ନୂଆଦିଲ୍ଲୀ,୦୪/୧୦: ମଧ୍ୟପ୍ରାଚ୍ୟରେ ଫେରିବ ଶାନ୍ତି । ଥମିବ ଯୁଦ୍ଧ । ଆଉ ବର୍ଷିବନି ବୋମା । ଅକାଳରେ ଯିବନି ନିରୀହ ଜୀବନ । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଅଲଟିମେଟ ଆଗରେ ନଇଁଲା ହମାସ । ଗାଜା ଉପରେ କରିଥିବା କବ୍ଜା ସହ ଇସ୍ରାଏଲୀ ପଣବନ୍ଦୀଙ୍କୁ ମୁକ୍ତ କରିବାକୁ ରାଜି ହୋଇଛି ହମାସ୍ । ଡୋନାଲ୍ଡ ଟ୍ରମ୍ପଙ୍କ 'ଗାଜା ପ୍ଲାନ' ପ୍ରସ୍ତାବରେ ହମାସ୍ ସହମତ ହୋଇଛି । 'ଶାନ୍ତି ଚୁକ୍ତି' ଉପରେ ହମାସର ସହମତି ପରେ ଗାଜା ଉପରେ ତୁରନ୍ତ ବୋମାମାଡ଼ ବନ୍ଦ କରିବାକୁ ଇସ୍ରାଏଲକୁ ଅପିଲ୍ କରିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଶାନ୍ତି ପ୍ରସ୍ତାବ ଗ୍ରହଣ କରିବା ପାଇଁ ହମାସକୁ ୨ ଦିନ ସମୟ ଦେଇଥିଲେ ଡୋନାଲ୍ଡ ଟ୍ରମ୍ପ । ପ୍ରସ୍ତାବରେ ରାଜି ନହେଲେ ବିନାଶ ହେବ ବୋଲି କହିଥିଲେ ।
ଗତ ଦୁଇ ବର୍ଷ ଧରି ଚାଲିଥିବା ଇସ୍ରାଏଲ-ହମାସ ଯୁଦ୍ଧ ଏବେ ଶେଷ ହୋଇପାରେ । ଗାଜା ଷ୍ଟ୍ରିପରେ ଯୁଦ୍ଧ ସମାପ୍ତ କରିବା ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଯୋଜନାକୁ କିଛି ସର୍ତ୍ତ ସହିତ ହମାସ ଗ୍ରହଣ କରିଛି । ହମାସ ପ୍ରାୟ ସମସ୍ତ ପ୍ରମୁଖ ସର୍ତ୍ତରେ ରାଜି ହୋଇଛି । ଟ୍ରମ୍ପଙ୍କ ଯୋଜନାରେ କ୍ଷମତା ଛାଡିବାକୁ ଏବଂ ସମସ୍ତ ବନ୍ଧକଙ୍କୁ ମୁକ୍ତ କରିବା ଅନ୍ତର୍ଭୁକ୍ତ ରହିଛି । କିନ୍ତୁ ଅନ୍ୟାନ୍ୟ ପ୍ରସଙ୍ଗରେ ପାଲେଷ୍ଟାଇନଙ୍କ ସହିତ ଆହୁରି ଆଲୋଚନା ଆବଶ୍ୟକ । ପୂର୍ବରୁ, ଡୋନାଲ୍ଡ ଟ୍ରମ୍ପ ଏକ ଚରମବାଣୀ ଦେଇଥିଲେ ଯେ ରବିବାର ସୁଦ୍ଧା ହମାସକୁ ଏହି ଚୁକ୍ତିରେ ରାଜି ହେବାକୁ ପଡିବ, ନଚେତ୍ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ହମାସର ନିଷ୍ପତ୍ତି ଉପରେ କ'ଣ କହିଲେ ଟ୍ରମ୍ପ ? ହମାସର ଘୋଷଣା ପରେ, ଡୋନାଲ୍ଡ ଟ୍ରମ୍ପ ଇସ୍ରାଏଲକୁ ଗାଜାରେ ଆକ୍ରମଣ ତୁରନ୍ତ ବନ୍ଦ କରିବାକୁ କହିଛନ୍ତି । ସୋସିଆଲ ମିଡିଆ ପୋଷ୍ଟରେ ଲେଖିଛନ୍ତି, "ହମାସ ଦ୍ୱାରା ଜାରି କରାଯାଇଥିବା ବିବୃତ୍ତି ଉପରେ ଆଧାର କରି, ମୁଁ ବିଶ୍ୱାସ କରେ ଯେ ସେମାନେ ସ୍ଥାୟୀ ଶାନ୍ତି ପାଇଁ ପ୍ରସ୍ତୁତ। ଇସ୍ରାଏଲକୁ ତୁରନ୍ତ ଗାଜାରେ ବୋମାମାଡ଼ ବନ୍ଦ କରିବାକୁ ପଡିବ ଯାହା ଦ୍ୱାରା ଆମେ ସୁରକ୍ଷିତ ଏବଂ ଶୀଘ୍ର ବନ୍ଧକମାନଙ୍କୁ ବାହାର କରିପାରିବା । ବର୍ତ୍ତମାନ, ଏହା କରିବା ଅତ୍ୟନ୍ତ ବିପଦପୂର୍ଣ୍ଣ । ଏହା କେବଳ ଗାଜା ବିଷୟରେ ନୁହେଁ, ଏହା ମଧ୍ୟପ୍ରାଚ୍ୟରେ ଶାନ୍ତି ପାଇଁ ଦୀର୍ଘକାଳୀନ ପ୍ରୟାସ ହେବ ।
