ଗୋପାଳପୁର,୧୭/୦୬: ଗୋପାଳପୁର ବେଳାଭୂମିରେ ଯୁବତୀଙ୍କୁ ଗଣଦୁଷ୍କର୍ମ ଘଟଣା। ସମସ୍ତ ୧୦ ଅଭିଯୁକ୍ତଙ୍କୁ ଗିରଫ । ସୋମବାର ସନ୍ଧ୍ୟାରେ ୭ ଯୁବକଙ୍କୁ ଅଟକ ରଖି ପଚରାଉଚରା କରିଥିଲା ପୁଲିସ୍ । ଅନ୍ୟ ୩ଜଣ ରାଜ୍ୟ ବାହାରକୁ ଫେରାର୍ ହେବା ପାଇଁ ଉଦ୍ୟମ କରୁଥିବା ବେଳେ ଗୋପାଳପୁର ପୁଲିସ୍ ଗିରଫ କରିଛି । ଅଭିଯୁକ୍ତଙ୍କ ଡାକ୍ତରୀମାଇନା ସରିଥିବା ବେଳେ ସମସ୍ତଙ୍କୁ କୋର୍ଟ ଚାଲାଣ କରାଯିବ ।
ରବିବାର ସନ୍ଧ୍ୟାରେ ଘଟିିଲା ଏହି ଅଘଟଣ । ପୁରୁଷବନ୍ଧୁଙ୍କ ସହ ବୁଲିବାକୁ ଆସିଥିଲେ ଯୁବତୀ । ସେଠାରେ ୧୦ ଜଣ ଯୁବକ ଉଭୟଙ୍କୁ ଘେରି ଯାଇଥିଲେ । ପୁରୁଷବନ୍ଧୁଙ୍କୁ ମାଡ଼ ମାରି ଯୁବତୀଙ୍କୁ ଦୁଷ୍କର୍ମ କରିଥିଲେ । ଏନେଇ ଗୋପାଳପୁର ଥାନାରେ ଯୁବତୀ ଅଭିଯୋଗ କରିଥିଲେ। ପୀଡ଼ିତାଙ୍କ ଏତଲା ପରେ ପୁଲିସ ତୁରନ୍ତ ଅନୁସନ୍ଧାନ ଆରମ୍ଭ କରିଥିଲା । ଗତକାଲି ୭ ଜଣଙ୍କ ଏବଂ ଆଜି ଫେରାର୍ ହେବାକୁ ଉଦ୍ୟମ କରୁଥିବା ବେଳେ ୩ ଜଣ ଅଭିଯୁକ୍ତଙ୍କୁ ଗିରଫ କରିଛି ଗୋପାଳପୁର ପୁଲିସ୍ । ଅଭିଯୁକ୍ତମାନେ ହେଲେ ପ୍ରମୋଦ ନାୟକ (୨୩ ବର୍ଷ), ବୋଉରାମ୍ ଦଳେଇ (୧୯ ବର୍ଷ), ଲକ୍ଷ୍ମଣ ପ୍ରଧାନ (୨୪ ବର୍ଷ), ଓମ ପ୍ରଧାନ(୧୯ ବର୍ଷ), ଦୀପକ ତରାଇ (୧୯ ବର୍ଷ) ଏବଂ କୁନାଲ ପ୍ରଧାନ (୨୪ ବର୍ଷ) । ଅନ୍ୟ ୪ ଜଣ ନାବାଳକ ରହିଛନ୍ତି ।
ପୁଲିସ ସୂଚନା ଅନୁସାରେ, ଯୁବତୀ ଜଣଙ୍କ ବାହାର ଜିଲ୍ଲାର । ସେ ବ୍ରହ୍ମପୁରର ଏକ କଲେଜରେ ଯୁକ୍ତ ୩ ଶେଷ ବର୍ଷ ଛାତ୍ରୀ । ସେ ଓ ତାଙ୍କ ପୁରୁଷ ବନ୍ଧୁ ରଜ ସଂକ୍ରାନ୍ତିରେ ଗୋପାଳପୁର ବେଳାଭୂମି ବୁଲିବାକୁ ଆସିଥିଲେ । ରାତି ୮ଟା ବେଳକୁ ସେମାନେ ଗପସପ କରି ପାନ୍ଥନିବାସ ପଛପାଖ ବେଳାଭୂମିରେ ପହଞ୍ଚିଥିଲେ । ସେମାନଙ୍କୁ ପିଛା କରିଥିଲେ ପ୍ରମୋଦ ନାୟକ ଏବଂ ତାଙ୍କର ୯ ଜଣ ସାଥି । ପୁରୁଷ ବନ୍ଧୁ ଏବଂ ଯୁବତୀଙ୍କ ଭିଡିଓ ଉତ୍ତୋଳନ କରି ଘର ଲୋକଙ୍କୁ ପଠାଇବେ କହି ବ୍ଲାକ୍ମେଲିଂ କରି ଟଙ୍କା ମାଗିଥିଲେ ଏବଂ ଫୋନ୍ ପେ’ ଜରିଆରେ କିଛି ଟଙ୍କା ବି ନେଇଥିଲେ । ଏହାକୁ ନେଇ ଯୁବକମାନଙ୍କ ସହ ପାଟିତୁଣ୍ଡ ହୋଇଥିଲା । ସେମାନେ ପୁରୁଷ ବନ୍ଧୁଙ୍କୁ ମାଡ଼ ମାରିଥିଲେ । ପରେ କିଛି ଯୁବକ ପୁରୁଷ ବନ୍ଧୁଙ୍କୁ କାବୁ କରି ନେଇଥିଲେ । ୩ଜଣ ଯୁବକ ଯୁବତୀଙ୍କୁ ଅନ୍ଧାର ସ୍ଥାନକୁ ଉଠାଇ ନେଇ ଦୁଷ୍କର୍ମ କରିଥିଲେ । ପରେ ଅଭିଯୁକ୍ତମାନେ ଚମ୍ପଟ ମାରିଥିଲେ ।
ରାତି ୧୦ଟାରେ ପୀଡ଼ିତା ଓ ତାଙ୍କ ପୁରୁଷବନ୍ଧୁ ଗୋପାଳପୁର ଥାନାରେ ପହଞ୍ଚି ଘଟଣା ସମ୍ପର୍କରେ ଜଣାଇଥିଲେ । ପୁଲିସ୍ ଏକ ମାମଲା ରୁଜୁ କରି ପୁରୁଷବନ୍ଧୁଙ୍କୁ ସାଙ୍ଗରେ ନେଇ ଅଭିଯୁକ୍ତଙ୍କୁ ଖୋଜାଖୋଜି କରିଥିଲା । ଗୋପାଳପୁର ଜଙ୍କସନ୍ ଓଭରବ୍ରିଜ୍ ତଳେ ଦୁଇଟି ବାଇକ୍ରେ ଥିବା ୪ ଯୁବକଙ୍କୁ ପୁରୁଷବନ୍ଧୁ ଚିହ୍ନଟ କରିଥିଲେ । ପୁଲିସ ଗାଡ଼ି ଦେଖି ଦୁଇ ଜଣ ଚମ୍ପଟ୍ ମାରିଥିଲେ । ଆଉ ଦୁଇ ଜଣଙ୍କୁ ପୁଲିସ ମାଡ଼ି ବସିଥିଲା । ଉକ୍ତ ଦୁଇ ଯୁବକଙ୍କୁ ଥାନାକୁ ଆଣି ଜେରା କରିବା ପରେ ଅନ୍ୟ ୫ ଜଣ ହିଞ୍ଜିଳିକାଟୁ ଅଞ୍ଚଳର ବୋଲି କହିଥିଲେ । ପୁଲିସ ହିଞ୍ଜିଳିକାଟୁ ଯାଇ ସମ୍ପୃକ୍ତ ୫ଜଣ ଯୁବକଙ୍କୁ ଥାନାକୁ ଉଠାଇ ଆଣିଛି । ପୀଡ଼ିତା ଅଭିଯୁକ୍ତଙ୍କୁ ଚିହ୍ନଟ କରିଛନ୍ତି । ୩ଜଣ ଦୁଷ୍କର୍ମ କରିଥିବା ପୁଲିସ ନିକଟରେ ସ୍ୱୀକାର କରିଛନ୍ତି । ଏହି ଘଟଣାରେ ରାଜ୍ୟ ବାହାରକୁ ଫେରାର ହେବାକୁ ଉଦ୍ୟମ କରୁଥିବା ବେଳେ ୩ ଅଭିଯୁକ୍ତଙ୍କୁ ବାନ୍ଧିଛି ଗୋପାଳପୁର ପୁଲିସ। ଗଣଦୁଷ୍କର୍ମ ମାମଲା ସଂପୃକ୍ତ ଥିବା ସମସ୍ତ ୧୦ ଅଭିଯୁକ୍ତ ଗିରଫ ହୋଇଛନ୍ତି। ଡାକ୍ତରୀମାଇନା ସରିଥିବା ବେଳେ ଉଭୟ ପୀଡିତା ଯୁବତୀ ଏବଂ ତାଙ୍କ ପୁରୁଷ ବନ୍ଧୁଙ୍କ ବୟାନ ରେକର୍ଡ କରାଯାଇଛି । ଅଭିଯୁକ୍ତ ମାନଙ୍କୁ ଆଜି କୋର୍ଟ ଚାଲାଣ କରାଯିବ ।
