ପୁରୀ, ୨୭/୦୭: ପୁରୀ ସମୁଦ୍ରକୂଳ ରାସ୍ତାର ବଳିଆପଣ୍ଡା ଅଞ୍ଚଳରେ ଭୂତ ଆତଙ୍କ ନେଇ ଗୁଜବ ଚାଲିଛି । ଏହାର ଭିଡିଓ ସୋସିଆଲ ମିଡିଆରେ ଭାଇରାଲ୍ ହୋଇଛି । ତେବେ ଏହା କେତେ ସତ୍ୟ ଜଣାପଡ଼ିନି ।
ସୂଚନା ମୁତାବକ, ସମୁଦ୍ରକୂଳ ରାସ୍ତାର ସିପସରୁବାଲିର ଏକ ତାରକା ହୋଟେଲ ନିକଟରେ ଶୁକ୍ରବାର ରାତିରେ କିଛି ଯୁବକ ଜନ୍ମଦିନ ପାଳନ କରି କେକ୍ କାଟୁଥିଲେ । ଏହି ସମୟରେ ହଠାତ୍ ଏକ ଦଲକା ପବନ ଆସିଥିଲା । ଯାହା ପରେ ଜଣେ ଅଦୃଶ୍ୟ ମହିଳା ଗୋଡ଼ାଇ ଗୋଡ଼ାଇ ଯୁବକମାନଙ୍କୁ ଆକ୍ରମଣ କରିଥିଲା । ଆକ୍ରମଣରେ ଜଣେ ଯୁବକଙ୍କ ପିଠି ଓ ଅନ୍ୟ ସ୍ଥାନରେ ଗୁରୁତର ଆଘାତ ଲାଗିଛି । ସେପଟେ ଜନ୍ମଦିନର ଭିଡିଓ ଉଠାଉଥିବା ଜଣେ ବ୍ୟକ୍ତି ତାଙ୍କ ମୋବାଇଲ୍ରେ ଭୂତର ଛବି ଓ ତାହାର କରୁଣ କନ୍ଦଣାକୁ କଏଦ କରିଥିବା ଦାବି କରିଛନ୍ତି ।
କିଛି ବର୍ଷ ତଳେ ଏଠାରେ ଜଣେ ମହିଳାଙ୍କୁ ହତ୍ୟା କରାଯାଇଥିଲା । ଏହି ଅତୃପ୍ତ ଆତ୍ମା ନିଜ ପ୍ରଭାବ ଏଠାରେ ଦେଖାଉଥିବା ଅଭିଯୋଗ ହୋଇଛି । କିଛି ଲୋକ ଏହାକୁ ବିଶ୍ୱାସ କରୁଥିବା ବେଳେ ଅନେକ ଅବିଶ୍ୱାସ କରୁଛନ୍ତି । ଅବିଶ୍ୱାସ କରୁଥିବା ଲୋକେ ଏହା ଏକ ଷଡ଼ଯନ୍ତ୍ର ହୋଇପାରେ ବୋଲି ମତ ଦେଇଛନ୍ତି । ତେବେ ଏନେଇ ପୁଲିସ କିମ୍ବା ପ୍ରଶାସନର ପ୍ରତିକ୍ରିୟା ମିଳିପାରିନି ।
