ନୂଆଦିଲ୍ଲୀ,୦୨/୦୬: ଚଳିତବର୍ଷ ମେ’ ମାସରେ କେନ୍ଦ୍ର ସରକାର ୨.୦୧ ଲକ୍ଷ କୋଟି ଟଙ୍କାର ସାମଗ୍ରୀ ଏବଂ ସେବା ଟିକସ(ଜିଏସ୍ଟି) ଆଦାୟ କରିଛନ୍ତି । ପୂର୍ବବର୍ଷ ମେ’ ମାସ ତୁଳନାରେ ଏହା ୧୬.୪% ଅଧିକ । ରବିବାର ଜାରି ହୋଇଥିବା ସରକାରୀ ତଥ୍ୟରୁ ଏହା ଜଣାପଡ଼ିଛି । ତେବେ ଏ ବର୍ଷ ଏପ୍ରିଲରେ ସରକାର ୨.୩୭ ଲକ୍ଷ କୋଟି ଟଙ୍କାର ଜିଏସ୍ଟି ଆଦାୟ କରିଥିଲେ । ବାର୍ଷିକ ଆଧାରରେ ଏଥିରେ ୧୨.୬% ଅଭିବୃଦ୍ଧି ଦେଖିବାକୁ ମିଳିଥିଲା । ଏହା ଜିଏସ୍ଟି ଆଦାୟରେ ଥିଲା ରେକର୍ଡ । ସରକାରୀ ତଥ୍ୟ ଅନୁସାରେ, ମେ’ ମାସରେ ଘରୋଇ ଟ୍ରାଞ୍ଜାକ୍ସନ୍ରୁ ଆଦାୟ ହୋଇଥିବା ଟିକସରେ ୧୩.୭% ବୃଦ୍ଧି ଘଟି ୧.୫୦ ଲକ୍ଷ କୋଟି ଟଙ୍କା ରହିଛି । ସେହିଭଳି ଆମଦାନିରୁ ଜିଏସ୍ଟି ରାଜସ୍ୱ ୨୫.୨% ବଢ଼ି ୫୧,୨୬୬ କୋଟି ଟଙ୍କା ରହିଛି ।
ଆଲୋଚ୍ୟ ମାସରେ ଆଦାୟ ହୋଇଥିବା ମୋଟ ଜିଏସ୍ଟି ମଧ୍ୟରୁ କେନ୍ଦ୍ରୀୟ ଜିଏସ୍ଟି ୩୫,୪୩୪ କୋଟି ଟଙ୍କା ଥିବାବେଳେ ରାଜ୍ୟ ଜିଏସ୍ଟି ୪୩,୯୦୨ କୋଟି, ସମନ୍ୱିତ ଜିଏସ୍ଟି ୧.୦୯ ଲକ୍ଷ କୋଟି ଏବଂ ସେସ୍ରୁ ରାଜସ୍ୱ ଆଦାୟ ରହିଛି ୧୨,୮୭୯ କୋଟି ଟଙ୍କା । ୨୦୨୪ ମେ’ରେ ୧,୭୨,୭୩୯ କୋଟି ଟଙ୍କାର ଜିଏସ୍ଟି ଆଦାୟ ହୋଇଥିଲା ।
