ଦାରିଙ୍ଗବାଡି,୨୭/୦୪: କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ବ୍ଲକ ବୁଡ଼ାଗୁଡା ପଞ୍ଚାୟତରେ ଦେଖିବାକୁ ମିଳିଛି କାଳବୈଶାଖୀ ପ୍ରଭାବ । ଯାହା ଫଳରେ ଡିଙ୍ଗେଲି ଗ୍ରାମର ପୂର୍ଣ୍ଣଚନ୍ଦ୍ର ରାଉତ ଘର ସମ୍ପୂର୍ଣ୍ଣ ନଷ୍ଟ ହୋଇଥିବା ଦେଖିବାକୁ ମିଳିଛି । ଘରେ ଥିବା ଚାଉଳ, ଧାନ ସମ୍ପୂର୍ଣ୍ଣ ନଷ୍ଟ ହୋଇଥିବା ବେଳେ ବର୍ତ୍ତମାନ ଘରେ ରହିବା ପାଇଁ ମଧ୍ୟ କୌଣସି ସୁବିଧା ନାହିଁ ।
ସୂଚନା ମୁତାବକ, ଶନିବାର ଅପରାହ୍ନ ୪ଟାରେ ହଠାତ ଘଡଘଡି ପବନ ସହିତ କୁଆପଥର ବର୍ଷା ହୋଇଥିଲା । ହେଲେ ସେହି ସମୟରେ ଘରେ ନଥିଲେ ପୂର୍ଣ୍ଣଚନ୍ଦ୍ର ରାଉତ । ସେ ତାଙ୍କ ସ୍ତ୍ରୀ ସହିତ ବାଲିଗୁଡା ଯାଇଥିଲେ । ସନ୍ଧ୍ୟା ୫ଟାରେ ଘରେ ପହଞ୍ଚି ଦେଖିଲା ବେଳକୁ ଘର ଆଉ ଘର ହୋଇନଥିଲା । ଘରର ଆଜବେଷ୍ଟ ଉଡି ବାହାରେ ପଡିଥିଲା ଘରେ ଥିବା ଚାଉଳ ଧାନ ବସ୍ତା ଉପରେ ପାଣି ଏବଂ କୁଆପଥର ପଡି ରହିଥିଲା । ଏସବୁ ଦେଖି ପୂର୍ଣ୍ଣଚନ୍ଦ୍ରଙ୍କ ମୁଣ୍ଡ ଆଉ କିଛି କାମ କରିନଥିଲା । ପରେ ପଡୋଶୀ ମାନେ ଆସି କହିଥିଲେ ଯେ ହଠାତ ପବନ ହେବା ସହ ବର୍ଷା ହୋଇ ବଜ୍ରପାତ ଘଟିଥିଲା । ଫଳରେ ତୁମ ଘର ସମ୍ପୂର୍ଣ୍ଣ ଭାଙ୍ଗି ଯାଇଛି । ପରେ ସ୍ୟାମୀ ସ୍ତ୍ରୀ ରାତିରେ ଉପାସରେ ରହିଥିଲେ । ଏହି କାଳବୈଶାଖୀ ପ୍ରଭାବରେ କ୍ଷତି ହୋଇଥିବା ପରିବାରକୁ କ୍ଷତି ପୂରଣ ପାଇଁ ସ୍ଥାନୀୟ ସରପଞ୍ଚ ତାତୁରା ପ୍ରଧାନ ଏବଂ ରାଜସ୍ୱ ନିରକ୍ଷକ ପାଖରେ ନିବେଦନ କରିଛନ୍ତି ପୂର୍ଣ୍ଣଚନ୍ଦ୍ର । କ୍ଷତିଗ୍ରସ୍ତ ପରିବାରକୁ ସରକାରୀ ସହାୟତା ଯୋଗାଇ ଦେବା ପାଇଁ ଗ୍ରାମବାସୀ ନିବେଦନ କରିଛନ୍ତି ।
