ଚାଲିଛି ଗ୍ରୀଷ୍ମ ଋତୁ । ଦିନକୁ ଦିନ ବଢି ଚାଲିଛି ଖରାର ପ୍ରକୋପ । ଅତ୍ୟଧିକ ଖରା ଯୋଗୁଁ ଯେଉଁ ଗରମ ହେଉଛି ସେଥିରେ ସମସ୍ତେ ଥଣ୍ଡା ଥିବା ପାଣି ପିଇବାକୁ ପସନ୍ଦ କରୁଛନ୍ତି । ସେଥିଲାଗି ଏବେ ଘରେ ଘରେ ଥଣ୍ଡା ପାଣି ପିଇବା ପାଇଁ ପ୍ଲାଷ୍ଟିକ୍ ବୋତଲରେ ପାଣି ଭରି ଫ୍ରିଜ୍ରେ ରଖିବା ଆରମ୍ଭ ହୋଇଗଲାଣି । କିନ୍ତୁ ଆପଣ ଜାଣନ୍ତି କି, ପ୍ଲାଷ୍ଟିକ ବୋତଲରେ ପାଣି ପିଇବା ଆମ ଶରୀର ପାଇଁ କେତେ କ୍ଷତିକାରକ । ମାତ୍ର ଆପଣ ଯଦି ତମ୍ବା ପାତ୍ରରେ ପାଣି ରଖି ପିଇବା ତାହାଲେ ତାହା ଦେହ ପାଇଁ ହିତକର । ଅର୍ଥାତ୍ ତମ୍ବାରେ ତିଆରି ପାତ୍ରରେ ରଖାଯାଇଥିବା ପାଣି ଅନେକ ଗୁଣରେ ପରିପୂର୍ଣ୍ଣ ହୋଇଥାଏ । ଏହି ପାତ୍ରରେ ରଖାଯାଇଥିବା ପାଣି ଆଣ୍ଟିବ୍ୟାକ୍ଟେରିଆଲ୍, ଆଣ୍ଟିଭାଇରାଲ୍ ଏବଂ ଆଣ୍ଟିଅକ୍ସିଡାଣ୍ଟ ଗୁଣରେ ଭରପୁର । ତେବେ ଆସନ୍ତୁ ଜାଣିବା ତମ୍ବା ପାତ୍ରରେ ପାଣି ରଖି ପିଇଲେ କଣ ସବୁ ଫାଇଦା ମିଳେ ।
ତମ୍ବା ପାତ୍ରରେ ପାଣି ପିଇବାର ଲାଭ ଅନେକ । ଯାହା ଆମ ହଜମ ଶକ୍ତିକୁ ବଢାଇବାରେ ସାହାଯ୍ୟ କରେ। ଏଥିରେ ଥିବା ଆଣ୍ଟିବ୍ୟାକ୍ଟେରିଆଲ୍ ଏବଂ ଆଣ୍ଟିଭାଇରାଲ୍ ଗୁଣ ପାଚନ ତନ୍ତ୍ରରେ ଥିବା ବ୍ୟାକ୍ଟେରିଆ ଏବଂ ଭାଇରସକୁ ମାରିବାରେ ସହାୟକ ହୋଇଥାଏ । ଯାହାଦ୍ୱାରା ପେଟ ସମସ୍ୟା ଦୂର ହୁଏ ଏବଂ ପାଚନକ୍ରିୟା ଠିକ୍ ରୁହେ ।
ତମ୍ବା ପାତ୍ରରେ ପାଣି ରଖି ପିଇବା ଦ୍ୱାରା ଶରୀରରେ କୋଲାଜେନର ଉତ୍ପାଦନ ବୃଦ୍ଧି ପାଏ । ଯାହାଦ୍ୱାରା ଚର୍ମରେ କୁଞ୍ଚନ କମିଯାଏ ଏବଂ ଚର୍ମ ଉଜ୍ଜ୍ୱଳ ହୁଏ । ଏହା ସହିତ, ମେଲାନିନର ଉତ୍ପାଦନ ମଧ୍ୟ ବୃଦ୍ଧି କରେ । ଯାହା ଯୋଗୁଁ କେଶର ରଙ୍ଗ ମଧ୍ୟ ଗାଢ କଳା ରହିଥାଏ । ତମ୍ବା ପାତ୍ରରେ ପାଣି ପିଇବା ଦ୍ୱାରା ଦୃଷ୍ଟିଶକ୍ତି ଭଲ ରୁହେ । ମେଲାନିନର ଉତ୍ପାଦନ ବୃଦ୍ଧି ଆଖି ପାଇଁ ବହୁତ ଲାଭଦାୟକ । ଯଦି ଆପଣ ନିୟମିତ ଭାବରେ ତମ୍ବା ପାତ୍ରରେ ପାଣି ପିଅନ୍ତି, ତେବେ ଏହା କର୍କଟ ରୋଗର ଆଶଙ୍କା କମ୍ କରିବାରେ ସାହାଯ୍ୟ କରେ । ତେବେ ତମ୍ବା ପାତ୍ରରେ ପାଣି ଭରି ରଖିବାର ସଠିକ୍ ସମୟ ହେଉଛି ରାତି । ରାତିସାରା ତମ୍ବା ପାତ୍ରରେ ପାଣି ରହିବା ଦ୍ୱାରା ତମ୍ବା ଉପାଦାନଗୁଡ଼ିକ ପାଣିରେ ଦ୍ରବୀଭୂତ ହୋଇଯାଏ ଏବଂ ଏହି ପାଣି ଅଧିକ ସ୍ୱାସ୍ଥ୍ୟକର ହୋଇଥାଏ ।
