ଭୁବନେଶ୍ୱର,୦୫/୧୧(ସ୍ମୃତିରଞ୍ଜନ ବିଶ୍ୱାଳ): ୧୫ ବର୍ଷ ଯାଏ ରାସ୍ତାରେ ହାତ ବାଜିବନି । ଖଣ୍ଡିଆ ହେବନି କି ମରାମତି ଦରକାର ପଡ଼ିବନି। ବିଶ୍ୱସ୍ତରୀୟ ହ୍ୱାଇଟ୍ ଟପିଂ ଫର୍ମୁଲାରେ ତିଆରି ହେବ ରାଜଧାନୀର ରାଜରାସ୍ତା । ରାଜ୍ୟର ସମସ୍ତ ସହରର ମୁଖ୍ୟ ରାସ୍ତାକୁ କଂକ୍ରିଟ୍ କରାଯିବ । ପ୍ରଥମେ ଭୁବନେଶ୍ୱରର ନାଲ୍କୋ ଛକରୁ ଆଚାର୍ଯ୍ୟବିହାର ରାସ୍ତାରେ ଏହାର ପରୀକ୍ଷଣ ହେବ ।
ଓଡ଼ିଶାରେ ପ୍ରଥମଥର ପାଇଁ ହ୍ୱାଇଟ୍ ଟପିଂ ଟେକ୍ନୋଲୋଜି ପ୍ରୟୋଗ କରିବାକୁ ଯାଉଛି ପୂର୍ତ୍ତ ବିଭାଗ । ଏଥିରେ ପିଚୁ ରାସ୍ତା ବା ବିଟୁମିନସ୍କୁ ଖୋଳି ତା ଉପରେ ହାଇ ଷ୍ଟ୍ରେନଥ୍ ସିମେଣ୍ଟ କଂକ୍ରିଟ୍(ଉଚ୍ଚ ଶକ୍ତିସମ୍ପନ୍ନ ସିମେଣ୍ଟ କଂକ୍ରିଟ୍) ବିଛାଯିବ । ପିଚୁ ରାସ୍ତାକୁ ପ୍ରଥମେ ପ୍ରାୟ ଅଢ଼େଇ ଇଞ୍ଚ ସ୍କ୍ରାପିଂ ବା ଖୋଳି ଦିଆଯିବ । ଏହା ଉପରେ ୫ରୁ ୬ ଇଞ୍ଚର ପୋର୍ଟଲାଣ୍ଡ ସିମେଣ୍ଟ କଂକ୍ରିଟ୍(ପିସିସି) ପକାଯିବ । କଂକ୍ରିଟ୍ ପକାଇବା ପରେ ୨୮ ଦିନ ଯାଏ ଏହା ଉପରେ ପାଣି ଦିଆଯିବ । ଏହି ସ୍ୱତନ୍ତ୍ର ଧରଣର କଂକ୍ରିଟ ତିଆରି ପାଇଁ ରାଜଧାନୀ ଉପକଣ୍ଠରେ ଏକ ପ୍ଲାଣ୍ଟ ବସିବ । ସିମେଣ୍ଟ କଂକ୍ରିଟ୍ ସହିତ ପ୍ଲାଷ୍ଟିସାଇଜର ଓ ଅନ୍ୟ କେମିକାଲକୁ ମିଶାଇ ଉଚ୍ଚ ଶକ୍ତିସମ୍ପନ୍ନ କଂକ୍ରିଟ୍ ପ୍ରସ୍ତୁତ ହେବ । ରାସ୍ତା ନିର୍ମାଣରେ ଏହି କଂକ୍ରିଟ୍ ବ୍ୟବହାର ହେବ ।
ନାଲ୍କୋ ଛକରୁ ଆଚାର୍ଯ୍ୟବିହାର ରାସ୍ତାରେ ପ୍ରାୟ ୧କିମି ରାସ୍ତାକୁ ପରୀକ୍ଷାମୂଳକ ଭାବେ କଂକ୍ରିଟ୍ କରାଯିବ । କେବଳ ଗୋଟିଏ ପାଶ୍ୱର୍ରେ ପର୍ଯ୍ୟାୟକ୍ରମେ ଏହି କାମ ହେବ । ପ୍ରଥମେ ଗୋଟିଏ ଲେନ୍ କାମ ସରିବା ପରେ ଅନ୍ୟ ଲେନ୍ର