ଝାରସୁଗୁଡ଼ା,୦୩/୦୬: ହୀରାକୁଦ ବୁଡ଼ି ଜମିରେ ଧାନ ଚାଷକୁ ନେଇ ସରକାରଙ୍କ ବଡ଼ ଘୋଷଣା । ଏଥର ରବି ଋତୁରେ ବୁଡ଼ି ଜମିରେ ଧାନ ଚାଷ କରିଥିବା ଜିଲ୍ଲାର ଲଖନପୁର ବ୍ଲକର ୭୯୬ ଜଣ ଚାଷୀଙ୍କ ଠାରୁ ରାଜ୍ୟ ସରକାର ଧାନ କିଣିବେ । ମାତ୍ର ଆଗକୁ ବୁଡ଼ି ଜମି ତଥା ସରକାରୀ ଜମିରେ ଧାନ ଚାଷ ନ କରିବାକୁ ଚାଷୀଙ୍କୁ ଜଣାଇ ଦେବାକୁ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ଝାରସୁଗୁଡ଼ା ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି । ଯେଉଁ ଚାଷୀମାନେ ସରକାରୀ ବୁଡ଼ି ଜମିରେ ଧାନ ଚାଷ କରିବେ ସେମାନଙ୍କ ଧାନ ଆଉ ସରକାର କିଣିବେ ନାହିଁ ଏହା ସ୍ପଷ୍ଟ କରି ଦେଇଛନ୍ତି ବିଭାଗୀୟ ଅତିରିକ୍ତ ସଚିବ ସୁଦାମ ଚରଣ ମଣ୍ଡଳ ।
ସୋମବାର ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପକ୍ଷରୁ ଜାରି ହୋଇଥିବା ପତ୍ର ସଂଖ୍ୟା ୯୩୮୮ ଅନୁଯାୟୀ ଜିଲ୍ଲାପାଳ ଗତ ମେ’ ୭ ତାରିଖ ଦେଇଥିବା ପତ୍ର ସଂଖ୍ୟା ୩୧୪ ଉପରେ ବିଚାର କରାଯାଇ ସରକାର ଜିଲ୍ଲାର ଲଖନପୁର ବ୍ଲକର ବୁଡ଼ି ଜମିରେ ଧାନ ଚାଷ କରିଥିବା ୭୯୬ ଜଣ ଚାଷୀଙ୍କ ପୋର୍ଟାଲରେ ପଞ୍ଜିକରଣ କରାଯିବା ସହ ସେମାନଙ୍କ ଠାରୁ ଧାନ କିଣିବାକୁ ନିର୍ଦ୍ଦେଶ ଦିଆଯାଇଛି । ଖରିଫ ୨୦୨୪-୨୫ ବର୍ଷରେ ଏହି ଧାନ ବିକିବା ଲାଗି ରବି ଋତୁରେ ଚାଷ କରିଥିବା ୭୯୬ ଜଣ ଚାଷୀ ଏଥିସହ ଧାନ ବିକିବାକୁ ଯୋଗ୍ୟତା ଅର୍ଜନ କରିଛନ୍ତି । ସରକାରୀ ଜମିରେ ଆଗକୁ ଧାନ ଚାଷ କଲେ ସରକାର ତାହା ଗ୍ରହଣ କରିବେ ନାହିଁ ବୋଲି ସ୍ପଷ୍ଟ କରାଯାଇଛି ।
