ଭୁବନେଶ୍ୱର,୩୧/୦୫: ରଥଯାତ୍ରା ହେଉ କି ବିଧାନସଭା, ସବୁ ଆଇନ୍ ଶୃଙ୍ଖଳା କିମ୍ବା ପାଟ୍ରୋଲିଂ ସବୁଠି ହୋମ୍ଗାର୍ଡ(ଗୃହରକ୍ଷୀ) । ପୁଲିସ୍ ସହ କାନ୍ଧରେ କାନ୍ଧ ମିଶାଇ କାମ କରୁଛନ୍ତି । ଖାଲି ସେତିକି ନୁହେଁ ବଡ଼ ବାବୁ(ବରିଷ୍ଠ ପ୍ରଶାସନିକ ଅଧିକାରୀ)ଙ୍କ ଘରେ ବି ଏମାନେ ଗଧ ଖଟିଣି ଖଟୁଛନ୍ତି । ତଥାପି ଏମାନେ ନିର୍ଯାତିତ । ଯେଉଁଭଳି ଭାବରେ ସେମାନେ ପରିଶ୍ରମ କରୁଛନ୍ତି ସେଭଳି ପ୍ରାପ୍ୟ ପାରିଶ୍ରମିକ ସେମାନଙ୍କୁ ମିଳୁନାହିଁ । ବାବୁ ଏମାନଙ୍କୁ ଗୋତି ଶ୍ରମିକ ଭଳି ଖଟାଉଛନ୍ତି । ହେଲେ ଛୁଟିରେ ରହିଲେ ଦରମା ନାହିଁ । ପୁଲିସ୍ର ହାତ ଗୋଡ ସାଜିଥିବା ହୋମ୍ଗାର୍ଡମାନଙ୍କର ଏବେ ଦୟନୀୟ ସ୍ଥିତିରେ ।
ରାଜ୍ୟରେ ୨୦ ହଜାର ୧୭୫ ମଞ୍ଜୁରୀପ୍ରାପ୍ତ ଗୃହରକ୍ଷୀ ପଦ ରହିଛି । ବର୍ତ୍ତମାନ ପ୍ରାୟ ୧୮ ହଜାରରୁ ଅଧିକ ଗୃହରକ୍ଷୀ ଅଛନ୍ତି । ଯେଉଁମାନେ ଆଇନ ଶୃଙ୍ଖଳା, ପାଟ୍ରୋଲିଂ, ବିପର୍ଯ୍ୟୟ ପରିଚାଳନା, ରଥଯାତ୍ରା ଟ୍ରାଫିକ୍ ନିୟନ୍ତ୍ରଣ କରିବାରେ ପ୍ରମୁଖ ଭୂମିକା ଗ୍ରହଣ କରୁଛନ୍ତି । ଜଣେ ଗୃହରକ୍ଷୀ ତିନି ବର୍ଷ ପାଇଁ ନିୟୋଜିତ ହୁଅନ୍ତି । ତାଙ୍କ ସେବା ଅବଧି ତାଙ୍କ ବରିଷ୍ଠ କର୍ମଚାରୀଙ୍କ ଦ୍ୱାରା ବୃଦ୍ଧି କରାଯାଇଥାଏ । ବର୍ଷକୁ ପ୍ରାୟ ୪ ଶହରୁ ୫ ଶହ ଗୃହରକ୍ଷୀଙ୍କୁ ବହିଷ୍କାର କରାଯାଏ । କାରଣ ଏମାନଙ୍କର ସରକାରୀ କର୍ମଚାରୀଙ୍କ ଭଳି ଅବସର ବ୍ୟବସ୍ଥା ନଥାଏ । ଗୃହରକ୍ଷୀମାନଙ୍କୁ କତ୍ତୃ ର୍ପକ୍ଷ ଯେକୌଣସି ସମୟରେ ସେବାରୁ ବହିଷ୍କାର କରିପାରିବେ ।
