ମୁମ୍ବାଇ,୧୮/୧ : କାହାକୁ ମିଳିବ ଚାନ୍ସ କିଏ ରହିବେ ବାଦ୍ । ରୋହିତ ଶର୍ମା ନେତୃତ୍ବ ନେବେ ନା ଅନ୍ୟ କିଏ ସବୁ ସସପେନ୍ସରୁ ପରଦା ହଟିବ । ଚାମ୍ପିଅନ୍ସ ଟ୍ରଫି ପାଇଁ କାହିଁକି ବିଳମ୍ବ ହେଉଛି ଭାରତୀୟ ଦଳ ଘୋଷଣା ଏହି ଚର୍ଚ୍ଚା ଆଲୋଚନାରେ ବ୍ରେକ ଲାଗିବ । ଆଜି (ଶନିବାର) ଚାମ୍ପିଅନ୍ସ ଟ୍ରଫି ୨୦୨୫ ଓ ଆସନ୍ତା ଇଂଲଣ୍ଡ ବିପକ୍ଷ ଦିନିକିଆ ସିରିଜ ପାଇଁ ଭାରତୀୟ ଦଳ ଘୋଷଣା ହେବ । ଏ ନେଇ ବିସିସିଆଇ ପକ୍ଷରୁ ସୂଚନା ମିଳିଛି । ରୋହିତ ଶର୍ମା ଅଧିନାୟକ ରହିବ ବୋଲି ନିଶ୍ଚିନ୍ତ ହୋଇଥିଲେ ବି ଘୋଷଣାକୁ ଅପେକ୍ଷା ରହିଛି । ମୁଖ୍ୟ ଚୟନକର୍ତ୍ତା ଅଜିତ ଅଗରକର ସାମ୍ବାଦିକ ସମ୍ମିଳନୀ କରି ଟିମ୍ ଘୋଷଣା କରିବେ ।
ଚାମ୍ପିଅନ୍ସ ଟ୍ରଫିରେ ଯଶପ୍ରତୀ ବୁମରା ଭାରତୀୟ ସ୍କ୍ବାର୍ଡରେ ସାମିଲ ହେବାକୁ ନେଇ ସସପେନ୍ସ ଜାରି ରହିଛି । ବର୍ଡର-ଗାଭାସ୍କର ଟ୍ରଫିରେ ପିଠି ଯନ୍ତ୍ରଣାରେ ଯୁଝୁଛନ୍ତି ଯଶପ୍ରୀତ୍ । ତେଣୁ ସେ ଚାମ୍ପିଅନ୍ସ ଟ୍ରଫି ଖେଳିବେ କି ନାହିଁ ଏହି ସସପେନ୍ସ ଦୂର କରିବେ ମୁଖ୍ୟ ଚୟନକର୍ତ୍ତା ଅଜିତ୍ ଅଗରକର । ରୋହିତ ଶର୍ମା ଉଭୟ ସିରିଜର ନେତୃତ୍ବ ନେବା ନିଶ୍ଚିନ୍ତ ହୋଇଛି । ଆଜି ରୋହିତ ଓ ଚନୟ କମିଟି ଅଧ୍ୟକ୍ଷ ଅଜିତ ଅଗରକର ମିଳିତ ଭାବେ ଦଳ ଘୋଷଣା କରିବେ । ଗତ ବର୍ଡର-ଗାଭାସ୍କର ଟ୍ରଫି ଟେଷ୍ଟ ସିରିଜର ଅନ୍ତିମ ମ୍ୟାଚରେ ରୋହିତ ଖେଳି ନଥିଲେ । ଅଧିନାୟକ ଥିବା ସତ୍ତ୍ବେ ଖରାପ ଫର୍ମ ଦର୍ଶାଇ ସେ ନିଜେ ଓହରି ଯାଇଥିଲେ । ଏହି ନିଷ୍ପତ୍ତିକୁ କିଛି ପ୍ରଶଂସା କରିଥିଲେ ସୁଦ୍ଧା କ୍ରିକେଟ ସମୀକ୍ଷକ ସମାଲୋଚନା କରିଥିଲେ । ଆଗାମୀ ଦିନରେ ତାଙ୍କୁ ଆଉ ଅଧିନାୟକ ଭାବେ ଦେଖିବାକୁ ମିଳିବ କି ନାହିଁ ତାକୁ ନେଇ ଚର୍ଚ୍ଚା ଲାଗି ରହିଥିଲା । ଆଜି ସବୁ ପ୍ରଶ୍ନର ଉତ୍ତର ଦେଇ ଚର୍ଚ୍ଚାର ଅନ୍ତ ଘଟାଇବ ବିସିସିଆଇ ।
