ବିନିକା, ୧୮/୦୬: ବିଳମ୍ୱିତ ରାତିରେ ଧକ୍କା ଦେଲା ଅଜଣା ଗାଡ଼ି । ଦୁର୍ଘଟଣାରେ ସ୍ୱାମୀଙ୍କ ମୃତ୍ୟୁ ହୋଇଥିବା ବେଳେ ସ୍ତ୍ରୀ ଗୁରୁତର ହୋଇଛନ୍ତି । ମୃତକ ହେଳେ ବିନିକା ଦଣ୍ଡସେନା ପଡ଼ାର ସୁନୀଲ ସେଠି (୪୫ ବର୍ଷ) । ସୁବର୍ଣ୍ଣପୁର ଜିଲ୍ଲା ରାମପୁର ବିନିକା ମୁଖ୍ୟରାସ୍ତା ସଲମାଟିକ୍ରା ଛକ ପାଖରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ସୁନୀଲ ସେଠି ଓ ତାଙ୍କ ସ୍ତ୍ରୀ ସିଂଘିଯୁବାଠାରେ ଥିବା ଦୋକାନ ବନ୍ଦ କରି ରାତିରେ ଏକ ବାଇକ୍ ଯୋଗେ ଘରକୁ ଫେରୁଥିଲେ । ରାମପୁର-ବିନିକା ମୁଖ୍ୟରାସ୍ତା ସଲମାଟିକ୍ରା ଛକ ପାଖରେ ଏକ ଅଜଣା ଗାଡ଼ି ତାଙ୍କୁ ଧକ୍କା ଦେଇ ଚାଲି ଯାଇଥିଲା । କିଛି ସ୍ଥାନୀୟ ଯୁବକ ସୁନୀଲଙ୍କ ସ୍ତ୍ରୀଙ୍କୁ ବିନିକା ଡାକ୍ତରଖାନା ଭର୍ତ୍ତି କରିଥିଲେ । ପରେ ତାଙ୍କୁ ଗୁରୁତର ବୁର୍ଲା ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିଲା । ଅନ୍ୟପଟେ ସୁନୀଲଙ୍କୁ ୧୦୮ ଯୋଗେ ବିନିକା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଅଣାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ବୁଧବାର ଶବ ବ୍ୟବଚ୍ଛେଦ ପରେ ପରିବାରଲୋକଙ୍କୁ ଶବ ହସ୍ତାନ୍ତର କରାଯିବ । ଘଟଣାସ୍ଥଳରେ ବିନିକା ପୁଲିସ ପହଞ୍ଚି ତଦନ୍ତ ଜାରି ରଖିଛି ।