ସରକାରୀ କର୍ମଚାରୀ ଏବଂ ଅନ୍ୟାନ୍ୟ ସୁବିଧା ସହିତ ମାସିକ ଦରମା ପାଉଥିବା ପୁଲିସ୍ କର୍ମଚାରୀଙ୍କ ପରି ନୁହେଁ, ହୋମଗାର୍ଡ ଯେତିକି ଦିନ ଡ୍ୟୁଟି କରିବେ ସେତିକି ଦରମା ପାଇବେ । ବର୍ତ୍ତମାନ, ଗୃହରକ୍ଷୀଙ୍କୁ ଡ୍ୟୁଟିରେ ଯୋଗଦେଲେ ଦୈନିକ ୬୩୯ ଟଙ୍କା ହିସାବରେ ଦରମା ପାଉଛନ୍ତି । ଏହା ବ୍ୟତୀତ ସେମାନଙ୍କ ପାଇଁ ଅନ୍ୟ କୌଣସି ସୁବିଧା, ଭତ୍ତା ଏବଂ ଅବସରକାଳୀନ ସୁବିଧା ନାହିଁ । ସବୁଠାରୁ ବଡ଼ କଥା ହେଲା ଯେଉଁ କାମ ହୋମ୍ଗାର୍ଡ କରୁଛନ୍ତି ସେହି କାମ ପୁଲିସ୍ କନଷ୍ଟେବଳ ଓ ହାବିଲ୍ଦାର ବି କରୁଛନ୍ତି । ହୋମଗାର୍ଡଙ୍କ ତୁଳନାରେ ପୁଲିସ୍ କର୍ମଚାରୀମାନଙ୍କୁ ୨/୩ ଗୁଣା ଅଧିକ ଦରମା ଓ ଅନ୍ୟାନ୍ୟ ସୁବିଧା ଦିଆଯାଉଛି ।
୭୦% ପୁଲିସ ଗାଡ଼ି ଚଳାଉଛନ୍ତି ହୋମ୍ଗାର୍ଡ
ପୁଲିସ୍ ବିଭାଗର ୬୭୦୧ ଗାଡ଼ିରୁ ୭୦% ହୋମ୍ଗାର୍ଡ ଚଳାଉଛନ୍ତି । ଖାଲି ସେତିକି ନୁହେଁ ରାଜ୍ୟରେ ଥିବା ସବୁ ଥାନାର ପାଟ୍ରୋଲିଂ ଗାଡ଼ିରେ ମଧ୍ୟ ହୋମ୍ଗାର୍ଡ ଡ୍ରାଇଭର । ଖାଲି ସେତିକି ନୁହେଁ ଇନ୍ସପେକ୍ଟରଙ୍କଠାରୁ ଆରମ୍ଭ କରି ଏଏସ୍ପି ପର୍ଯ୍ୟନ୍ତ ସମସ୍ତଙ୍କ ଗାଡ଼ି ଚାଳକ ବି ହୋମ୍ଗାର୍ଡ । ଅନେକ ଆଇପିଏସ୍ଙ୍କ ଏଫ୍ଓ ଏବଂ ଘରୋଇ କାର୍ଯ୍ୟରେ ସେମାନେ ନିଯୁକ୍ତ । ଅନେକ ହୋମ୍ଗାର୍ଡ ଥାନାରେ ଓ ଅଫିସ୍ରେ କମ୍ପ୍ୟୁଟର କାମ ମଧ୍ୟ କରୁଛନ୍ତି । ହେଲେ ତାଙ୍କ ପ୍ରତି ବିଭାଗର ଅଧିକାରୀମାନେ ଗୋତି ଶ୍ରମିକ ଭଳି ଆଚାରଣ କରୁଛନ୍ତି । ଜଣେ ହୋମଗାର୍ଡ଼ଙ୍କ କହିବା ଅନୁସାରେ ଯେଉଁଠି ପୁଲିସ୍ କର୍ମଚାରୀମାନେ ଭୁଲ୍ କରିବେ ସେଠାରେ ଯଦି ହୋମ୍ଗାର୍ଡ ଡ୍ୟୁଟିରେ ଥିବ ତା’ହେଲେ ପ୍ରଥମ କାର୍ଯ୍ୟାନୁଷ୍ଠାନ ହୋମ୍ଗାର୍ଡଙ୍କ ଉପରେ ହେବ । ପୁଲିସ୍ କର୍ମଚାରୀମାନେ କିଛି ଦିନ ନିଲମ୍ବିତ ହେବେ । ପୁଣି ଚାକିରିକୁ ଫେରିବେ । ହେଲେ ହୋମ୍ଗାର୍ଡଙ୍କୁ ଆଉ ଚାକିରି ମିଳିବ ନାହିଁ । ଏମିତି ଅନେକ ନଜିର ରହିଛି ।
