ପାପଡାହାଣ୍ଡି, ୭/୭(ଆପ୍ର): ନବରଙ୍ଗପୁର ଜିଲ୍ଲା ପାପଡାହାଣ୍ଡି ଥାନା ପାତ୍ରଗୁଡା ଗ୍ରାମରେ ଏସଏଚଜି ମହିଳାଙ୍କ ଟଙ୍କା ହଡପ ଘଟଣାରେ ଫେରାର ହୋଇଥିବା ଅଭିଯୁକ୍ତ ଗିରଫ ହୋଇଛି । ଗିରଫ ଅଭିଯୁକ୍ତକୁ କୋର୍ଟ ଚାଲାଣ କୋରାଯାଇଛି ।
ସୂଚନା ଅନୁଯାୟୀ କେନ୍ଦ୍ରାପଡ଼ା ଜିଲ୍ଲା ଚନ୍ଦୋଲା ଗ୍ରାମର ଅସିତ ମହାନ୍ତି ଓ ତାଙ୍କ ସ୍ତ୍ରୀ ମଧୁସ୍ମିତା ମହାନ୍ତି ଦୀର୍ଘ ୧୦ ବର୍ଷ ହେଲା ପାପଡାହାଣ୍ଡି ବ୍ଲକ ପାତ୍ରଗୁଡା ଗ୍ରାମରେ ରହି ଆସୁଥିଲେ । ଏଠାରେ ମହିଳା ମାନଙ୍କୁ ନେଇ ଏସଏଚଜି ଗୃପ ମାଧ୍ୟମରେ ପ୍ରୋଲଭନ ଦେଖାଇ ବେସରକାରୀ ବ୍ୟାଙ୍କ ମାନଙ୍କଠାରେ ରୁଣ କରି ଟଙ୍କା ଉଠାଣ କରିଥିଲେ । ପ୍ରାୟ ୧୫ ଜଣ ମହିଳାଙ୍କ ଠାରୁ ୩ ଲକ୍ଷରୁ ଉର୍ଦ୍ଧ ଟଙ୍କା ଓ ଗ୍ରାମବାସୀ ବନ୍ଧକ ରଖିଥିବା ସୁନା ଗହଣା ନେଇ ଗତ ନଭେମ୍ବର ମାସରୁ ଅସିତ ମହାନ୍ତି ଓ ମଧୁସ୍ମିତା ମହାନ୍ତି ଫେରାର ହୋଇଯାଇଥିଲେ ।
ଏନେଇ ପାତ୍ରଗୁଡା ଗ୍ରାମର ମନମତି ପୂଜାରୀ ଓ ୧୫ ଜଣ ମହିଳା ୨୦୨୪ ନଭେମ୍ବର ମାସରେ ପାପଡାହାଣ୍ଡି ଥାନାରେ ଲିଖିତ ଅଭିଯୋଗ ମଧ୍ୟ କରିଥିଲେ | ଏନେଇ ପାପଡାହାଣ୍ଡି ଥାନା କେଶ ନଂ ୨୩୯/୨୪ ରୁଜୁ କରି ତଦନ୍ତ ଜାରି ରହିଥିଲା । ତେବେ ବିଶେଷ ସୂତ୍ରରୁ ଖବର ପାଇ ଅସିତ ମହାନ୍ତିକୁ ପାପଡାହାଣ୍ଡି ପୋଲିସ ଗିରଫ କରି କୋର୍ଟ ଚାଲାଣ କରିଥିବା ଥାନା ଅଧିକାରୀ ଦୀପକ କୁମାର ଜେନା ସୂଚନା ଦେଇଛନ୍ତି | ତେବେ ବର୍ତ୍ତମାନ ଯାଏଁ ମଧ୍ୟ ମଧୁସ୍ମିତା ମହାନ୍ତି ଫେରାର ରହିଥିବା ସୂଚନା ମିଳିଛି ।
