ ମଧ୍ୟରେ ଭଲ ଆଲୋଚନା ହୋଇଛି । ବାଣିଜ୍ୟିକ କାରବାର ଉପରେ ଚର୍ଚ୍ଚା ହୋଇଥିବା କହିଛନ୍ତି ଡୋନାଲ୍ଡ ଟ୍ରମ୍ପ । ରାଷ୍ଟ୍ରପତିଙ୍କ ଟ୍ରମ୍ପଙ୍କ ଫୋନ୍‌ କଲରେ ଶୁଭେଚ୍ଛାକୁ ନେଇ ଧନ୍ୟବାଦ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆତଙ୍କବାଦ ବିରୋଧରେ ଏକାଠୀ ଛିଡା ହେବେ ବୋଲି ଏକ୍ସରେ କହିଛନ୍ତି ପ୍ରଧାନମନ୍ତ୍ରୀ ।

ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି, "ମୁଁ ଭାରତର ଲୋକଙ୍କୁ ଭଲ ପାଏ । ଦୁଇ ଦେଶ ମଧ୍ୟରେ କିଛି ବଡ଼ ଚୁକ୍ତି ହେବା ଉପରେ କାମ କରୁଛୁ । ମୁଁ ଆଜି ପ୍ରଧାନମନ୍ତ୍ରୀ ମୋଦିଙ୍କ ସହ ଫୋନ୍‌ରେ କଥା ହୋଇଥିଲି ଏବଂ ଆମର ବହୁତ ଭଲ ସମ୍ପର୍କ ଅଛି । ସେ ରୁଷରୁ ଅଧିକ ତେଲ କିଣିବେ ନାହିଁ । ସେ ମୋ ପରି ସେହି ଯୁଦ୍ଧର ଅନ୍ତ ଦେଖିବାକୁ ଚାହାଁନ୍ତି । ସେ ରୁଷ ଏବଂ ୟୁକ୍ରେନ ମଧ୍ୟରେ ଯୁଦ୍ଧର ଅନ୍ତ ଦେଖିବାକୁ ଚାହାଁନ୍ତି । ସେମାନେ ରୁଷଠୁ ଅଧିକ ତେଲ କିଣିବେ ନାହିଁ । ତେଣୁ ସେମାନେ ଏହାକୁ ବହୁତ ହ୍ରାସ କରି ଚାଲିଛନ୍ତି । "

ଧନ୍ୟବାଦ ଦେଲେ ପ୍ରଧାନମନ୍ତ୍ରୀ ମୋଦି - ରାଷ୍ଟ୍ରପତି ଟ୍ରମ୍ପଙ୍କ ଫୋନ୍‌ କଲରେ ଦୀପାବଳି ଶୁଭେଚ୍ଛା ନେଇ ଧନ୍ୟବାଦ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସୋସିଆଲ ମିଡିଆ ଏକ୍ସରେ କହିଛନ୍ତି,   ''ଫୋନ କଲ୍ ଏବଂ ଦୀପାବଳିର ହାର୍ଦ୍ଦିକ ଶୁଭେଚ୍ଛା ପାଇଁ ଧନ୍ୟବାଦ । ଆଲୋକର ଏହି ପର୍ବରେ, ଆମ ଦୁଇଟି ମହାନ୍ ଗଣତନ୍ତ୍ର ବିଶ୍ୱକୁ ଆଶାରେ ଆଲୋକିତ କରିବା ଏବଂ ଆତଙ୍କବାଦ ବିରୁଦ୍ଧରେ ଏକତ୍ରିତ ହେବା ।''

ସିଜଫାୟାରର ଶ୍ରେୟ ନେଲେ- ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥିରେ ଭାରତ ଓ ପାକିସ୍ତାନ ମଧ୍ୟରେ ଅସ୍ତ୍ରବିରତି  କରାଇଥିବାର ଶ୍ରେୟ ନେଇଛନ୍ତି । ମେ ମାସରେ ଭାରତ-ପାକିସ୍ତାନ ମଧ୍ୟରେ ହୋଇଥିବା ଉତ୍ତେଜନାକୁ ଅଟକାଇଥିବା ଦାବି କରିଛନ୍ତି । ହ୍ୱାଇଟ୍ ହାଉସରେ ରୋଜ ଗାର୍ଡନ କ୍ଲବ ଲଞ୍ଚ କରି ଟ୍ରମ୍ପ କହିଛନ୍ତି, ''ଗୋଟିଏ ସମୟରେ ଭାରତ ଓ ପାକିସ୍ତାନ ମଧ୍ୟରେ ବଢୁଥିବା ଉତ୍ତେଜନାକୁ ରୋକି ଥିଲି । ସେବେ ଦୁଇ ଦେଶ ମଧ୍ୟରେ ସ୍ଥିତି ଗମ୍ଭୀର ଥିଲା । ୭ଟି ବିମାନ ଖସା ଯାଇଥିଲା । ଦୁଇ ଦେଶ ବଡ଼ ପରମାଣୁ ଯୁଦ୍ଧ ଦିଗରେ ବଢୁଥିଲେ । ଦୁଇ ଦେଶର ନେତାଙ୍କ ସହିତ କଥା ହୋଇଥିଲି । ଯୁଦ୍ଧ ବନ୍ଦ କର ନଚେତ୍ କୌଣସି ବାଣିଜ୍ୟିକ ଚୁକ୍ତି ହେବ ନାହିଁ ବୋଲି ଚେତାବନୀ ଦେଇଥିଲି ।''