ଭୁବନେଶ୍ୱର, ୦୫/୦୩ : ରାଜଧାନୀର ଉପକଣ୍ଠ ନକ୍ସା ବଦଳିବ। ଭିତ୍ତିଭୂମିର ବିକାଶ ସହିତ ନୂଆ ସହର ନିର୍ମାଣ ହେବ । ସହରୀ ସଭ୍ୟତାରେ ସାମିଲ ହେବ ଗାଁ । ଏନେଇ ଚଳିତ ମାସ ଶେଷ ସୁଦ୍ଧା ଗ୍ରେଟର ଭୁବନେଶ୍ୱର ନୂଆ ଡ୍ରାଫ୍ଟ ସିଡିପି ଆସିବାକୁ ଯାଉଛି । ବିଡିଏରେ ଏନେଇ ଆଜି ବିସ୍ତୃତ ଭାବେ ଆଲୋଚନା ହୋଇଛି । ୨୦୪୦ ଭିଜନକୁ ଆଖି ଆଗରେ ରଖି ନୂଆ ସିଡିପି ପ୍ରସ୍ତୁତ ହେଉଛି । ଏଥିରେ ପିପିଲି, ଖୋର୍ଦ୍ଧା, ଜଟଣୀ, ଚନ୍ଦକା ଆଦିର ପ୍ରାୟ ୭୦୦ ବର୍ଗ କିଲୋମିଟର ଅଞ୍ଚଳର ବିକାଶ ହେବ । ଏଥିରେ ମୋଟ ୩୭୪ଟି ଗାଁ ମିଶାଇବାକୁ ଯୋଜନା କରାଯାଇଛି । ଏହା ସହ ଏହି ଅଞ୍ଚଳର ଭିତ୍ତିଭୂମି ବିକାଶ ଉପରେ ମଧ୍ୟ ବିସ୍ତୃତ ଭାବେ ଆଲୋଚନା ହେବ ।
୨୦୧୧ର ଜନଗଣନା ଅନୁସାରେ ଏହି ଅଞ୍ଚଳରେ ମୋଟ ୩.୮୩ ଲକ୍ଷ ଲୋକ ରହୁଥିଲେ । ଏବେ ଏହି ସଂଖ୍ୟା ୧୪.୩୬ ଲକ୍ଷକୁ ବୃଦ୍ଧି ପାଇଲାଣି । ଏହାକୁ ନଜରରେ ରଖି ସହରରେ ବିକାଶ ଉପରେ ବିଡିଏ ଏବେ ଫୋକସ କରୁଛି । ପୂର୍ବ ସିଡିପି ଅନୁସାରେ ୪୦୦ ବର୍ଗ କିଲୋମିଟର ବିକାଶ ହେଇଥିବା ବେଳେ ଏହି ସିଡିପିରେ ଅତିରିକ୍ତ ୭୦୦ ବର୍ଗ କିଲୋମିଟର ମିଶିବ । ଫଳରେ ବିଡିଏର ପରିସୀମା ୧୧୪୦ ବର୍ଗ କିଲୋମିଟରକୁ ବୃଦ୍ଧି ପାଇବ ।
ନୂଆ ସିଡିପି ଆସିବା ପରେ ଖୋର୍ଦ୍ଧା-ଭୁବନେଶ୍ୱର-ଜଟଣୀକୁ ନେଇ ନୂଆ ସହର ପରିକଳ୍ପନା କରିବେ ରାଜ୍ୟ ସରକାର । ଏନେଇ ୩୨୨ ହେକ୍ଟର ଜମିର ବିକାଶ କରାଯିବ । ଏହାପରେ ଏହାକୁ ୩୦୦୬ ହେକ୍ଟର ଜମିକୁ ବୃଦ୍ଧି କରିବାକୁ ଯୋଜନା କରାଯାଇଛି । ଏଥିପାଇଁ ପ୍ରାରମ୍ଭିକ ଭାବେ ୨୦୦ କୋଟି ଟଙ୍କା ଖର୍ଚ୍ଚ କରିବାକୁ ଯୋଜନା ହୋଇଛି । ଏହା ସହ ଭୁବନେଶ୍ୱର ଟ୍ରାଫିକ୍ ଜାମକୁ ଆଖି ଆଗରେ ରଖି ନୂଆ ରାସ୍ତା ନିର୍ମାଣ କରିବାକୁ ଯୋଜନା କରାଯାଇଛି । ବିସ୍ତୃତ ସିଟି ରୋଡ ଯୋଜନାରେ ନୂଆ ରାସ୍ତା ନିର୍ମାଣ ହେବ । ଏଥିପାଇଁ ରାଜ୍ୟ ସରକାର ୧୩ ହଜାର କୋଟି ଟଙ୍କାର ବ୍ୟୟ ଅଟକଳ କରିଛନ୍ତି । ଏଥିରେ ଆଉଟର ରିଂ-ରୋଡ୍ ଆଦି ନିର୍ମାଣ କରାଯିବ ।
ଏହି ଖବରଟିକୁ ପଢନ୍ତୁ-ଅପ୍ଡେଟ୍ ହେଉନି ରାଜ୍ୟ ସରକାରଙ୍କ ୱେବ୍ସାଇଟ୍, ଇ-ଡେସପାଚ୍ରେ ମିଳୁନି ବିଭାଗୀୟ ସୂଚନା
