କଟକ,୩୦/୦୩: ଗ୍ରୀଷ୍ମ ପ୍ରବାହ ସମୟରେ ଯାତ୍ରୀମାନେ କିପରି ସୁରକ୍ଷିତ ଯାତ୍ରା କରିବେ ତାହା ସୁନିଶ୍ଚିତ କରାଯିବ । ସବୁ ବସ୍ରେ ବିଶୁଦ୍ଧ ପାନୀୟ ଜଳ ରଖାଯିବ । ଏଥିସହ ବରଫ ପ୍ୟାକେଟ୍, ପ୍ରାଥମିକ ଚିକିତ୍ସା କିଟ୍ ଏବଂ ଓଆର୍ଏସ୍ ପ୍ୟାକେଟ୍ ମଧ୍ୟ ବସ୍ରେ ରହିବ । ରାଜ୍ୟ ପରିବହନ ପ୍ରାଧିକରଣ (ଏସ୍ଟିଏ) ପକ୍ଷରୁ ଜାରି ନିର୍ଦ୍ଦେଶାବଳୀରେ ଏହା ସ୍ପଷ୍ଟ କରାଯାଇଛି । ସେହିପରି ବସ୍ ଷ୍ଟପ୍ଗୁଡ଼ିକରେ ପର୍ଯ୍ୟାପ୍ତ ବିଶ୍ରାମ ସ୍ଥାନ ବ୍ୟବସ୍ଥା କରାଯିବ । ସାର୍ବଜନୀନ ପରିବହନ ଯାନରେ ଯାତ୍ରୀ ସୁରକ୍ଷା ଏବଂ ଆରାମକୁ ଗୁରୁତ୍ୱ ଦିଆଯିବ । ନିର୍ଦ୍ଧାରିତ ସଂଖ୍ୟାର ଅନୁମତିକୁ ଉଲ୍ଲଂଘନ କରି ଅଧିକ ଯାତ୍ରୀ ନେଉଥିବା ଯାନ ବିରୋଧରେ ଦୃଢ଼ ପଦକ୍ଷେପ ନିଆଯିବ ବୋଲି ଏସ୍ଟିଏ ପକ୍ଷରୁ କୁହାଯାଇଛି ।
ଶନିବାର ଏନେଇ ଏସ୍ଟିଏର ବରିଷ୍ଠ ଅଧିକାରୀ, ସମସ୍ତ ଆର୍ଟିଓ ଏବଂ ଏଆର୍ଟିଓଙ୍କ ସହିତ ବୈଠକ କରିଥିଲେ । ନିଷ୍ପତ୍ତି ହୋଇଥିଲା ଯେ, ଦୂର ଯାତ୍ରୀଙ୍କ ପାଇଁ ରାଜପଥରେ ଜଳ କିଓସ୍କ୍ ସ୍ଥାପନ କରି ପାନୀୟ ଜଳ ଯୋଗାଇ ଦିଆଯିବ । ଓଭର୍ଲୋଡିଂ, ବସ୍ ଛାତ ଉପରେ ବସି ଯାତ୍ରା କରିବା ଏବଂ ଝୁଲନ୍ତା ଅବସ୍ଥାରେ ଯାତ୍ରୀ ନେଉଥିବା ଯାନଠାରୁ ଜରିମାନା ଆଦାୟ କରାଯିବ । ଆର୍ଟିଓ କାର୍ଯ୍ୟାଳୟରେ ଏକ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ କାର୍ଯ୍ୟ କରିବ । ଏଥିସହ ଓଡ଼ିଶାରୁ ଯାତ୍ରୀ ନେଇ ଯାଉଥିବା ବସ୍ ବିରୋଧରେ ଉକ୍ତ ପଦକ୍ଷେପ ନେବାକୁ ଏସ୍ଟିଏ ପକ୍ଷରୁ ପଡୋଶୀ ରାଜ୍ୟଗୁଡିକୁ ଅନୁରୋଧ କରାଯାଇଛି । ଏ ଦିଗରେ ବ୍ୟାପକ ସଚେତନତା ପାଇଁ ବସ୍ ଏବଂ ଟ୍ରକ୍ ମାଲିକ ସଂଘ ସହଭାଗିତାରେ ହେଲ୍ପଲାଇନ୍ ନମ୍ବର ଯୋଗାଇ ଦିଆଯିବ । ସ୍ଥାନୀୟ ଏନ୍ଜିଓଗୁଡିକୁ ବି ସାମିଲ କରାଯିବ । ଆବଶ୍ୟକସ୍ଥଳେ ବସ୍ ଷ୍ଟାଣ୍ଡରେ ଯାତ୍ରୀଙ୍କୁ ପ୍ରାଥମିକ ଚିକିତ୍ସା ଯୋଗାଇ ଦେବାକୁ ଏନ୍ଫୋର୍ସମେଣ୍ଟ ଦଳ ସହ ଡାକ୍ତରଙ୍କୁ ପଠାଯିବ । ଏ ସମ୍ବନ୍ଧରେ ସମୀକ୍ଷା ପାଇଁ ନିୟମିତ ବୈଠକ ହେବ । ପୂର୍ବାହ୍ଣ ୧୧ଟାରୁ ଅପରାହ୍ଣ ୩ଟା ପର୍ଯ୍ୟନ୍ତ ଯାତ୍ରୀବାହୀ ଯାନଗୁଡ଼ିକ ଉପରେ ବିଶେଷ ଧ୍ୟାନ ଦିଆଯିବ । ପ୍ରତିକୂଳ ପରିସ୍ଥିତି ଏଡ଼ାଇବା ପାଇଁ ଆର୍ଟିଓ, ଏଆର୍ଟିଓ ଜିଲ୍ଲା ପ୍ରଶାସନ ଏବଂ ଏସ୍ଟିଏ ସହ ଯୋଗାଯୋଗ ରଖିବାକୁ ନିର୍ଦ୍ଦେଶ ଦିଆଯାଇଛି ।