ଇସ୍ରାଏଲର ପ୍ରତିକ୍ରିୟା- ହମାସର ନିଷ୍ପତ୍ତି ଏବଂ ଗାଜାରେ ବୋମାମାଡ଼ ବନ୍ଦ କରିବା ପାଇଁ ଟ୍ରମ୍ପଙ୍କ ଅପିଲ ସମ୍ପର୍କରେ ପିଏମ୍ ବେଞ୍ଜାମିନ୍ ନେତାନ୍ୟାହୁଙ୍କ କାର୍ଯ୍ୟାଳୟ ପକ୍ଷରୁ ଜାରି ବିବୃତ୍ତିରେ କୁହାଯାଇଛି ଯେ, ଇସ୍ରାଏଲ ଗାଜାରେ ଯୁଦ୍ଧ ସମାପ୍ତ କରିବା ପାଇଁ ଟ୍ରମ୍ପଙ୍କ ଯୋଜନାର "ପ୍ରଥମ ପର୍ଯ୍ୟାୟ" କାର୍ଯ୍ୟକାରୀ କରିବାକୁ ପ୍ରସ୍ତୁତ ହେଉଛି । ଇସ୍ରାଏଲ ଯୁଦ୍ଧ ସମାପ୍ତ କରିବା ପାଇଁ ଟ୍ରମ୍ପଙ୍କ ଯୋଜନାକୁ ପୂର୍ଣ୍ଣ ସହଯୋଗ କରିବ ।
'ଟ୍ରମ୍ପଙ୍କ ଗାଜା ପ୍ଲାନ୍'- ସୋମବାର ହ୍ୱାଇଟ୍ ହାଉସରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ନେତନ୍ୟାହୁ ହ୍ୱାଇଟ୍ହାଉସ୍ରେ ପରସ୍ପରକୁ ଭେଟି ଯୁଦ୍ଧ ପ୍ରସଙ୍ଗରେ ଆଲୋଚନା କରିଥିଲେ । ଡୋନାଲ୍ଡ ଟ୍ରମ୍ପ୍ ଯେଉଁ ୨୦-ସୂତ୍ରୀ ଯୋଜନା ବନାଇଥିଲେ, ଇସ୍ରାଏଲ୍ ପ୍ରଧାନମନ୍ତ୍ରୀ ନେତନ୍ୟାହୁ ତାହାକୁ ଗ୍ରହଣ କରିଥିଲେ । ୨୦-ସୂତ୍ରୀ ଯୋଜନା ଅନୁସାରେଏକ ‘ବୋର୍ଡ ଅଫ୍ ପିସ୍’ଗଠନ ହେବ । ଟ୍ରମ୍ପ୍ ଏହାର ନେତୃତ୍ୱ ନେବେ ଏବଂ ଏଥିରେ ଉଚ୍ଚ ଯୋଗ୍ୟତାସମ୍ପନ୍ନ ବିଶେଷଜ୍ଞମାନେ ସଦସ୍ୟ ରହିବେ । ବୋର୍ଡରେ ହମାସ୍ କିମ୍ବା ଅନ୍ୟ ଆତଙ୍କବାଦୀଙ୍କର କୌଣସି ଭୂମିକା ରହିବ ନାହିଁ । ପରୋକ୍ଷ କିମ୍ବା ପ୍ରତ୍ୟକ୍ଷରେ ଗାଜା ଗଭର୍ଣ୍ଣାନ୍ସରେ ସେମାନେ କୌଣସି ଭୂମିକା ନିର୍ବାହ କରିବେ ନାହିଁ । ଗାଜାରେ ଅସ୍ଥାୟୀ ସରକାର ଚାଲିବ ଏବଂ ଇସ୍ରାଏଲ୍ ଗାଜାକୁ ଦଖଲ କରିବ ନାହିଁ । କାହାକୁ ଗାଜା ଛାଡ଼ିବା ପାଇଁ ବାଧ୍ୟ କରାଯିବ ନାହିଁ । ଗାଜା ଷ୍ଟ୍ରିପ୍କୁ ପୁନର୍ବାର ନିର୍ମାଣ କରାଯିବ । ଉଭୟ ପକ୍ଷ ଏହି ପ୍ରସ୍ତାବକୁ ସ୍ୱୀକାର କଲେ ଯୁଦ୍ଧ ତତ୍କ୍ଷଣାତ ବନ୍ଦ ହୋଇଯିବ । ୭୨ ଘଣ୍ଟାରେ ପଣବନ୍ଦୀ ମୁକ୍ତ ହେବେ । ଇସ୍ରାଏଲ୍ ୨୫୦ ଆଜୀବନ କଏଦୀଙ୍କୁ ମୁକ୍ତ କରିବ । ଗାଜାରେ ବନ୍ଦୀ ଥିବା ୧,୭୦୦ ପାଲେଷ୍ଟିନୀୟ ବି ମୁକୁଳିବେ । ଏହି ପ୍ରକ୍ରିୟାରେ ସମସ୍ତ ସାମରିକ ଅଭିଯାନ ବନ୍ଦ ରହିବ ।
