କଟକ,୦୭/୦୧: କେନ୍ଦୁଝର ଜିଲ୍ଲାରେ ଗଠିତ ଜିଲ୍ଲା ମିନେରାଲ୍ ଫାଉଣ୍ଡେସନ୍ ଟ୍ରଷ୍ଟ୍ (ଡିଏମ୍ଏଫଟି)ରେ ଥିବା ଅର୍ଥକୁ ମନମୁଖି ଭାବେ ଖର୍ଚ୍ଚ କରାଯାଇଥିବା ନେଇ ରୁଜୁ ମାମଲାରେ ହାଇକୋର୍ଟ ରାଜ୍ୟ ସ୍ତରୀୟ କମିଟି (ଏସ୍ଏଲ୍ସି)କୁ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି । ଏହି କମିଟି ଅଭିଯୋଗର ଭିତ୍ତିଭୂମି ଏବଂ ଆଧାର କ’ଣ ରହିଛି ତାହା ଉପରେ ମଧ୍ୟ ବିଚାର କରିବ । କମିଟିକୁ ରାଜ୍ୟ ସରକାରଙ୍କ ଆଇନଜୀବୀ ଆବଶ୍ୟକ ରେକର୍ଡପତ୍ର ଯୋଗାଇ ଦେବେ ବୋଲି ହାଇକୋର୍ଟ ନିର୍ଦ୍ଦେଶ ଦେଇଛନ୍ତି ।
ପ୍ରଥମେ ଆବେଦନକାରୀଙ୍କ ଅଭିଯୋଗ ଉପରେ ଏସ୍ଏଲ୍ସି ବିଚାର କରିବ । ପରେ ଯଦି ଆବଶ୍ୟକ ପଡ଼େ ହାଇକୋର୍ଟ ସେଥିରେ ହସ୍ତକ୍ଷେପ କରିବେ କି’ ନାହିଁ ପରବର୍ତ୍ତୀ ଶୁଣାଣିରେ ନିଷ୍ପତ୍ତି ନିଆଯିବ । ମାର୍ଚ୍ଚ ୬ରେ ମାମଲାର ପରବର୍ତ୍ତୀ ଶୁଣାଣି ହେବ । ଯଦି ଆବଶ୍ୟକ ପଡ଼େ ଅଭିଯୋଗ ଆଧାରରେ ଏସ୍ଏଲ୍ସି ଆବଶ୍ୟକ କାର୍ଯ୍ୟାନୁଷ୍ଠାନ ମଧ୍ୟ ନେଇପାରିବ ବୋଲି ହାଇକୋର୍ଟ ତାଙ୍କ ଆଦେଶରେ ସ୍ପଷ୍ଟ କରିଛନ୍ତି । ଶୁଭକାନ୍ତ ନାୟକଙ୍କ ପକ୍ଷରୁ ଆଗତ ମାମଲାର ଶୁଣାଣି କରି ମୁଖ୍ୟ ବିଚାରପତି ଜଷ୍ଟିସ୍ ଚକ୍ରଧାରୀ ଶରଣ ସିଂ ଏବଂ ଜଷ୍ଟିସ୍ ସାବିତ୍ରୀ ରଥଙ୍କୁ ନେଇ ଗଠିତ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି ।
ଆବେଦନକାରୀ ଅଭିଯୋଗ କରିଥିଲେ, ଖଣିଖାଦାନ ଭରା କେନ୍ଦୁଝର ଜିଲ୍ଲାରେ ଖଣିଜ ସମ୍ପଦରୁ ଆୟ ରାଜସ୍ୱକୁ ନେଇ ଡିଏମ୍ଏଫ୍ଟି ଗଠନ ହୋଇଥିଲା । ଏହାର ଏକ ବୋର୍ଡ ମଧ୍ୟ ରହିଛି । ଏହି ବୋର୍ଡର ଅନୁମୋଦନକ୍ରମେ ଏଥିରେ ଥିବା ଅର୍ଥ ଜିଲ୍ଲାର ବିଭିନ୍ନ ପ୍ରକଳ୍ପ ପାଇଁ ଖର୍ଚ୍ଚ କରାଯିବ । କିନ୍ତୁ କିଛି ବର୍ଷରେ ବୋର୍ଡର ଅନୁମୋଦନ ବିନା ପ୍ରାୟ ଶହେ କୋଟି ଟଙ୍କା ଖର୍ଚ୍ଚ କରାଯାଇଛି । ଏଭଳି ବେଆଇନ ଭାବେ ଅର୍ଥ ଖର୍ଚ୍ଚ କରାଯାଇଥିବାରୁ ଏହାର ଉଚ୍ଚସ୍ତରୀୟ ତଦନ୍ତ ଲାଗି ଆବେଦନକାରୀ ପ୍ରାର୍ଥନା କରିଥିଲେ ।
