ନୂଆଦିଲ୍ଲୀ: ଯମୁନା ନଦୀରେ ବିଷ ମିଶାଇବା ନେଇ ଅଭିଯୋଗ ପରେ ହରିୟାଣା ସରକାର ଅରବିନ୍ଦ କେଜ୍ରିଓ୍ବାଲ ଏବଂ ଆପ୍କୁ ଜୋରଦାର ବିରୋଧ କରିଛନ୍ତି । ହରିୟାଣାର କ୍ୟାବିନେଟ୍ ମନ୍ତ୍ରୀ ବିପୁଳ ଗୋୟଲ୍ ବୁଧବାର କହିଛନ୍ତି, କେଜ୍ରିଓ୍ବାଲଙ୍କ ବିରୋଧରେ ରାଜ୍ୟ ସରକାର ଏତଲା ଦେବେ । ସୋନିପତର ସିଜେଏମ କୋର୍ଟରେ ବିପର୍ଯ୍ୟୟ ପରିଚାଳନା ଧାରା ୨ଡି, ୧୫୪ ଅଧୀନରେ ଏଫଆଇଆଇ ଦିଆଯିବ । ବିପୁଳ ଗୋୟଲ କହିଛନ୍ତି, ଅରବିନ୍ଦ କେଜ୍ରିଓ୍ବାଲ ହରିୟାଣା ଏବଂ ଦିଲ୍ଲୀର ଲୋକମାନଙ୍କ ମଧ୍ୟରେ ଭୟ ସୃଷ୍ଟି କରିବାକୁ ଚେଷ୍ଟା କରିଛନ୍ତି ।
ଆପ୍ ସୁପ୍ରିମୋ ଅରବିନ୍ଦ କେଜ୍ରିଓ୍ବାଲ କହୁଛନ୍ତି ହରିୟାଣା ସରକାର ଯୁମୁନା ପାଣିରେ ବିଷ ମିଶାଉଛନ୍ତି । କିନ୍ତୁ ଖୋଦ୍ ପ୍ରଧାନମନ୍ତ୍ରୀ ମୋଦୀ ଯମୁନା ପାଣି ପିଉଛନ୍ତି । ରାଷ୍ଟ୍ରପତି ମଧ୍ୟ ଏହି ପାଣି ପିଉଥିବା ବେଳେ ସତରେ କଣ ହରିୟାଣା ଯମୁନା ଜଳରେ ବିଷ ମିଶାଉଛି ବୋଲି ବିପୁଳ ଗୋୟଲ ପ୍ରଶ୍ନ କରିଛନ୍ତି । କେଜ୍ରିଓ୍ବାଲ ଯେଉଁଭଳି ଭାବରେ ଦାୟିତ୍ବହୀନ ମନ୍ତବ୍ୟ ଦେଇଛନ୍ତି କାଙ୍କୁ ହରିୟାଣା ସରକାର କ୍ଷମା କରିବେ ନାହିଁ । କେଜ୍ରିଓ୍ବାଲଙ୍କ ଅଭିଯୋଗରେ କୌଣସି ସତ୍ୟତା ନାହିଁ ବୋଲି ସେ କହିଛନ୍ତି ।
ଏହା ପୂର୍ବରୁ ନିର୍ବାଚୟ ଆୟୋଗ ମଙ୍ଗଳବାର ଆପ୍ର ମୁଖ୍ୟ ଅରବିନ୍ଦ କେଜ୍ରିଓ୍ବାଲଙ୍କୁ ନୋଟିସ୍ ଦେଇଥିଲେ । ଏଥିରେ ଯମୁନାରେ ଜହର ମନ୍ତବ୍ୟକୁ ସତ୍ୟ ପ୍ରମାଣିତ କରିବା ଲାଗି ଉପଯୁକ୍ତ ଦସ୍ତାବିଜ୍ ପୈଠ କରିବାକୁ ଇସିଆଇ ନିର୍ଦ୍ଦେଶ ଦେଇଛନ୍ତି । ଯଦି କେଜ୍ରିଓ୍ବାଲ ଏଥିରେ ବିଫଳ ହୁଅନ୍ତି ତେବେ ତାଙ୍କୁ ୩ ବର୍ଷ ପର୍ଯ୍ୟନ୍ତ ଜେଲ୍ ହୋଇପାରେ ବୋଲି ମଧ୍ୟ ଇସିଆଇ କହିଛନ୍ତି । ନିର୍ବାଚନ ଆୟୋଗଙ୍କ ଅନୁସାରେ, କେଜ୍ରିଓ୍ବାଲଙ୍କ ଏଭଳି ଅଭିଯୋଗ ଖୁବ ଗମ୍ଭୀର ହୋଇଥିବା ବେଳେ ପଡ଼ୋଶୀ ରାଜ୍ୟର ଲୋକଙ୍କ ମଧ୍ୟରେ ଶତ୍ରୁତା ସୃଷ୍ଟି କରିପାରେ । ତେଣୁ ତାଙ୍କୁ ଏହି ଅଭିଯୋଗକୁ ପ୍ରମାଣିତ କରିବା ଲାଗି ଯମୁନାରେ ଜହର ବାବଦରେ ସଠିକ୍ ଦସ୍ତାବିଜ୍ ଦେବାକୁ ନିର୍ବାଚନ ଆୟୋଗ ନିର୍ଦ୍ଦେଶ ଦେଇଛନ୍ତି ।
