ନୂଆଦିଲ୍ଲୀ: ଜମ୍ମୁ-କାଶ୍ମୀରର ପହଲଗାମରେ ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ଶୀର୍ଷରେ ପହଞ୍ଚିଛି । ଉଭୟ ଦେଶ ପରସ୍ପର ବିରୁଦ୍ଧରେ ଅନେକ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ସୀମା ବନ୍ଦ କରିବା, ଭିସା ବାତିଲ କରିବା ଏବଂ ସିନ୍ଧୁ ଜଳ ଚୁକ୍ତିକୁ ବାତିଲ କରିବା ମଧ୍ୟ ଅନ୍ତର୍ଭୁକ୍ତ। ଏହି ସମୟରେ, ଇସ୍ରାଏଲ ପହଲଗାମ ଆକ୍ରମଣ ସମ୍ପର୍କରେ ଏକ ବଡ଼ ବୟାନ ଦେଇଛି । ଭାରତରେ ଇସ୍ରାଏଲ ରାଷ୍ଟ୍ରଦୂତ ରୁବେନ ଆଜାର ପହଲଗାମ ଆତଙ୍କବାଦୀ ଆକ୍ରମଣକୁ ୭ ଅକ୍ଟୋବର ୨୦୨୩ରେ ଇସ୍ରାଏଲ ଉପରେ ହମାସ ଆକ୍ରମଣ ସହିତ ତୁଳନା କରିଛନ୍ତି । 

ସେ ଆକ୍ରମଣରେ ସାଧାରଣ ନାଗରିକଙ୍କୁ ଟାର୍ଗେଟ କରିବାକୁ ନେଇ ଥିବା ସମାନତାକୁ ଦର୍ଶାଇଛନ୍ତି । ଏହା ସହ ଆତଙ୍କବାଦୀ ଗୋଷ୍ଠୀଗୁଡ଼ିକ ମଧ୍ୟରେ ସମନ୍ୱୟ ବୃଦ୍ଧି ସମ୍ପର୍କରେ ସେ ଚେତାବନୀ ମଧ୍ୟ ଦେଇଛନ୍ତି । NDTVକୁ ପ୍ରତିକ୍ରିୟା ଦେଇ ଇସ୍ରାଏଲ ରାଷ୍ଟ୍ରଦୂତ କହିଛନ୍ତି, ‘ଆତଙ୍କବାଦୀମାନେ ସବୁ ସ୍ତରରେ ସହଯୋଗ କରୁଛନ୍ତି ଏବଂ ପରସ୍ପରକୁ ନକଲ କରିବାକୁ ଚେଷ୍ଟା କରୁଛନ୍ତି । ମୁଁ ନିଶ୍ଚିତ ଯେ, ଗୁଇନ୍ଦା ସଂସ୍ଥାଗୁଡ଼ିକ ସେମାନଙ୍କୁ ପରାସ୍ତ କରିବା ପାଇଁ ଏକାଠି କାମ କରୁଛନ୍ତି।’ ସେ କହିଛନ୍ତି, ‘ଦୁର୍ଭାଗ୍ୟବଶତଃ, ଆମକୁ ସ୍ୱୀକାର କରିବାକୁ ପଡିବ ଯେ, ଏହି ଆତଙ୍କବାଦୀ ଗୋଷ୍ଠୀଗୁଡ଼ିକ ପରସ୍ପରକୁ ପ୍ରେରଣା ଦେଉଛନ୍ତି । ପହଲଗାମ ଆକ୍ରମଣ ଏବଂ ଅକ୍ଟୋବର ୭ (୨୦୨୩) ରେ ଇସ୍ରାଏଲରେ ଘଟିଥିବା ଘଟଣା ମଧ୍ୟରେ ସମାନତା ଅଛି । ଇସ୍ରାଏଲର ଲୋକମାନେ ଏକ ସଙ୍ଗୀତ ଉତ୍ସବ ପାଳନ କରୁଥିଲେ ଏବଂ ନିର୍ଦ୍ଦୋଷ ପର୍ଯ୍ୟଟକମାନେ ପହଲଗାମରେ ସେମାନଙ୍କର ଛୁଟି ଉପଭୋଗ କରୁଥିଲେ ।’ 

