ମୁମ୍ବାଇ ୧୬/୧୦: ବଲିଉଡର ଡ୍ରିମ୍ ଗର୍ଲ। କୋଟି କୋଟି ଫ୍ୟାନ୍ସଙ୍କ ହୃଦୟରେ ରାଜ୍ କରୁଥିବା ହେମା ମାଳିନୀ ଆଜି ତାଙ୍କର ୭୬ ତମ ଜନ୍ମଦିନ ପାଳନ କରୁଛନ୍ତି। ହିନ୍ଦୀ ସିନେମାର ଏହି ଫେମସ୍ ଅଭିନେତ୍ରୀ ନିଜର ପରିଶ୍ରମ ଏବଂ ପ୍ରତିଭା ଆଧାରରେ ଫିଲ୍ମ ଇଣ୍ଡଷ୍ଟ୍ରିରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି। ସେ ଅକ୍ଟୋବର ୧୬, ୧୯୪୮ ରେ ତାମିଲନାଡୁର ଆମ୍ମାନକୁଡିରେ ଜନ୍ମଗ୍ରହଣ କରିଥିଲେ। ହେମାଙ୍କ ପ୍ରକୃତ ନାମ ହେମା ମାଳିନୀ ଚକ୍ରବର୍ତ୍ତୀ । ଫିଲ୍ମ ଇଣ୍ଡଷ୍ଟ୍ରିକୁ ଆସିବା ପରେ ସେ ତାଙ୍କ ନାମରୁ ଚକ୍ରବର୍ତ୍ତୀ ଉପନାମକୁ ହଟାଇ ଦେଇଥିଲେ। କିନ୍ତୁ, ତାଙ୍କର ଏହି ସଫଳତାର ଯାତ୍ରା ଏତେ ସହଜ ନଥିଲା । ପିଲାଦିନେ ସେ ଅଭିନେତ୍ରୀ ହେବାର ସ୍ୱପ୍ନ ଦେଖି ନଥିଲେ, ତାଙ୍କ ମା’ ଜୟଲକ୍ଷ୍ମୀଙ୍କ କଥାରେ ଅଭିନୟ ଦୁନିଆରେ ଏଣ୍ଟ୍ରି କରିଥିଲେ।
କ୍ୟାରିୟର ଆରମ୍ଭରେ ଅନେକ ଥର ରିଜେକ୍ସନର ସମ୍ମୁଖୀନ ହୋଇଥିଲେ ହେମା। ସେତେବେଳେ ସେ ବହୁତ ପତଳା ଥିଲେ । ଯେତେବେଳେ ବି ସେ ଫିଲ୍ମ ଅଡିସନ୍ ପାଇଁ ଯାଉଥିଲେ, ତାଙ୍କୁ ରିଜେକ୍ଟ କରାଯାଉଥିଲା । ଏପରି କି ସେ ଏକ ତାମିଲ ଫିଲ୍ମ ପାଇଁ ସାଇନ୍ କରିଥିଲେ, କିନ୍ତୁ ଚାରି ଦିନର ସୁଟିଂ ପରେ ତାଙ୍କୁ ଫିଲ୍ମରୁ ବାହାର କରି ଦିଆଗଲା।
ତଥାପି ହାର ମାନିନଥିଲେ ହେମା। ନିଜକୁ ଫିଲ୍ମ ପାଇଁ ପ୍ରସ୍ତୁତ କରିଥିଲେ। ସେ ଶାସ୍ତ୍ରୀୟ ନୃତ୍ୟ ଶିଖିବା ଆରମ୍ଭ କଲେ ଏବଂ ତାଙ୍କ ଲୁକ୍ ଉପରେ ଧ୍ୟାନ ଦେଲେ। ଏହା ପରେ ସେ ରାଜ କପୁରଙ୍କ ସହ ଫିଲ୍ମ “ସପନୋ କେ ସୌଦାଗର” ରେ କାମ କରିବାର ସୁଯୋଗ ପାଇଲେ। ଏହି ଫିଲ୍ମ ତାଙ୍କ ଜୀବନକୁ ସଂପୂର୍ଣ୍ଣ ବଦଳାଇ ଦେଇଥିଲା। ଦର୍ଶକ ତାଙ୍କ ଅଭିନୟକୁ ଖୁବ୍ ପସନ୍ଦ କରିଥିଲେ ଏବଂ ଏହା ପରେ ସେ ଅନେକ ଫିଲ୍ମରୁ ଅଫର୍ ପାଇଲେ।
ହେମା ତାଙ୍କ କ୍ୟାରିୟରରେ ୧୦୦ ରୁ ଅଧିକ ଫିଲ୍ମରେ କାମ କରିଛନ୍ତି। ଯାହାର ଅଧାରୁ ଅଧିକ ହିଟ୍ ହୋଇଛି । ଧର୍ମେନ୍ଦ୍ରଙ୍କ ସହ ତାଙ୍କର ୪୦ ଟି ଫିଲ୍ମ ହିଟ୍ ହୋଇଛି। ତାଙ୍କର କଠିନ ପରିଶ୍ରମ ଏବଂ ପ୍ରତିଭା ତାଙ୍କୁ ବଲିଉଡର ଡ୍ରିମ୍ ଗର୍ଲ କରାଇଛି। ଆଜି ବି ହେମା ଅଭିନୟ ଏବଂ ରାଜନୀତିରେ ସକ୍ରିୟ ଅଛନ୍ତି।
