ନୂଆଦିଲ୍ଲୀ,୧୭/୧୨: ଧୂଆଁ ଟାଣିବା ହେବ ମହଙ୍ଗା । ସାମଗ୍ରୀ ଏବଂ ସେବା ଟିକସ(ଜିଏସ୍ଟି) ପରିଷଦ ତମାଖୁ ଏବଂ ସିଗାରେଟ୍ ଭଳି ଉତ୍ପାଦଗୁଡ଼ିକ ଉପରେ ଜିଏସ୍ଟିକୁ ୭% ବଢ଼ାଇ ୩୫% କରିପାରେ । ଏହାସହିତ ପୁରୁଣା କାର ଏବଂ ବ୍ୟବହୃତ ଇଲେକ୍ଟ୍ରିକ୍ ଯାନଗୁଡ଼ିକ ଉପରେ ବି ଜିଏସ୍ଟି ବଢ଼ାଇବା ପାଇଁ ବିଚାର ହେଉଛି ।
ଡିସେମ୍ବର ୨୦ ଏବଂ ୨୧ରେ ରାଜସ୍ଥାନର ଜୈସଲ୍ମେର୍ରେ ହେବାକୁ ଥିବା ୫୫ତମ ଜିଏସ୍ଟି ପରିଷଦ ବୈଠକରେ ଏହା ଉପରେ ନିଷ୍ପତ୍ତି ନିଆଯିବ । ଏ ନିଷ୍ପତ୍ତି ଦ୍ୱାରା ପୁରୁଣା ଗାଡ଼ି ଏବଂ ବ୍ୟବହୃତ ଇଭି କାର ମହଙ୍ଗା ହୋଇପାରେ । ପରବର୍ତ୍ତୀ ବୈଠକରେ ପୁରୁଣା କାର ଏବଂ ଇଭି ଉପରେ ଜିଏସ୍ଟି ୧୨%ରୁ ବଢ଼ି ୧୮% ହୋଇପାରେ । ତମାଖୁ ଉତ୍ପାଦ ଉପରେ ଜିଏସ୍ଟି ୨୮%ରୁ ବଢ଼ି ୩୫% ହୋଇପାରେ । ଏ ପରିବର୍ତ୍ତନଗୁଡ଼ିକ ଦ୍ୱାରା ସାଧାରଣ ଲୋକଙ୍କ ଉପରେ ପ୍ରଭାବ ପଡ଼ିବ । ଗାଡ଼ିଗୁଡ଼ିକର ଦର ବଢ଼ିବ । ସିଗାରେଟ୍ ଏବଂ ତମାଖୁ ମହଙ୍ଗା ହୋଇଯିବ ।
ପୁରୁଣା କାର ଏବଂ ଇଭିଗୁଡ଼ିକ ଉପରେ ଜିଏସ୍ଟି ବୃଦ୍ଧି ପ୍ରସ୍ତାବକୁ ଜିଏସ୍ଟି ଫିଟ୍ମେଣ୍ଟ କମିଟି ଦେଇଛି । ଏବେ ଅଧିକାଂଶ ପୁରୁଣା ଗାଡ଼ି ଉପରେ ୧୨% ଜିଏସ୍ଟି ଲାଗୁଛି । ଯଦି ଏ ପ୍ରସ୍ତାବକୁ ମଞ୍ଜୁରି ମିଳେ ତେବେ ପୁରୁଣା ଗାଡ଼ି ମହଙ୍ଗା ହୋଇଯିବ । ବିଶେଷ କରି ଇଭିଗୁଡ଼ିକ ଉପରେ ଅଧିକ ପ୍ରଭାବ ପଡ଼ିବ । ନୂଆ ଇଭି ଉପରେ ୫% ଜିଏସ୍ଟି ଲାଗିଥାଏ କିନ୍ତୁ ପୁରୁଣା ଇଭି ଉପରେ ୧୮% ଜିଏସ୍ଟି ଲାଗିବ । ଏସ୍ୟୁଭି ଉପରେ ବି ୨୨% କ୍ଷତିପୂରଣ ସେସ୍ ଲାଗିଥାଏ । ଏଥର ବି ଜିଏସ୍ଟି ପରିଷଦ ବୈଠକରେ ସ୍ପଷ୍ଟୀକରଣ ଆସିପାରେ । ଏହି ସେସ୍ ଏ ଯାଏ ସମ୍ପୂର୍ଣ୍ଣ ରୂପେ ଲାଗୁ ହୋଇ ପାରିନାହିଁ । ଏହା ଲାଗୁ ହେବା ପରେ ଏସ୍ୟୁଭି ଦର ବି ବଢ଼ିଯିବ ।
ତମାଖୁ ଏବଂ ସିଗାରେଟ୍ ଉପରେ ଜିଏସ୍ଟି ବୃଦ୍ଧି ନିଷ୍ପତ୍ତି ମନ୍ତ୍ରୀସମୂହ ନେଇଯାଇଛନ୍ତି । ବିହାର ଉପମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ ଏହି ମନ୍ତ୍ରୀଗୋଷ୍ଠୀର ମୁଖ୍ୟ । ସେ ତମାଖୁ ଉତ୍ପାଦ ଉପରେ ଜିଏସ୍ଟି ୭% ବଢ଼ାଇ ୩୫% କରିବାକୁ ପ୍ରସ୍ତାବ ଦେଇଛନ୍ତି । ଏବେ ଏ ଉତ୍ପାଦ ଉପରେ ୨୮% ଜିଏସ୍ଟି ଲାଗୁଛି । ଏହା ଉପରେ ଚୂଡ଼ାନ୍ତ ନିଷ୍ପତ୍ତି ଜିଏସ୍ଟି ପରିଷଦ ନେବ ।