ପ୍ରକାଶଯୋଗ୍ୟ ଜିଲ୍ଲାରେ ରବି ଧାନ ସଂଗ୍ରହ ଲାଗି ଜିଲ୍ଲାର ସମୁଦାୟ ୧୫୮୫ ଜଣ ଚାଷୀ ପଞ୍ଜିକୃତ ହୋଇଛନ୍ତି । ଗତ ମେ’ ୨୩ ତାରିଖ ଠାରୁ ଧାନ ସଂଗ୍ରହ ଜିଲ୍ଲାରେ ଆରମ୍ଭ ହୋଇଛି । ଚାଷୀମାନେ ମଣ୍ଡିକୁ ନେଇ ଧାନ ବିକିବା ଆରମ୍ଭ ହୋଇ ସାରିଛି । ପ୍ରଥମ ପର୍ଯ୍ୟାୟରେ ଜିଲ୍ଲାକୁ ୨୮ ହଜାର କ୍ୱିଣ୍ଟାଲ ଧାନ ସଂଗ୍ରହ ଲାଗି ଲକ୍ଷ୍ୟ ଧାର୍ଯ୍ୟ ହୋଇଥିଲା । ତାହା ପରବର୍ତ୍ତୀ ସମୟରେ ଆହୁରି ୧୪ ହଜାର ୭ ଶହ କ୍ୱିଣ୍ଟାଲ ବୃଦ୍ଧି କରାଯାଇ ଏଯାଏ ସମୁଦାୟ ୪୨ ହଜାର ୭୮୦ କ୍ୱିଣ୍ଟାଲ ଧାନ ସଂଗ୍ରହ ପାଇଁ ଲକ୍ଷ୍ୟ ରଖାଯାଇଛି ।
ହୀରାକୁଦ ନଦୀବନ୍ଧ ଯୋଜନା ସମୟରେ ବନ୍ଧ ନିର୍ମାଣ ପାଇଁ ଜମି ଅଧିଗ୍ରହଣ କରାଯାଇଥିଲା । ସେଥିରୁ ଯେଉଁ ଜମି ୬୩୦ରୁ ୬୩୨ ଆର୍ଏଲ୍ ମଧ୍ୟରେ ରହିଗଲା ତାହାକୁ ବୁଡ଼ି ଅଞ୍ଚଳବାସୀ ତଥା ଜମି ଓ ଘରଦ୍ୱାର ହରାଇଥିବା ବିସ୍ଥାପିତ ପରିବାରଗୁଡ଼ିକ ଚାଷବାସ କରି ଚଳି ଆସୁଛନ୍ତି । ଭୋଗ ଦଖଲରେ ଥିଲେ ହେଁ ଉକ୍ତ ବୁଡ଼ି ଜମିର ସ୍ୱତ୍ତ୍ୱ ସେମାନଙ୍କ ନାହିଁ । ଅଧିଗୃହୀତ ଜମି ଜଳ ସଂପଦ ବିଭାଗ ଅଧୀନରେ ରହିଛି । ହଜାର ହଜାର ଏକର ଜମି ଲଖନପୁର ତହସିଲ ଅଞ୍ଚଳରେ ବୁଡ଼ି ଅଞ୍ଚଳର ଚାଷୀମାନେ ଚାଷବାସ କରୁଥିବାରୁ ପ୍ରତିବର୍ଷ ସେମାନଙ୍କ ଉତ୍ପାଦିତ ଧାନ ବିକ୍ରି ନେଇ ସମସ୍ୟା ଲାଗି ରହିଛି ।
ସେମାନଙ୍କ ଜମି ସ୍ୱତ୍ତ୍ୱ ନ ଥିବାରୁ ଚାଷୀ ପଞ୍ଜିକରଣ ହୋଇ ପାରୁନାହିଁ । ଏସବୁ ସମସ୍ୟାକୁ ଦେଖି ପ୍ରତିବର୍ଷ ଚାଷୀମାନେ ସେମାନଙ୍କ ଧାନ ସରକାର କିଣିବାକୁ ଦାବି କରି ଆସିଛନ୍ତି । ହେଲେ ଏବେ ସରକାର ଆଗକୁ ବୁଡ଼ି ଜମି ତଥା ସରକାରୀ ଜମିରେ ଧାନ ଚାଷ କଲେ ଉତ୍ପାଦିତ ଧାନ ନ କିଣିବାକୁ ଚେତାବନୀ ଦେଇଥିବାରୁ ଚାଷୀମାନେ ଅଡ଼ୁଆରେ ପଡ଼ିବା ନିଶ୍ଚିତ ।ହଜାର ହଜାର ବୁଡ଼ି ଜମିକୁ ନେଇ ଚାଷୀମାନେ ଆଗକୁ କିଭଳି ଚାଷବାସ କରିବେ ସେନେଇ ବିତର୍କ ସୃଷ୍ଟି ହୋଇଛି ।
