ରାଞ୍ଚି,୨୮/୧୧: ଝାଡ଼ଖଣ୍ଡ ବିଧାନସଭା ନିର୍ବାଚନର ଫଳାଫଳ ସାମ୍ନାକୁ ଆସିବା ପରେ ସରକାର ଗଠନର ପ୍ରକ୍ରିୟା ଆରମ୍ଭ ହୋଇଛି । ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (ଜେଏମ୍ଏମ୍)ର ନେତା ହେମନ୍ତ ସୋରେନ୍ ଗୁରୁବାର ରାଜ୍ୟର ମୁଖ୍ୟମନ୍ତ୍ରୀ ଭାବେ ଶପଥ ନେବାକୁ ଯାଉଛନ୍ତି । ଗୁରୁବାର ଅପରାହ୍ଣରେ ରାଞ୍ଚିର ମୋରହାବାଦୀ ମୈଦାନରେ ଏହି ଶପଥଗ୍ରହଣ ସମାରୋହ ଆୟୋଜିତ ହେବ ।
ସୂତ୍ର ଅନୁସାରେ ହେମନ୍ତ ଗୁରୁବାର ଏକୁଟିଆ ଶପଥ ନେଇପାରନ୍ତି । ମନ୍ତ୍ରିମଣ୍ଡଳର ବିସ୍ତାର ପରେ ହେବ । ଅନ୍ୟ ଏକ ରିପୋର୍ଟରେ ହେମନ୍ତଙ୍କ ସହିତ ଆର୍ଜେଡି ଓ କଂଗ୍ରେସର କିଛି ବିଧାୟକ ମନ୍ତ୍ରୀ ଭାବେ ଶପଥ ନେଇପାରନ୍ତି ବୋଲି କୁହାଯାଇଛି । ଆଉ କିଛି ରିପୋର୍ଟ ଅନୁସାରେ, ଜେଏମ୍ଏମ୍ର ମେଣ୍ଟ ସହଯୋଗୀ ସିପିଆଇ(ଏମ୍ଏଲ୍) ଅଦ୍ୟାବଧି ସରକାରରେ ସାମିଲ ହେବା ନେଇ ନିଷ୍ପତ୍ତି ନେଇନାହିଁ । ସେଥିଲାଗି ନଭେମ୍ବର ୨୯ରେ ଏକ ବୈଠକ ଡକାଯାଇଛି । ସେଥିଯୋଗୁ ହେମନ୍ତ ଏକୁଟିଆ ଶପଥ ନେଇପାରନ୍ତି । ସେପଟେ ହେମନ୍ତଙ୍କ ଶପଥ ଗ୍ରହଣ ସମାରୋହରେ ‘ଇଣ୍ଡିଆ’ ମେଣ୍ଟର ଶକ୍ତି ଦେଖିବାକୁ ମିଳିବ ।
ଅଦ୍ୟାବଧି ୧୦ଟି ପାର୍ଟିର ୧୮ ଜଣ ବରିଷ୍ଠ ନେତା ସମାରୋହକୁ ଆସିବାକୁ ସହମତି ପ୍ରକାଶ କରିଛନ୍ତି । ସେମାନଙ୍କ ମଧ୍ୟରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ୍ଗେ, ରାହୁଲ ଗାନ୍ଧୀ, ଏନ୍ସିପି(ଏସ୍ପି) ଅଧ୍ୟକ୍ଷ ଶରଦ ପାୱାର, ଟିଏମ୍ସି ସୁପ୍ରିମୋ ମମତା ବାନାର୍ଜୀ, ମେଘାଳୟ ମୁଖ୍ୟମନ୍ତ୍ରୀ, ଆପ୍ର ଆବାହକ ଅରବିନ୍ଦ କେଜରିୱାଲ, ଆର୍ଜେଡି ନେତା ତେଜସ୍ୱୀ ଯାଦବ ପ୍ରମୁଖ ସାମିଲ।