କାମ ହେବ । ଏଥିପାଇଁ ପ୍ରାୟ ସାଢ଼େ ୩ କୋଟି ଟଙ୍କା ଖର୍ଚ୍ଚ ହେବ । ପୂର୍ତ୍ତ ବିଭାଗ ଏଥିପାଇଁ ଟେଣ୍ଡର ଆହ୍ୱାନ କରିଛି । ଟେଣ୍ଡର ପ୍ରକ୍ରିୟା ସରିବା ପରେ ଖୁବ୍ଶୀଘ୍ର କାମ ଆରମ୍ଭ ହେବ। ଏହି ପରୀକ୍ଷଣ ସଫଳ ହେଲେ ରାଜଧାନୀ ସମେତ ରାଜ୍ୟର ସମସ୍ତ ସହରର ମୁଖ୍ୟ ରାସ୍ତା ଓ ଭିତର ରାସ୍ତାକୁ ହ୍ୱାଇଟ୍ ଟପିଂ ଟେକ୍ନୋଲୋଜି ଜରିଆରେ କଂକ୍ରିଟ୍ ରୂପ ଦିଆଯିବ ବୋଲି ପୂର୍ତ୍ତ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି । ପିଚୁ ରାସ୍ତାର ଅଧିକ ମରାମତି ଦରକାର ହେଉଛି । ସାଧାରଣତଃ ପିଚୁ ରାସ୍ତାର ସ୍ଥାୟିତ୍ୱ ସର୍ବାଧିକ ୩ରୁ ୫ ବର୍ଷ । ଏହା ପରେ ପିଚୁ ରାସ୍ତାର ମରାମତି ଆବଶ୍ୟକ ପଡ଼େ ।
ପିଚୁ ରାସ୍ତା ଖରାପ ହୋଇ ପାଥହୋଲ୍ ବା ଖାଲଖମା ଭର୍ତ୍ତି ହୋଇଯାଉଛି । ପୁଣି ପ୍ରତିବର୍ଷ ନୂଆ ପିଚୁ ଢଳା ହେଲେ ରାସ୍ତାର ଉଚ୍ଚତା ବଢୁଛି। ରାସ୍ତା ଉଚ୍ଚା ଓ ଲୋକଙ୍କ ଘର ନୀଚ୍ଚା ହେଉଛି । ଲୋକଙ୍କ ଘରେ ପାଣି ପଶୁଛି । ଉଚ୍ଚ ଶକ୍ତିସମ୍ପନ୍ନ କଂକ୍ରିଟ୍ ରାସ୍ତା ତିଅରି ହେଲେ ଏହାର ସ୍ଥାୟିତ୍ୱ ବଢ଼ିଯିବ । ହ୍ୱାଇଟ୍ ଟପିଂ ଟେକ୍ନୋଲୋଜିରେ ରାସ୍ତାର ସ୍ଥାୟିତ୍ୱ ପ୍ରାୟ ୧୫ ବର୍ଷ ବଢ଼ିଯିବ । ନିର୍ମାଣଜନିତ ଫାଟ ରହିବନି ଓ ରାସ୍ତା ଦବିବନି । ରାସ୍ତାରେ କ୍ରାକ୍ ନ ହେବା ପାଇଁ କଂକ୍ରିଟ୍ ଭିତରେ ଫାଇବର୍ ଦିଆଯିବ । ଅଧିକ ତାପମାତ୍ରା ଯୋଗୁ ରାସ୍ତା ତାତିଲେ ଓ ମାତ୍ରାଧିକ ଗାଡ଼ି ବା ଭାରୀ ଯାନ ଚଳାଚଳ କଲେ ପିଚୁ ତରଳି ଦବିଯାଉଛି । ସହରର ଅନେକ ରାସ୍ତାରେ ଏହା ବଡ଼ ସମସ୍ୟା ସୃଷ୍ଟି କରୁଛି । କିନ୍ତୁ ସ୍ୱତନ୍ତ୍ର କଂକ୍ରିଟ୍ ରାସ୍ତାରେ ଏହି ସମସ୍ୟା ଉଭେଇଯିବ ।
