ରାୱଲପିଣ୍ଡି,୨୪/୦୨: ଆଇସିସି ଚାମ୍ପିଅନ୍ସ ଟ୍ରଫିରେ ଗ୍ରୁପ୍ ପର୍ଯ୍ୟାୟ ମୁକାବିଲା। ଆଜି ବାଂଲାଦେଶ ଭେଟିବ ନ୍ୟୁଜିଲାଣ୍ଡ। ପ୍ରଥମ ମ୍ୟାଚ୍ରେ ବାଂଲାଦେଶ ଭାରତଠୁ ପରାଜିତ ହୋଇଥିଲା । ତେଣୁ ଟୁର୍ଣ୍ଣାମେଣ୍ଟରେ ତିଷ୍ଠି ରହିବାକୁ ହେଲେ ଦଳକୁ ନ୍ୟୁଜିଲାଣ୍ଡ ବିପକ୍ଷରେ ଶ୍ରେଷ୍ଠ ପ୍ରଦର୍ଶନ ଦେଇ ବିଜୟୀ ହେବାକୁ ପଡ଼ିବ । ନଚେତ ବିଦାୟ ନେବା ସୁନିଶ୍ଚିତ ହୋଇଯିବ ।
ନ୍ୟୁଜିଲାଣ୍ଡ ଶ୍ରେଷ୍ଠ ଫର୍ମରେ ରହିଛି । ପ୍ରଥମ ମ୍ୟାଚ୍ରେ ଆୟୋଜକ ପାକିସ୍ତାନକୁ ପରାଜିତ କରିଥିଲା । ତେଣୁ ବାଂଲାଦେଶକୁ ପରାଜିତ କରି ଦଳ ସେମି ଫାଇନାଲରେ ସ୍ଥାନ ପକ୍କା କରିବାକୁ ଲକ୍ଷ୍ୟ ରଖିଛି । ଶେଷ ଥର ଦିନିକିଆରେ ଦୁଇ ଦଳ ୨୦୨୩ରେ ମୁହାଁମୁହିଁ ହୋଇଥିଲେ । ବାଂଲାଦେଶ ୯ ୱିକେଟ୍ରେ ବିଜୟୀ ହୋଇଥିଲା ।
ଚାମ୍ପିଅନ୍ସ ଟ୍ରଫିର ପ୍ରଥମ ମ୍ୟାଚରେ ପାକିସ୍ତାନକୁ ପରାସ୍ତ କରିଥିଲା ନ୍ୟୁଜିଲାଣ୍ଡ ଟିମ୍ । ଦଳ ପକ୍ଷରୁ ୱିଲ ୟଙ୍ଗ୍ ଏବଂ ଟମ ଲାଥମ ପାକିସ୍ତାନ ବିପକ୍ଷରେ ଶତକ ହାସଲ କରିଥିଲେ । ଫଳରେ ଦଳ ଘରୋଇ ଦଳକୁ ୬୦ ରନ୍ରେ ପରାଜିତ କରିବାରେ ସଫଳ ହୋଇଥିଲା । ଦଳର ବୋଲିଂ ମଧ୍ୟ ସନ୍ତୁଳିତ ରହିଥିଲା । ମ୍ୟାଟ୍ ହେନରି, ୱିଲ ଓ’ରାଉର୍କେ ଓ ମିଚେଲ ସାଣ୍ଟନର ଉନ୍ନତ ବୋଲିଂ କରିଥିଲେ । ସେହିଅନୁସାରେ ବାଂଲାଦେଶ ସେମିତି ପ୍ରଭାବୀ ପ୍ରଦର୍ଶନ ଭାରତ ବିପକ୍ଷରେ ଦେଇ ପାରିନଥିଲା ।
ଏହି ମ୍ୟାଚ୍ ଉପରେ ପାକିସ୍ତାନର ଶେଷ ଆଶା ନିର୍ଭର କରୁଛି । ଯଦି ବାଂଲାଦେଶ ମ୍ୟାଚ ବିଜୟୀ ହୁଏ, ତେବେ ଭାରତ-ନ୍ୟୁଜିଲାଣ୍ଡ ଏବଂ ବାଂଲାଦେଶ- ପାକିସ୍ତାନ ମ୍ୟାଚର ଫଳାଫଳ ଉପରେ ଦ୍ୱିତୀୟ ଦଳର ସେମି ଫାଇନାଲ ପ୍ରବେଶ ନିର୍ଭର କରିବ । ନ୍ୟୁଜିଲାଣ୍ଡ ନେଟ୍ ରନରେଟ୍ରେ (୧.୨୦୦) ବହୁ ଆଗରେ ରହିଥିବାବେଳେ ପାକିସ୍ତାନ ୨ଟି ମ୍ୟାଚ୍ ହାରିବା ପରେ ସ୍ଥିତି ଅତି ସଙ୍ଗୀନ (-୧.୦୮୭) ରହିଛି।
ନ୍ୟୁଜିଲାଣ୍ଡ : ରଚିନ ରବିନ୍ଦ୍ର/ୱିଲ ୟଙ୍ଗ, ଡେଭନ କନୱେ, କେନ୍ ୱିଲିୟମସନ, ଡାରିଲ ମିଚେଲ, ଟମ ଲାଥମ, ଗ୍ଲେନ ଫିଲିପ୍ସ, ମାଇକେଲ ବ୍ରେସୱେଲ, ମିଚେଲ ସାଣ୍ଟନର (ଅଧିନାୟକ), ମାଟ୍ ହେନେରୀ, ଜାକବ ଡଫି, ୱିଲ ଓ' ରୁର୍କ ।
ବାଂଲାଦେଶ: ତନଜିଦ ହାସାନ, ସୌମ୍ୟ ସରକାର, ନଜମୁଲ ହୋସେନ ଶାନ୍ତୋ(ଅଧିନାୟକ), ତୌହିଦ ହୃଦୟ, ମୁସଫିକର ରହିମ, ଜାକର ଅଲ୍ଲୀ, ମେହଦି ହାସାନ ମିରାଜ,ରିଶଦ ହୋସେନ, ଟସ୍କିନ ଅହମ୍ମଦ, ତଜିମ ହସନ, ମୁସ୍ତାଫିଜୁର ରେହମାନ ।