ଅନ୍ୟପଟେ ବିଶ୍ବକପ ୨୦୨୩ରେ ହିରୋ ସାଜିଥିବା ଅଭିଜ୍ଞ ଦ୍ରୁତ ବୋଲର ମହମ୍ମଦ ସାମି ଭାରତୀୟ ସ୍କ୍ବାର୍ଡକୁ ଫେରିବାର ସମ୍ଭାବନା ରହିଛି । ସୂର୍ଯ୍ୟକୁମାର ଯାଦବ ଓ ଶାର୍ଦ୍ଦୁଳ ଠାକୁର ବାଦ ପଡିପାରନ୍ତି । ଇଂଲଣ୍ଡ ବିପକ୍ଷ ଦିନିକିଆ ସିରିଜ୍ ଲାଗି ମଧ୍ୟ ଭାରତୀୟ ଟିମ୍ ଘୋଷଣା ହେବ । ଚାମ୍ପିଅନ୍ସ ଟ୍ରଫି ପୂର୍ବରୁ ଇଂଲଣ୍ଡ ବିପକ୍ଷ ଏହି ଦିନିକିଆ ସିରିଜକୁ ଭାରତ ଲାଗି ଏକ ଅଭ୍ୟାସ ମ୍ୟାଚ୍ ରୂପେ ଦେଖାଯାଉଛି । ତେଣୁ ଉଭୟ ଦିନିକିଆ ସିରିଜ୍ ଏବଂ ଚାମ୍ପିଆନ୍ସ ଟ୍ରଫି ଲାଗି ଘୋଷଣା ହେବାକୁ ଥିବା ଭାରତୀୟ ଟିମ୍ରେ ସାମଞ୍ଜସ୍ୟ ରହିବ ବୋଲି କୁହାଯାଉଛି ।
ଏହା ବି ପଢନ୍ତୁ...କଠୋର ହେଲା ବିସିସିଆଇ: ଭାରତୀୟ ଦଳ ପାଇଁ ୧୦ ନୂଆ ନିୟମ, ଉଲ୍ଲଂଘନ କଲେ ଫାଇନ୍
ଆସନ୍ତା ଫେବୃଆରୀ ୧୯ ତାରିଖରେ ଚାମ୍ପିଅନ୍ସ ଟ୍ରଫି ଆରମ୍ଭ ହେବ । ନ୍ୟୁଜିଲାଣ୍ଡ ଓ ପାକିସ୍ତାନ ମଧ୍ୟରେ ଉଦଘାଟନୀ ମ୍ୟାଚ ଖେଳାଯିବ । ଫେବୃଆରୀ ୨୦ ତାରିଖରେ ବାଂଲାଦେଶ ବିପକ୍ଷରେ ଭାରତ ତାର ଅଭିଯାନ ଆରମ୍ଭ କରିବ । ଏହାପରେ ଫେବୃଆରୀ ୨୩ରେ ପାରମ୍ପରିକ ପ୍ରତିନ୍ଦ୍ବନ୍ଦୀ ପାକିସ୍ତାନକୁ ଭେଟିବ ଭାରତ । ଭାରତ, ପାକିସ୍ତାନ, ନ୍ୟୁଜିଲାଣ୍ଡ ଏବଂ ବାଂଲାଦେଶ ସହ ଗ୍ରୁପ୍-ଏରେ ରହିଛନ୍ତି । ଦୁବାଇ ଅନ୍ତର୍ଜାତୀୟ ଷ୍ଟାଡିୟମରେ ଭାରତୀୟ ଟିମ୍ ତାର ସବୁ ମ୍ୟାଚ ଖେଳିବ । ପ୍ରଥମ ସେମିଫାଇନାଲ ମ୍ୟାଚ ମାର୍ଚ୍ଚ ୪ ଓ ଦ୍ବିତୀୟ ସେମିଫାଇନାଲ ମାର୍ଚ୍ଚ ୮ ତାରିଖରେ ଖେଳାଯିବ । ମାର୍ଚ୍ଚ ୯ ତାରିଖରେ ଫାଇନାଲ ମ୍ୟାଚ ଖେଳାଯିବ ।