ଏହି ରାସ୍ତାର ରଙ୍ଗ ଧଳା ହୋଇଥିବାରୁ ଏହା ଅଧିକ ତାତି ପ୍ରତିଫଳନ କରିବ। ରାସ୍ତା ଆଉ ତାତି ଶୋଷିବନି କି ପରେ ବାୟୁମଣ୍ଡଳକୁ ତାତି ଛାଡ଼ିବନି । ଏହି ହ୍ୱାଇଟ୍ ଟପିଂ ରାସ୍ତା ସହରର ତାତି କମାଇବ । ଅରବାନ୍ ହିଟ୍ ଆଇଲାଣ୍ଡର ପ୍ରଭାବକୁ କମାଇବ ଓ ଏହା ପରିବେଶ ଉପଯୋଗୀ ହେବ ବୋଲି ପୂର୍ତ୍ତ ବିଭାଗ ପକ୍ଷରୁ କୁହାଯାଇଛି । ବିଦେଶରେ ଏହି ଟେକ୍ନୋଲୋଜି ବହୁଳ ଭାବେ ବ୍ୟବହାର ହେଉଛି । ବିଭିନ୍ନ ଉନ୍ନତ ଦେଶ ସେମାନଙ୍କ ରାଜପଥ ଏହି ଟେକ୍ନୋଲୋଜିରେ ତିଆରି କରୁଛନ୍ତି । କେନ୍ଦ୍ର ସଡକ ପରିବହନ ଓ ରାଜମାର୍ଗ ମନ୍ତ୍ରଣାଳୟ ଅଧୀନରେ ଥିବା ସେଣ୍ଟ୍ରାଲ ରୋଡ୍ ରିସର୍ଚ୍ଚ ଇନଷ୍ଟିଚ୍ୟୁଟ୍ (ସିଆରଆରଆଇ) ଦୀର୍ଘ ଗବେଷଣା ପରେ ଏହି ଟେକ୍ନୋଲୋଜିକୁ ପ୍ରୟୋଗ କରିବାକୁ ସବୁଜ ସଙ୍କେତ ଦେଇଛି ।
ଗୁଜୁରାଟ, ମହାରାଷ୍ଟ୍ର ଓ ବେଙ୍ଗାଲୁରୁ ଭଳି ସ୍ଥାନରେ ଏହି ଟେକ୍ନୋଲୋଜିରେ ରାସ୍ତା ନିର୍ମାଣ ଚାଲିଛି । ପିଚୁ ରାସ୍ତା ତୁଳନାରେ ଏହି ରାସ୍ତାର ଆୟୁଷ ଯଥେଷ୍ଟ ବଢ଼ିଯାଉଛି । ଫଳରେ ଦେଶର ଅନେକ ଜାତୀୟ ରାଜପଥ କାମରେ ଏହି ଟେକ୍ନୋଲୋଜି ବ୍ୟବହାର କରିବାକୁ ମନ୍ତ୍ରଣାଳୟ ଯୋଜନା କରିଛି । ବେଙ୍ଗାଲୁରୁରେ ୧୮୦୦ କୋଟି ଟଙ୍କା ଖର୍ଚ୍ଚରେ ୧୫୭ କିମି ଦୂର ରାସ୍ତାକୁ ହ୍ୱାଇଟ୍ ଟପିଂ ଟେକ୍ନୋଲୋଜିରେ ତିଆରି କରାଯାଉଛି । ପୂର୍ବରୁ ସୋନପୁର-ବଲାଙ୍ଗୀର ରାସ୍ତା ଓ ବାଲୁଗାଁ ଜାତୀୟ ରାଜପଥର କିଛି ସ୍ଥାନକୁ ପେଭମେଣ୍ଟ କ୍ୱାଲିଟି କଂକ୍ରିଟ୍ (ପିକ୍ୟୁସି) ମାନରେ ତିଆରି କରାଯାଇଥିଲା । ଏବେ ଓଡ଼ିଶାରେ ପ୍ରଥମଥର ପାଇଁ ରାଜଧାନୀରେ ହ୍ୱାଇଟ୍ ଟପିଂ ରାସ୍ତା ତିଆରି ହେବ ।