ଦୈନିକ ଦରମା ୬୩୯ ଟଙ୍କା
୨୦୧୭ ପର୍ଯ୍ୟନ୍ତ ହୋମଗାର୍ଡଙ୍କୁ ଦିନକୁ ୨ଶହ ଟଙ୍କା ମିଳୁଥିଲା । ସବୁ ଦିନ କାମ କଲେ ୬ ହଜାର ଟଙ୍କା ଦରମା ମିଳୁଥିଲା । ବହୁ ଧର୍ମଘଟ ପରେ ୨୦୧୮ରେ ଦରମା ବଢ଼ି ଦୈନିକ ୩ ଶହ ଟଙ୍କା ହେଲା । ୨୦୨୦ରେ ହୋମ୍ଗାର୍ଡଙ୍କ ନିଯୁକ୍ତି ବନ୍ଦ କରି ଦେଇଥିଲେ ସରକାର । ଯେଉଁମାନେ ଥିଲେ ସେମାନେ ଧାରଣ, କାର୍ଯ୍ୟବନ୍ଦ ଆନ୍ଦୋଳନ କରିବା ପରେ ୨୦୨୨ରେ ସେମାନଙ୍କୁ ଦିନକୁ ୪୧୬ ଟଙ୍କା ମିଳିଲା । ହେଲେ ସର୍ତ୍ତ ବଦଳିଲା ନାହିଁ । ଅର୍ଥାତ କାମ ନ କଲେ ଦରମା ନାହିଁ । ୨୦୨୩ରେ ଦିନକୁ ୫୩୩ ଟଙ୍କା ଦେବାକୁ ସରକାର ନିଷ୍ପତ୍ତି ନେଇଥିଲେ । ୨୦୨୫ରେ ଦୁଇ ଥର ଦରମା ବଢ଼ି ଏବେ ଦୈନିକ ୬୩୯ରେ ପହଞ୍ଚିଛି ।
ଅଧିକ ପଢ଼ନ୍ତୁ :- Jatra Controversy: ଯାତ୍ରାପାର୍ଟି ହିରୋଇନ୍ କରିବାକୁ ପ୍ରତିଶ୍ରୁତି ଦେଇ ଦୁଷ୍କର୍ମ, ଟଙ୍କା ନଦେବାରୁ ଅଶ୍ଲୀଳ ଭିଡ଼ିଓ ଭାଇରାଲ ଧମକ
କମିଶନରେଟ୍ ପୁଲିସ୍ରେ ଯଦି ଦୁର୍ଘଟଣାରେ ଜଣେ କନଷ୍ଟେବଳର ମୃତ୍ୟୁ ହେଉଛି ତା’ହେଲେ ତାକୁ ବ୍ୟାଙ୍କ୍ ବୀମା ବାବଦକୁ ୧ କୋଟି ଟଙ୍କା ମିଳୁଛି । ହେଲେ ହୋମ୍ଗାର୍ଡଙ୍କୁ ଟଙ୍କା ଟିଏ ବି ମିଳୁନାହିଁ ।କିନ୍ତୁ ପରିତାପର ବିଷୟ ସବୁଦିନ ଡ୍ୟୁଟିରେ ହୋମ୍ଗାର୍ଡଙ୍କୁ ବଡ଼ ବାବୁମାନଙ୍କ ରୋଷର ଶିକାର ହେବାକୁ ପଡ଼ିଥାଏ । ବଡ଼ବାବୁଙ୍କ ଘରେ ଏମିତି କୌଣସି କାମ ନାହିଁ ଯାହାକୁ ସେମାନେ ହୋମଗାର୍ଡଙ୍କ ଦ୍ୱାରା କରାଉନାହାନ୍ତି । ହେଲେ ଏମାନଙ୍କ ପାଇଁ କିଛି ନାହିଁ ।