ଇସ୍ରାଏଲ ରାଷ୍ଟ୍ରଦୂତ ପହଲଗାମ ଆକ୍ରମଣକୁ ହମାସ ନେତାଙ୍କ ପାକିସ୍ତାନ ଅଧିକୃତ କାଶ୍ମୀର ଗସ୍ତ ସହିତ ଯୋଡିଛନ୍ତି। ନିକଟ ଅତୀତରେ ହମାସ ଆତଙ୍କବାଦୀମାନେ ପିଓକେରେ ଜୈଶ-ଏ-ମହମ୍ମଦ ଆତଙ୍କବାଦୀ ଏବଂ ଅନ୍ୟ କିଛି ଲୋକଙ୍କୁ ଭେଟିଥିଲେ। ଏହା ବ୍ୟତୀତ ହମାସ ନେତାମାନେ ଜୈଶ ଆତଙ୍କବାଦୀଙ୍କ ସହିତ ଏକ ସାଧାରଣ ସଭାକୁ ମଧ୍ୟ ସମ୍ବୋଧିତ କରିଥିଲେ। ରାଲିର ଭିଡିଓଗୁଡ଼ିକ ସୋସିଆଲ ମିଡିଆରେ ବହୁଳ ଭାବରେ ସେୟାର କରାଯାଇଥିଲା । କିନ୍ତୁ ହମାସ ଜୈଶ ସହିତ ଏହାର ସମ୍ପର୍କ ବିଷୟରେ କିଛି କହିନାହିଁ ।

ଇସ୍ରାଏଲ ରାଷ୍ଟ୍ରଦୂତ ପହଲଗାମ ଆକ୍ରମଣ ବିରୋଧରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପ୍ରତିକ୍ରିୟାକୁ ପ୍ରଶଂସା କରିଛନ୍ତି। ପ୍ରଧାନମନ୍ତ୍ରୀ ମୋଦୀ ଆଜି ବିହାରର ମଧୁବନୀରେ ଏକ ସାଧାରଣ ସଭାରେ ପହଲଗାମ ଆକ୍ରମଣର ପ୍ରତିଶୋଧ ନେବାକୁ ପ୍ରତିଶ୍ରୁତି ଦେଇଛନ୍ତି। ଏହା ଉପରେ ଇସ୍ରାଏଲ ରାଷ୍ଟ୍ରଦୂତ କହିଛନ୍ତି, ‘ମୁଁ କେବଳ କଡ଼ା ନିନ୍ଦା ଦ୍ୱାରା ନୁହେଁ ବରଂ ଭାରତ ସରକାରଙ୍କ ଦ୍ୱାରା ନିଆଯାଇଥିବା କଠୋର ପଦକ୍ଷେପ ଯୋଗୁଁ ବହୁତ ଉତ୍ସାହିତ।’ ସେ ଭାରତର କୂଟନୈତିକ ପଦକ୍ଷେପ ସଂପର୍କରେ କହିଛନ୍ତି । 

ପାକିସ୍ତାନୀ ଆତଙ୍କବାଦୀ ସଂଗଠନ ସହିତ ହମାସର ସମ୍ପର୍କ ଭାରତ-ପାଲେଷ୍ଟାଇନ ସମ୍ପର୍କକୁ ପ୍ରଭାବିତ କରିପାରେ । ଭାରତ ପ୍ରତିବର୍ଷ ପାଲେଷ୍ଟାଇନକୁ ବିପୁଳ ପରିମାଣର ସହାୟତା ଦିଏ । ଏହି ସହାୟତା ମାନବିକତା ଭିତ୍ତିରେ ପାଲେଷ୍ଟାଇନ ଲୋକଙ୍କ ପାଇଁ ଦିଆଯାଏ । ଓ୍ବେଷ୍ଟବ୍ୟାଙ୍କ ଏବଂ ଗାଜା ଷ୍ଟ୍ରିପରେ ସ୍କୁଲ ଓ ହସ୍ପିଟାଲ ନିର୍ମାଣ ଠାରୁ ଆରମ୍ଭ କରି ଔଷଧ ଯୋଗାଇବା ପର୍ଯ୍ୟନ୍ତ ସବୁ ପ୍ରକାର ସହାୟତା କରେ ଭାରତ । ଏପରି ପରିସ୍ଥିତିରେ, ଯଦି ହମାସର ସମ୍ପୃକ୍ତି ନେଇ ପ୍ରମାଣ ମିଳେ, ତେବେ ଭାରତ-ପାଲେଷ୍ଟାଇନ ସମ୍ପର୍କରେ ଫାଟ ସୃଷ୍ଟି ହୋଇପାରେ ବୋଲି କୁହାଯାଉଛି । କିନ୍ତୁ ଭାରତର ସଂପର୍କରେ ହମାସ ସହିତ ନୁହେଁ ବରଂ ଓ୍ବେଷ୍ଟବ୍ୟାଙ୍କର ପାଲେଷ୍ଟାଇନ୍‌ ଅଧିକାରୀଙ୍କ ସହ ରହିଛି ।